ခတ္တမန္တူ ၊ စက်တင်ဘာ ၁
အလုပ်သမား ၆၀၀ ကျော် ပိတ်မိနေတယ်လို့ ယုံကြည်ရတဲ့ ရေအားလျှပ်စစ် ဥမင်လိုဏ်ခေါင်းထဲ ရောက်ရှိနိုင်ရေး နီပေါ ကယ်ဆယ်ရေး အလုပ်သမားတွေက တောင်နံရံကို ဖောက်ခွဲရေး ပစ္စည်းတွေနဲ့ ဖေါက်ခွဲ ဖျက်ဆီး ဖွင့်ချလိုက်ပါတယ်။
ထရီရှူလီ မြစ်တလျှောက် ရွှံ့နွှံတွေ ပြည့်နေတဲ့ ဥမင်လိုဏ်ခေါင်း ကွန်ရက်တွေအတွင်း အလုပ်သမား ရာနဲ့ချီ ပိတ်မိနေပြီး အသက်ရှင်လျက်ရှိဦးမယ်လို့ မိသားစုဝင်တွေက မျှော်လင့်နေဆဲ ဖြစ်ပါတယ်။
ပိတ်မိနေသူတွေဆီ ရောက်ရှိရေး ကယ်ဆယ်ရေးသမားတွေက သြဂုတ် ၃၁ ရက် တောင်နံရံကို ဖောက်ခွဲဖွင့်ချပြီး ဥမင်လမ်းကြောင်းထဲသို့ လေဝင်ရောက်စေရေး စက်တွေနဲ့ ထိုးသွင်းပေးခဲ့ပါတယ်။
နီပေါနဲ့ တိဘက် နယ်စပ်မှာ ဆိုးရွားလွန်းတဲ့ ရေဘေးကြောင့် သေဆုံးသူ ၉၃၉ ဦး အထိ ရှိလာချိန်မှာ အခုလိုမျိုး ကယ်ဆယ်ရေး ကြိုးပမ်းနေကြတာ ဖြစ်ပါတယ်။
ပျောက်ဆုံးနေသူ ၃၉၂၅ ဦးထဲမှာ နိုင်ငံခြားသား ၅၉၂ ဦး ပါဝင်နိုင်တယ်လို့ နီပေါ သဘာဝဘေး စီမံခန့်ခွဲရေး ဌာနက ပြောပါတယ်။
နီပေါမှာ ပျောက်ဆုံးနေသူ ၇ ဦးထဲက တစ်ဦးဟာ အဲဒီ ရေအားလျှပ်စစ် စက်ရုံတွေမှာရှိတဲ့ အလုပ်သမားတွေဖြစ်ကြောင်း အရာရှိတွေက ယုံကြည်ထားပါတယ်။
နီပေါ ဝန်ကြီးချုပ် ဘာလန်ဒရာ ရှားက အဲဒီ နေရာကနေ လူ ၂၇၉ ဦး ကယ်ဆယ်ပြီး ဖြစ်ကြောင်း သြဂုတ် ၃၁ ရက်မှာ ပြောပါတယ်။
ကယ်ဆယ်ရေး လုပ်ငန်းစဉ်ကို တရုတ်၊ နီပေါ စစ်တပ်နဲ့အတူ အိန္ဒိယ၊ တောင်ကိုရီးယား၊ သြစတြေးလျ စတဲ့ နိုင်ငံတကာ ပညာရှင်တွေ ဦးဆောင်နေတာ ဖြစ်ပါတယ်။
နီပေါနိုင်ငံဟာ ရေအား လျှပ်စစ်အပေါ် အများကြီး မှီခိုအားထားနေရပြီး တောင်ထူထပ်တဲ့ မြစ်ကြောင်းတွေကြား စီမံကိန်းတွေကို နှစ်များစွာကြာအကောင်အထည် ဖော်ခဲ့တာ ဖြစ်ပါတယ်။
ရေဘေးအတွင်းမှာ တည်ဆောက်ပြီးစီးပြီး ဒါမှမဟုတ် တည်ဆောက်ဆဲ စီမံကိန်း အနည်းဆုံး ၁၁ ခု ထိခိုက် ပျက်စီးသွားကြောင်း အာဏာပိုင်တွေက ပြောပါတယ်။
ကယ်ဆယ်ရေးသမားတွေက ဥမင်လမ်းထဲ လေတွေ သွင်းပေးနေပေမယ့် သူတို့ အနေနဲ့ အစောကြီးကတည်းက အဲဒီလို လုပ်ဆောင်ခဲ့သင့်တယ်လို့ ဆွေမျိုးသားချင်းတွေက တုံ့ပြန်ပါတယ်။
ရေအားလျှပ်စစ် စက်ရုံသို့ ဦးတည်နေတဲ့ ဥမင်လမ်း တစ်ခုသို့ ကယ်ဆယ်ရေး အဖွဲ့ တစ်ဖွဲ့ သြဂုတ် ၃၁ ရက်မှာ ရောက်ရှိခဲ့ပေမယ့် လူ တစ်ယောက်မှ ရှာမတွေ့တာကြောင့် ပြန်လည် ထွက်ခွာလာခဲ့ရပါတယ်။
အချိန်ကြာလာတဲ့အမျှ မိမိတို့ မျှော်လင့်ချက်တွေ ပိုပြီး ပျောက်ဆုံးလာနေတယ်လို့ ဥမင်လမ်းကြောင်းထဲ ပိတ်မိနေသူ တစ်ဦးရဲ့ မိသားစုဝင် ဂျီဘန် ခက်ဒါက ပြောပါတယ်။
ရေကြီးရေလျှံမှုတွေဟာ သာမန် ဖြစ်ပွားတဲ့ ဖြစ်ရပ် မဟုတ်ကြောင်းနဲ့ ကယ်ဆယ်ရေး အရှိန်မြှင့် လုပ်ဆောင်နေကြောင်း နီပေါ ကယ်ဆယ်ရေး ခေါင်းဆောင် တစ်ဦးက ပြောပါတယ်။
အခု ဖြစ်ရပ်က ရာသီဥတု ပြောင်းလဲမှုနဲ့အတူ ဟိမဝန္တာ ဒေသမှာ မိမိတို့ ရင်ဆိုင်နေရတဲ့ အန္တရာယ်တွေ ပိုများလာနေကြောင်း ဖော်ပြနေတယ်လို့ သူက ပြောပါတယ်။
အဲဒီ ဥမင်လမ်းထဲမှာ ပိတ်မိနေသူတွေ အများကြီး ရှိသေးတယ်လို့ လွတ်မြောက်လာသူ တချို့က ပြောထားပါတယ်။
ပိတ်မိနေသူတွေကို နီပေါ စစ်တပ်က အလျင်အမြန် ကယ်တင်နိုင်လိမ့်မယ်လို့ မျှော်လင့်ကြောင်းလည်း သူတို့က ပြောပါတယ်။
နီပေါ ကယ်ဆယ်ရေး အဖွဲ့တွေက တောင်နံရံကို ဖောက်ခွဲဖွင့်ချပြီး ကယ်ဆယ်ဖို့ ကြိုးပမ်းနေပေမယ့် အောင်မြင်မှု နည်းနည်းလေးပဲ ရရှိထားပါတယ်။
ပျောက်ဆုံးနေသူ အများအပြား ရှိတာကြောင့် သေဆုံးသူ အရေအတွက် ပိုများလာနိုင်တယ်လို့လည်း နီပေါ အာဏာပိုင်တွေက ပြောပါတယ်။
ပြန်ရှာတွေ့ထားတဲ့ အလောင်း ၉၀၀ ထဲက ၄ ရာခိုင်နှုန်းလောက်ကိုပဲ ဘယ်သူဘယ်ဝါတွေ ဖြစ်ကြောင်း ဖော်ထုတ်ထားနိုင်တယ်လို့ နီပေါ ကျန်းမာရေး ဝန်ကြီးဌာန ပြောရေးဆိုခွင့်ရှိသူက ပြောထားပါတယ်။
Ref:BBC