ဝါရှင်တန်၊ ဇွန် ၂၇
လက်ဘနွန်၊ အစ္စရေးနဲ့ အမေရိကန်နိုင်ငံတို့ဟာ ဇွန် ၂၆ ရက်က သုံးနိုင်ငံပူးတွဲ အခြေခံသဘောတူညီချက် တစ်ရပ်ကို လက်မှတ်ရေးထိုးခဲ့ကြပါတယ်။ ဒီသဘောတူညီချက်ဟာ ဆယ်စုနှစ်များစွာ ရန်ဘက်ဖြစ်နေခဲ့တဲ့ လက်ဘနွန်နဲ့ အစ္စရေးတို့ကြား အမြဲတမ်းငြိမ်းချမ်းရေးရရှိရေးအတွက် ပထမဆုံး အရေးကြီးတဲ့ခြေလှမ်းဖြစ်တယ်လို့ ဆိုပါတယ်။
ဒီသဘောတူညီချက်ဟာ အမေရိကန်နိုင်ငံ ဝါရှင်တန်မြို့တော်မှာ ပြုလုပ်ခဲ့တဲ့ ဆွေးနွေးပွဲ ၅ ကြိမ်ရဲ့ ရလဒ်ဖြစ်ပြီး၊ အစ္စရေးတပ်တွေ သိမ်းပိုက်ထားတဲ့ နေရာ ၂ ခုကို လက်ဘနွန်စစ်တပ်က စတင်တာဝန်ယူထိန်းချုပ်မယ့် စမ်းသပ်အစီအစဉ်နဲ့ ဟစ်ဇဘိုလာ လက်နက်ဖြုတ်သိမ်းရေး လုပ်ငန်းစဉ်တွေကိုပါ ထည့်သွင်းထားပါတယ်။
အမေရိကန် နိုင်ငံခြားရေးဝန်ကြီး မာကိုယိုဘီယိုက လက်မှတ်ရေးထိုးပွဲမှာ “ဒီသဘောတူညီချက်ဟာ ရေရှည်တည်တံ့တဲ့ ငြိမ်းချမ်းရေးနဲ့ လုံခြုံရေးအတွက် အခြေခံမူဘောင်ကို စတင်တည်ဆောက်ပေးလိုက်တာပါ။ ဒါဟာ အစရဲ့အစပဲ ဖြစ်ပြီး ရှေ့မှာ လုပ်စရာအများကြီး ကျန်နေသေးတယ်” လို့ ပြောပါတယ်။
ပြီးခဲ့တဲ့ မတ် ၂ ရက်နေ့မှာ ဟစ်ဇဘိုလာအဖွဲ့က အစ္စရေးဘက်ကို ဒုံးကျည်တွေနဲ့ ပစ်ခတ်ခဲ့ပြီး၊ အဲဒါဟာ အမေရိကန်နဲ့ အစ္စရေးတို့ရဲ့ တိုက်ခိုက်မှုအတွင်း အီရန် အမြင့်ဆုံးခေါင်းဆောင် အယာတိုလာ အလီခါမေနီ သေဆုံးခဲ့တာကို လက်စားချေတဲ့အနေနဲ့ လုပ်ဆောင်ခဲ့တာဖြစ်ပါတယ်။
အစ္စရေးကလည်း လေကြောင်းတိုက်ခိုက်မှုအပြင်းအထန် ပြုလုပ်ခဲ့သလို မြေပြင်တပ်တွေကို လက်ဘနွန်တောင်ပိုင်းထဲ ဝင်ရောက်စေလွှတ်ခဲ့ပါတယ်။ လက်ရှိအချိန်ထိ အစ္စရေးတပ်တွေဟာ တောင်ပိုင်းဒေသအချို့ကို ဆက်လက်ထိန်းချုပ်ထားပြီး အိမ်အဆောက်အအုံ အများအပြားကို ဖျက်ဆီးနေဆဲ ဖြစ်ပါတယ်။
အမေရိကန် နိုင်ငံခြားရေးဝန်ကြီးဌာန ထုတ်ပြန်တဲ့ စာတမ်းအရ လက်ဘနွန်နဲ့ အစ္စရေးတို့ဟာ နှစ်နိုင်ငံကြား ပဋိပက္ခကို အပြီးသတ်အဆုံးသတ်ဖို့၊ ပဋိပက္ခဖြစ်ပွားရတဲ့ အကြောင်းရင်းတွေကို ဖြေရှင်းဖို့နဲ့ နှစ်နိုင်ငံကြား စစ်အခြေအနေကို တရားဝင် အဆုံးသတ်ဖို့ ရည်ရွယ်ထားကြောင်း ဖော်ပြထားပါတယ်။
ဒါ့အပြင် လက်ဘနွန်စစ်တပ် (LAF) ဟာ ဟစ်ဇဘိုလာအပါအဝင် နိုင်ငံမဟုတ်တဲ့ လက်နက်ကိုင်အဖွဲ့အစည်းတွေ လက်နက်ဖြုတ်သိမ်းကြောင်း အတည်ပြုပြီးတဲ့နောက် လက်ဘနွန်နိုင်ငံတစ်ဝန်းလုံးကို ပြန်လည်ထိန်းချုပ်သွားရမှာ ဖြစ်ပါတယ်။
အဲဒီအဆင့်ပြီးရင်တော့ အစ္စရေးတပ်တွေက လက်ဘနွန်နယ်မြေထဲကနေ အဆင့်လိုက် ဆုတ်ခွာသွားမယ်လို့ သဘောတူညီချက်မှာ ရေးသားထားပါတယ်။
Ref:Bangkokpost