ဘေဂျင်း မေ ၁
မြန်မာနိုင်ငံရဲ့ နိုင်ငံရေးခေါင်းဆောင် ဒေါ်အောင်ဆန်းစုကြည်ဟာ တရုတ်နိုင်ငံရဲ့ မိတ်ဆွေဟောင်းတစ်ဦးဖြစ်ပြီး သူ့ရဲ့အခြေအနေကို မိမိတို့ဘက်က ဆက်လက် စောင့်ကြည့်နေတယ်လို့ တရုတ် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ လင်ကျန်းက ဧပြီ ၃၀ ရက်မှာ ပြောဆိုလိုက်ပါတယ်။
ပုံမှန်သတင်းစာရှင်းလင်းပွဲမှာ ပြောခွင့်ရသူ လင်ကျန်းက တရုတ်နိုင်ငံဟာ အိမ်နီးချင်းမိတ်ဆွေနိုင်ငံအနေနဲ့ မြန်မာနိုင်ငံကို နိုင်ငံ့အခြေအနေအလိုက် ဖွံ့ဖြိုးတိုးတက်မှုလမ်းကြောင်း ရွေးချယ်နိုင်ဖို့ ထောက်ခံတယ်လို့ ဆိုပါတယ်။ နောက်ပြီး မြန်မာနိုင်ငံအတွင်းရှိ ဘက်အားလုံးအနေနဲ့ ပိုမိုကျယ်ပြန့်ပြီး တည်ငြိမ်အဓွန့်ရှည်မယ့် ငြိမ်းချမ်းရေးနဲ့ ပြန်လည်သင့်မြတ်ရေးကို တိုးတက်အောင် လုပ်ဆောင်နိုင်ဖို့လည်း ကူညီပံ့ပိုးသွားဖို့ အသင့်ရှိတယ်လို့ ပြောပါတယ်။
ဒီအချိန်မှာ အာဆီယံအဖွဲ့ဝင်နိုင်ငံတွေနဲ့ နိုင်ငံတကာခေါင်းဆောင်တွေက ဒေါ်အောင်ဆန်းစုကြည်ကို လွှတ်ပေးဖို့ တောင်းဆိုမှုတွေ များပြားလာနေပါတယ်။ ဒေါ်အောင်ဆန်းစုကြည်ဟာ နှစ်ပေါင်းအတော်ကြာ အကျဉ်းထောင်ထဲမှာ ထိန်းသိမ်းခံနေရတာ ဖြစ်ပါတယ်။
တခြားတစ်ဖက်မှာ မြန်မာနိုင်ငံ အာဏာသိမ်းသမ္မတ ဦးမင်းအောင်လှိုင်က ဗုဒ္ဓနေ့ အထိမ်းအမှတ်အဖြစ် အကျဉ်းသား ၁,၅၁၉ ဦးကို လွတ်ငြိမ်းချမ်းသာခွင့် ပေးခဲ့တယ်လို့ ကြေညာထားပါတယ်။
အဲဒီထဲမှာ မြန်မာနိုင်ငံသား ၁,၅၀၈ ဦးနဲ့ နိုင်ငံခြားသား ၁၁ ဦး ပါဝင်ပြီး ဗုဒ္ဓနေ့ဟာ ကဆုန်လပြည့်နေ့နဲ့ တိုက်ဆိုင်ပါတယ်။ လွတ်ငြိမ်းချမ်းသာခွင့်ပေးတာဟာ ပြည်သူတွေအတွက် ငြိမ်းချမ်းမှုနဲ့ လူသားဆန်မှု တိုးတက်စေဖို့၊ လွတ်မြောက်လာသူတွေကို နိုင်ငံတည်ဆောက်ရေးမှာ ပါဝင်နိုင်စေဖို့နဲ့ နိုင်ငံအချင်းချင်း ခင်မင်ရင်းနှီးမှု ဆက်လက်ထိန်းသိမ်းနိုင်ဖို့ ရည်ရွယ်ထားတာဖြစ်တယ်လို့ ဖော်ပြထားပါတယ်။
ဒါပေမယ့် လွတ်ငြိမ်းချမ်းသာခွင့် ရရှိသူတွေက နောက်ထပ် ပြစ်မှု ပြန်လည်ကျူးလွန်ခဲ့မယ်ဆိုရင် အသစ်ချမှတ်မယ့် အပြစ်ဒဏ်နဲ့ အရင်ကျန်ရှိနေတဲ့ အပြစ်ဒဏ်တွေကိုပါ ပေါင်းပြီး ထပ်မံ ခံယူရမယ်လို့လည်း အမိန့်ထဲမှာ ဖော်ပြထားပါတယ်။ နိုင်ငံခြားသားအကျဉ်းသားတွေကိုတော့ လွတ်ငြိမ်းခွင့်ပေးပြီး နိုင်ငံထဲကနေ နှင်ထုတ်ထားပါတယ်။
ဒါ့အပြင် သီးခြားအမိန့်တစ်ခုအရ နိုင်ငံတဝှမ်းက အကျဉ်းချခံထားရသူတွေရဲ့ ပြစ်ဒဏ်ကိုလည်း ခြောက်ပုံတစ်ပုံ လျှော့ချပေးခဲ့ပါတယ်။
ပြီးခဲ့တဲ့ ဧပြီလ ၁၇ ရက်နေ့မှာလည်း မြန်မာနှစ်သစ်ကူးအထိမ်းအမှတ်အဖြစ် အကျဉ်းသား ၄,၅၀၀ ကျော်ကို လွတ်ငြိမ်းချမ်းသာခွင့် ပေးခဲ့ပါတယ်။
Ref:Xinhua