မကွေး ဩဂုတ် ၅
မကွေးနဲ့ ရခိုင်ပြည်နယ်အစပ်ကနေရာတွေဆီ စစ်ကောင်စီက စစ်မှုထမ်းသင်တန်းဆင်းတွေကို အလုံးအရင်းနဲ့ ပို့ဆောင်နေတယ်လို့ ဒေသခံတွေက သံလွင်တိုင်းမ်ကို ပြောပါတယ်။
သြဂုတ် ၃ ရက်မှာ စစ်မှုထမ်းတွေ အပြည့်တင်ဆောင်လာတဲ့ ကားအစီး ၂၀ ဟာ မိတ္ထီလာမြို့ကနေ မကွေးမြို့ပေါ်ကိုရောက်ရှိလာတာပါ။
“စစ်မှုထမ်း သင်တန်းဆင်းတွေလို့ သိရတယ်။ ကားတွေကတော့ မင်းဘူးဘက် ထွက်သွားတယ်။ အဲဒီကနေ ဘယ်သွားမယ်ဆိုတာ မသိရသေးဘူး”လို့ မကွေးဒေသခံ တစ်ဦးက သံလွင်တိုင်းမ်ကို ပြောပါတယ်။
တစ်စီးကို အယောက် ၃၀ ဝန်းကျင်ပါတဲ့ စစ်မှုထမ်းတွေ ပါဝင်လာတဲ့ ကားအစီးရေ ၂၀ ကျော်ဟာ ညနေ ၅ နာရီ ဝန်းကျင်မှာတော့ ငဖဲဘက်ကို ရောက်ရှိသွားတယ်လို့ ဒေသခံတွေက ပြောပါတယ်။
ငဖဲ-ပဒါန်းအနီး နတ်ရေကန် လေကြောင်းရန်ကာကွယ်ရေးစခန်းအနီးမှာမကြာခဏဆိုသလို တိုက်ပွဲတွေပြင်းထန်နေပြီးတော့ အာရက္ခတပ်တော် AA နဲ့ PDF ပူးပေါင်းတပ်တွေဟာ MPT တာဝါတိုင်ကုန်းကိုလည်း သိမ်းယူထားပါတယ်။
လတ်တလောမှာတော့ နတ်ရေကန် လေကြောင်းရန်ကာကွယ်ရေးစခန်းကို ရိက္ခာဖြတ်တောက်တာတွေရှိနေပြီး အဲဒီစခန်းကနေ ထွက်ပြေးလာတဲ့ စစ်မှုထမ်းနဲ့ စစ်ကောင်စီတပ်သားတွေ ၂၀ ကျော်ရှိနေပြီလို့သိရပါတယ်။
သတင်း – သံလွင်တိုင်းမ်
ဓာတ်ပုံ – MOI