တိုကျို၊ စက်တင်ဘာ ၉
ဂျပန်နိုင်ငံ ဟော့ကိုင်းဒိုးပြည်နယ်မှာ Specified Skilled Worker ကျွမ်းကျင်လုပ်သား ဗီဇာနဲ့ အလုပ်လုပ်နေတဲ့ မြန်မာလုပ်သားတစ်ဦးက အလုပ်ရှင်ဘက်က လူတွေရဲ့ ကိုယ်ထိလက်ရောက် အကြမ်းဖက်မှုနဲ့ နှောင့်ယှက်မှုတွေ ခံခဲ့ရတယ်လို့ ထုတ်ဖော်ပြောဆိုလိုက်ပါတယ်။
အသက် ၃၀ ကျော်အရွယ် မြန်မာအမျိုးသားဟာ စက်တင်ဘာ ၇ ရက်က တိုကျိုမြို့မှာ ပြုလုပ်တဲ့ သတင်းစာရှင်းလင်းပွဲမှာ သူကြုံတွေ့ခဲ့ရတဲ့ အခြေအနေတွေကို ပြောပြခဲ့တာပါ။
သူဟာ ၂၀၂၆ ခုနှစ် မေလမှာ ဂျပန်နိုင်ငံကို ရောက်ရှိလာပြီး ဟော့ကိုင်းဒိုးပြည်နယ် ကျိုဂိုကုမြို့မှာရှိတဲ့ စိုက်ပျိုးရေးခြံတစ်ခုမှာ အလုပ်လုပ်ခဲ့တာဖြစ်ပါတယ်။
အလုပ်လုပ်ရာမှာ အမှားလုပ်မိတဲ့အခါ ဒါမှမဟုတ် ဂျပန်ဘာသာစကားနဲ့ ကောင်းကောင်းမဆက်သွယ်နိုင်တဲ့အခါ အင်္ကျီလည်ပင်းကနေ ဆွဲတာ၊ တုတ်နဲ့ ရိုက်တာတွေ ပြုလုပ်ခံခဲ့ရတယ်လို့ အဲဒီ လုပ်သားက ပြောပါတယ်။
“ဂျပန်မှာ စာသင်ရင်း မိသားစုကိုလည်း ငွေပို့ပေးချင်ခဲ့တာပါ။ ဒါပေမယ့် အရိုက်ခံရပြီးနောက်ပိုင်း ကောင်းကောင်းအိပ်မပျော်တော့ဘဲ အခုထိ အိပ်မက်ဆိုးတွေ မက်နေတုန်းပါ” လို့ အဲဒီ မြန်မာအမျိုးသားက ပြောပါတယ်။
အဲဒီ မြန်မာလုပ်သားဟာ ကိုယ်ထိလက်ရောက်ကျူးလွန်မှုနဲ့ လူနှစ်ဦးကို တရားဝင်တိုင်ကြားသွားဖို့ စီစဉ်နေပြီး၊ အဲဒီထဲမှာ ဒေသခံမြို့နယ်လွှတ်တော်အမတ်တစ်ဦးလည်း ပါဝင်တယ်လို့ သူ့ရှေ့နေက ပြောပါတယ်။ အဲဒီ လွှတ်တော်အမတ်ဟာ ခြံလုပ်ငန်းရဲ့ နောက်ကွယ်က အဓိက စီမံခန့်ခွဲသူအဖြစ် ပါဝင်နေသူလို့ ယုံကြည်ရပါတယ်။
မြန်မာလုပ်သား ၇ ဦးအထိ အလားတူကိစ္စနဲ့ အကူအညီတောင်းထား
အဲဒီ ခြံနဲ့ပတ်သက်ပြီး မြန်မာနိုင်ငံသား အမျိုးသား၊ အမျိုးသမီး စုစုပေါင်း ၆ ဦးဟာလည်း ဆော်ပိုရို အထွေထွေလုပ်သား သမဂ္ဂထံ အကူအညီတောင်းခံထားပါတယ်။
အဲဒီထဲက အမျိုးသားလုပ်သားတစ်ဦးကတော့ ဩဂုတ်လကုန်ပိုင်းမှာ ခြံနဲ့ဆက်စပ်သူ လူနှစ်ဦးကို ကိုယ်ထိလက်ရောက်ကျူးလွန်မှုနဲ့ ထိခိုက်ဒဏ်ရာရစေမှုစတဲ့ စွပ်စွဲချက်တွေနဲ့ ဟော့ကိုင်းဒိုးပြည်နယ်ရဲတပ်ဖွဲ့ထံ တိုင်ကြားထားပါတယ်။
အလုပ်သမားသမဂ္ဂရဲ့ စုံစမ်းမှုအရ မြန်မာလုပ်သားတွေဟာ နောက်ကျောကို သံချောင်းနဲ့ ရိုက်ခံရတာ၊ ခေါင်းကို လက်နဲ့ရိုက်ခံရတာ၊ ဆဲဆိုအော်ဟစ်ခံရတာ စတဲ့ ကိုယ်ထိလက်ရောက်အပြင် နှုတ်နဲ့ပါ အကြမ်းဖက်မှုတွေ ကြုံခဲ့ရတယ်လို့ ဆိုပါတယ်။
အဲဒီ စိုက်ပျိုးရေးကုမ္ပဏီဟာ မေလကတည်းက မြန်မာလုပ်သား စုစုပေါင်း ၃၀ ခန့်ကို လက်ခံအလုပ်ခန့်ထားခဲ့တာ ဖြစ်ပြီး အကြမ်းဖက်မှုနဲ့ အလုပ်ခွင်နှောင့်ယှက်မှုတွေ ပိုမိုကျယ်ပြန့်ခဲ့နိုင်တာကြောင့် ဂျပန် ဆော်ပိုရိုဒေသဆိုင်ရာ လူဝင်မှုကြီးကြပ်ရေးဌာနက အခြေအနေမှန်ကို စုံစမ်းစစ်ဆေးနေတယ်လို့ သိရပါတယ်။
ယခင်ကလည်း လူ့အခွင့်အရေးချိုးဖောက်မှုနဲ့ အရေးယူခံထားရ
အခုစွပ်စွဲခံနေရတဲ့ စိုက်ပျိုးရေးကုမ္ပဏီနဲ့ လိပ်စာတူတဲ့ ကုမ္ပဏီတစ်ခုဟာ ၂၀၂၂ ခုနှစ် မတ်လမှာလည်း နိုင်ငံခြားသား နည်းပညာအလုပ်သင်လုပ်သားတွေရဲ့ လူ့အခွင့်အရေးကို ပြင်းထန်စွာ ချိုးဖောက်ခဲ့တယ်ဆိုတဲ့ အကြောင်းပြချက်နဲ့ ဂျပန်ကျန်းမာရေး၊ အလုပ်သမားနဲ့ လူမှုဖူလုံရေးဝန်ကြီးဌာနအပါအဝင် သက်ဆိုင်ရာအာဏာပိုင်တွေထံက အရေးယူမှု ခံခဲ့ရပါတယ်။
လက်ရှိမှာ တိုင်ကြားမှုတွေနဲ့ ပတ်သက်ပြီး စုံစမ်းစစ်ဆေးမှုတွေ ဆက်လက်လုပ်ဆောင်နေပြီး စွပ်စွဲခံထားရသူဘက်ကတော့ အများပြည်သူရှေ့မှာ တရားဝင်ရှင်းလင်းပြောဆိုခြင်း မရှိသေးပါဘူး။
တိုင်ကြားခံရသူ မြို့နယ်လွှတ်တော်အမတ်ဟာ စက်တင်ဘာ ၃ ရက်မှာ စတင်ကျင်းပတဲ့ လွှတ်တော်ပုံမှန်အစည်းအဝေးကိုလည်း ကိုယ်ရေးကိုယ်တာအကြောင်းပြချက်နဲ့ တက်ရောက်ခြင်းမရှိခဲ့ဘူးလို့ သိရပါတယ်။
Ref:mainichi