ကိဗ်၊ ဇူလိုင် ၇
ရုရှားရဲ့ အရှိန်မြင့်လာတဲ့ တိုက်ခိုက်မှု အန္တရာယ်ကနေ ယူကရိန်းကို ကာကွယ်ရေး အရေးတကြီး လိုအပ်နေတဲ့ လေကြောင်း ကာကွယ်ရေး စနစ်တွေ ပေးပို့ပေးရေး ယူကရိန်း သမ္မတ ဗိုလိုဒီမာ ဇီလန်စကီးက တူရကီမှာ ကျင်းပမယ့် နေတိုးအဖွဲ့အစည်းအဝေးကို အသုံးချဖို့ စီစဉ်ထားတယ်လို့ သိရပါတယ်။
ယူကရိန်း မြို့တော်ကို ရုရှားက တစ်ပတ် မပြည့်ခင်အတွင်း ကြီးကြီးမားမား နှစ်ကြိမ်တိုင် တိုက်ခိုက်မှုကြောင့် အရပ်သား ၅၀ ကျော် သေဆုံးခဲ့ပြီး ဇီလန်စကီးက သူတို့မှာ လေကြောင်း ကာကွယ်ရေး ဒုံးကျည်တွေ ပြတ်လပ်နေကြောင်း အသိပေးထားပါတယ်။
သူက လေကြောင်း ကာကွယ်ရေး စနစ် ထောက်ပံ့ပေးရေး ယူကရိန်း မဟာမိတ်တွေကို တွန်းအားပေးဖို့ စီစဉ်ထားတာ ဖြစ်ပါတယ်။
အန်ကာရာမြို့မှာ ကျင်းပမယ့် နေတိုးအဖွဲ့ ထိပ်သီး ဆွေးနွေးပွဲမှာ ဇီလန်စကီးက အမေရိကန် သမ္မတ ဒေါ်နယ် ထရန့်နဲ့ တွေ့ဆုံဆွေးနွေးခွင့်ရဖို့လည်း ကြိုးပမ်းသွားမှာ ဖြစ်ပါတယ်။
ရုရှားရဲ့ ပြင်းပြင်းထန်ထန် တိုက်ခိုက်မှုတွေဟာ သူတို့ရဲ့ အားနည်းချက်ကို ဖော်ပြနေတာ ဖြစ်ပြီး အားကောင်းလာတာ မဟုတ်ဘဲ ယူကရိန်းအတွက် ဂုဏ်သိက္ခာရှိတဲ့ ငြိမ်းချမ်းရေးအတွက် ဆွေးနွေးမှုတွေ ပြုလုပ်ရေး ရုရှား သမ္မတ ဗလာဒီမာ ပူတင်အပေါ် ဖိအားပေးနိုင်တဲ့ အခွင့်အရေး ဖြစ်တယ်လို့ သူက ပြောပါတယ်။
ယူကရိန်းက ရုရှား ရေနံ သန့်စင်စက်ရုံတွေနဲ့ စစ်ရေး ပစ်မှတ်တွေကို တာဝေး တိုက်ခိုက်မှုတွေ ပြုလုပ်နေတာကြောင့် ရုရှားမှာ လောင်စာ ပြတ်လပ်မှုတွေနဲ့ ရင်ဆိုင်နေရပါတယ်။
ရုရှားမှာ ယူကရိန်း တိုက်ခိုက်မှုတွေကြောင့် ထိခိုက်ပျက်စီးမှု အတိုင်းအတာကို မသိရသေးပေမယ့် တစ်ညတည်းနဲ့ တိုက်ခိုက်ရေး ဒရုန်း ၄၃၀ ကို မိမိတို့ လေကြောင်း ကာကွယ်ရေးစနစ်က ကြားဖြတ် ပစ်ချခဲ့ရတယ်လို့ မော်စကို မြို့တော်ဝန် ဆာဂျီ ဆော့ဘ်ယန်နီက ပြောပါတယ်။
ဓာတ်ဆီ ဝယ်ယူခွင့်ရရှိဖို့ နာရီပေါင်းများစွာ ကြာအောင် လူတွေ တန်းစီ စောင့်ဆိုင်းနေရပုံတွေကို ရုရှား လူမှုမီဒီယာတွေမှာ တင်ထားတဲ့ ဗီဒီယိုတွေမှာ မြင်တွေ့ရပါတယ်။
ဇူလိုင် ၇ ရက်နဲ့ ၈ ရက်အတွင်း အန်ကာရာမှာ ကျင်းပမယ့် နေတိုးအဖွဲ့ ထိပ်သီး ဆွေးနွေးပွဲ မတိုင်ခင် ဇီလန်စကီးက အခု ဆွေးနွေးပွဲဟာ ဒီအတိုင်း ပြီးဆုံးသွားမှာ မဟုတ်ဘူးလို့ မျှော်လင့်ကြောင်း ပြောပါတယ်။
နေတိုးအဖွဲ့ အတွင်းရေးမှူးချုပ် မက် ရူသီက အဖွဲ့ဝင် နိုင်ငံတွေအနေနဲ့ ယူကရိန်းရဲ့ အချုပ်အခြာအာဏာပိုင် နယ်နိမိတ်အား ကာကွယ်နိုင်ရေး ကူညီပေးကြဖို့ တိုက်တွန်းထားပါတယ်။
Ref:BBC