ဆိုးလ် ဇွန် ၂၇
တောင်ကိုရီးယားနိုင်ငံရဲ့ လေကြောင်းကာကွယ်ရေး သတ်မှတ်ဇုန်ထဲကို တရုတ်နဲ့ ရုရှား စစ်လေယာဉ် ၁၀ စင်းထက်နည်း ဇွန် ၂၇ ရက်က ဝင်ရောက်လာခဲ့တာကြောင့် တောင်ကိုရီးယားဘက်က ကြိုတင်ကာကွယ်တဲ့အနေနဲ့ တိုက်လေယာဉ်တွေကို အရေးပေါ် ပျံတက်စေခဲ့ရတယ်လို့ ထုတ်ပြန်လိုက်ပါတယ်။
တောင်ကိုရီးယား ပူးတွဲစစ်ဦးစီးချုပ်ရုံးရဲ့ ထုတ်ပြန်ချက်အရ တရုတ်နဲ့ ရုရှား စစ်လေယာဉ်တွေဟာ အရှေ့ပင်လယ်နဲ့ တောင်ပိုင်းပင်လယ်ဘက်ကနေ လေကြောင်းသတ်မှတ်ဇုန်ကို ဝင်ရောက်ခဲ့ပြီး နောက်ပိုင်းမှာ ပြန်လည်ထွက်ခွာသွားခဲ့တယ်လို့ ဆိုပါတယ်။
တောင်ကိုရီးယားစစ်တပ်ကတော့ အဲဒီ လေယာဉ်တွေ သတ်မှတ်ဇုန်ထဲ မဝင်ခင်ကတည်းက လှုပ်ရှားမှုကို စောင့်ကြည့်တွေ့ရှိထားပြီး မမျှော်လင့်ထားတဲ့ အခြေအနေတစ်ခုခု ဖြစ်လာနိုင်တာကို ကြိုတင်ပြင်ဆင်နိုင်ဖို့ လေတပ်တိုက်လေယာဉ်တွေကို ချက်ချင်းစေလွှတ်ခဲ့တယ်လို့ ပြောပါတယ်။
ဒါပေမယ့် အဲဒီ စစ်လေယာဉ်တွေဟာ တောင်ကိုရီးယားရဲ့ အချုပ်အခြာပိုင် လေပိုင်နက်ကိုတော့ မကျူးကျော်ခဲ့ဘူးလို့လည်း အတည်ပြုထားပါတယ်။
လေကြောင်းသတ်မှတ်ဇုန်ဆိုတာ နိုင်ငံတစ်နိုင်ငံရဲ့ အချုပ်အခြာပိုင် လေပိုင်နက် မဟုတ်ဘဲ လုံခြုံရေးအတွက် နိုင်ငံဆီ ဦးတည်လာတဲ့ လေယာဉ်တွေကို ကြိုတင်ဖော်ထုတ် စစ်ဆေးနိုင်ဖို့ သတ်မှတ်ထားတဲ့ လေကြောင်းကာကွယ်ရေးဇုန် ဖြစ်ပါတယ်။
ပုံမှန်အားဖြင့် စစ်လေယာဉ်တွေဟာ အဲဒီလို ဇုန်ထဲကို ဝင်မယ်ဆိုရင် သက်ဆိုင်ရာနိုင်ငံကို ကြိုတင်အကြောင်းကြားလေ့ရှိပေမယ့် နိုင်ငံတကာဥပဒေအရတော့ မဖြစ်မနေ အကြောင်းကြားရမယ်လို့ သတ်မှတ်ထားတာ မရှိပါဘူး။
ဒီဖြစ်စဉ်နဲ့ပတ်သက်ပြီး တရုတ်နဲ့ ရုရှားဘက်ကတော့ လက်ရှိအချိန်အထိ တရားဝင် မှတ်ချက်တစ်စုံတစ်ရာ မပေးသေးပါဘူး။
အလားတူဖြစ်ရပ်မျိုးဟာ ၂၀၂၅ ခုနှစ် ဒီဇင်ဘာလကလည်း ဖြစ်ပွားခဲ့ဖူးပြီး အဲဒီအချိန်မှာ တရုတ်နဲ့ ရုရှား စစ်လေယာဉ် ၉ စင်းဟာ လေကြောင်းသတ်မှတ်ဇုန်ထဲကို ဝင်ရောက်ခဲ့တာကြောင့် တောင်ကိုရီးယားနဲ့ ဂျပန်နှစ်နိုင်ငံစလုံးက ပြင်းပြင်းထန်ထန် ကန့်ကွက်ခဲ့ကြပါတယ်။
အဲဒီအချိန်တုန်းက တောင်ကိုရီးယား ကာကွယ်ရေးဝန်ကြီးဌာနက ပေကျင်းနဲ့ မော်စကိုအစိုးရတွေထံ တရားဝင် ကန့်ကွက်စာပေးပို့ခဲ့ပြီး ဂျပန်ကလည်း နိုင်ငံလုံခြုံရေးအတွက် အထူးစိုးရိမ်ကြောင်း ထုတ်ဖော်ပြောဆိုခဲ့ပါတယ်။
တရုတ်နဲ့ ရုရှားတို့ကတော့ အဲဒီပျံသန်းမှုတွေဟာ အရှေ့ပင်လယ်နဲ့ အနောက်ပစိဖိတ်ဒေသအတွင်း ပူးတွဲကင်းလှည့် လေ့ကျင့်ရေးအစီအစဉ်ရဲ့ တစ်စိတ်တစ်ပိုင်းသာ ဖြစ်တယ်လို့ ရှင်းလင်းခဲ့ပါတယ်။
Ref:AFP