လန်ဒန်၊ မေ ၂၇
ဒေါ်အောင်ဆန်းစုကြည် သက်ရှိထင်ရှား ရှိနေသေးကြောင်း သက်သေပြပေးဖို့ လန်ဒန်မြို့ရှိ မြန်မာ စစ်အုပ်စုရဲ့ သံရုံးရှေ့မှာ ၂၄ နာရီကြာ အစာငတ်ခံ ဆန္ဒပြမှာ ဖြစ်ကြောင်း ဗြိတိန် နိုင်ငံရှိ မြန်မာ အသိုင်းအဝိုင်းက ကြေညာလိုက်ပါတယ်။
ဇွန် ၁၈ ရက် ပြုလုပ်ဖို့ စီစဉ်ထားတဲ့ အစာငတ်ခံ ဆန္ဒပြပွဲက မြန်မာနိုင်ငံမှာ ဖမ်းဆီးခံထားရတဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည်ရဲ့ ၈၁ နှစ်မြောက် မွေးနေ့ မတိုင်ခင် သူသက်ရှိ ထင်ရှား ရှိနေသေးကြောင်း သက်သေပြပေးရေး တောင်းဆိုဖို့ ရည်ရွယ်တာ ဖြစ်ပါတယ်။
အစာငတ်ခံ ဆန္ဒပြပွဲကို ဇွန် ၁၈ ရက် မွန်းလွဲ ၃ နာရီမှာ စတင်မှာ ဖြစ်ပြီး ဒေါ်အောင်ဆန်းစုကြည်ရဲ့ မွေးနေ့ ဇွန် ၁၉ ရက် မွန်းလွဲ ၃ နာရီမှာ အဆုံးသတ်မှာဖြစ်ပါတယ်။
ဆန္ဒပြပွဲ စီစဉ်သူတွေက သံရုံး အပြင်ဖက်မှာ ပါဝင်သူ အားလုံးအတွက် သောက်ရေနဲ့ အမိုးအကာ စီစဉ်ပေးသွားမယ်လို့ အတည်ပြုထားပေမယ့် ပါဝင်မယ့် ဆန္ဒပြသူ အရေအတွက်ကိုတော့ ဖော်ပြမထားပါဘူး။
မြန်မာပြည်သူတွေရဲ့ ဆန္ဒနဲ့ စိုးရိမ်မှုတွေကို နိုင်ငံတကာ အသိုင်းအဝိုင်းက ပိုမို သတိထားမိလာစေဖို့ ရည်ရွယ်ပြီး အခုလို လုပ်ဆောင်တာ ဖြစ်ပါတယ်။
ဒေါ်အောင်ဆန်းစုကြည်နဲ့ ပတ်သက်လို့ ပြည်သူတွေ ဘယ်လောက် စိုးရိမ်ကြောင်း ရည်ရွယ်ပါတယ်လို့ အဲဒီ အစာငတ်ခံ ဆန္ဒပြပွဲမှာ ပါဝင်ဖို့ စီစဉ်ထားတဲ့ ဗြိတိန်နိုင်ငံရှိ မြန်မာနိုင်ငံသား တစ်ဦးက ပြောပါတယ်။
ဒီလို တောင်းဆိုမှုကတဆင့် ကမ္ဘာတဝှမ်းရှိ အစိုးရအဖွဲ့တွေ အရေးယူဆောင်ရွက်ပေးဖို့ တောင်းဆိုတဲ့ စာတွေလည်း ပေးပို့သွားမှာ ဖြစ်ကြောင်း သူက ပြောပါတယ်။
အဲဒီ ဆန္ဒပြပွဲကို တကမ္ဘာလုံး ပြုလုပ်နေတဲ့ အသက်ရှင်နေသေးကြောင်း သက်သေပြပေးဖို့ တောင်းဆိုမှုနဲ့ အညီ ပြုလုပ်တာ ဖြစ်ပါတယ်။
အဲဒီ ကမ်ပိန်းကို ဒေါ်အောင်ဆန်းစုကြည်ရဲ့ သား ကင်မ်အဲရစ်က ဧပြီလအတွင်း စတင်ခဲ့တာ ဖြစ်ပါတယ်။
ဒေါ်အောင်ဆန်းစုကြည်ကို ပြန်လွှတ်ပေးဖို့ နိုင်ငံတကာ တောင်းဆိုမှုတွေ အများကြီး ရှိနေပေမယ့် စစ်ခေါင်းဆောင်တွေက နေအိမ် အကျယ်ချုပ် ပြောင်းရွှေ့ချထားတယ်လို့ပဲ ပြောပြီး သက်ရှိ ထင်ရှား ရှိနေသေးကြောင်း သက်သေပြဖို့ ငြင်းဆန်နေသလို ဘယ်နေရာမှာ ဖမ်းဆီးထားတယ်ဆိုတာကိုတောင် ထုတ်မပြောပါဘူး။
Ref:DVB