မော်လမြိုင်၊ မေ ၂၆
မွန်ပြည်နယ်မှာ အာဏာသိမ်း စစ်တပ် ဖွင့်လှစ်ခဲ့တဲ့ ပြည်သူ့စစ်မှုထမ်း အပတ်စဉ် ၂၅ အတွက် လူငယ် ၂၀၀ ကျော် စစ်မှုထမ်းတပ်သား ထပ်မံစုဆောင်းခံလိုက်ရတယ်လို့ စစ်တပ်နဲ့နီးစပ်သူတွေထံကနေ သိရပါတယ်။
စစ်မှုထမ်း တပ်သား စုဆောင်းခံလိုက်ရတဲ့ လူငယ်တွေကို ပြီးခဲ့တဲ့ မေ ၂၃ ရက်နေ့မှာ စစ်အစိုးရရဲ့ မွန်ပြည်နယ် အစိုးရအဖွဲ့က သွားရောက်တွေ့ဆုံပြီး ထောက်ပံ့ငွေတွေ ပေးအပ်ခဲ့တာပါ။
စစ်မှုထမ်း တပ်သားစုဆောင်းခံရသူတွေဟာ လမ်းမှာ ပေါ်တာဆွဲခံရတာ၊ နေအိမ်တွေအထိ ဝင်ရောက်ဖမ်းဆီးခံရတာ၊ ဒေသန္တရအမိန့် ဖောက်ဖျက်မှု စွပ်စွဲချက်တွေနဲ့ ဖမ်းဆီးခံရပြီးနောက် စစ်မှုထမ်း တပ်သားစုဆောင်းခံခဲ့ရပါတယ်။
ဒါ့အပြင် စစ်တပ်နဲ့ ရဲတပ်ဖွဲ့ဝင်တွေဟာ အကြောင်းပြချက် အမျိုးမျိုးနဲ့ ဖမ်းဆီးထားတဲ့ လူငယ်တွေကို သက်ဆိုင်ရာ ရပ်ကွက်ကျေးရွာအုပ်ချုပ်ရေးမှူးတွေထံ တစ်ဦးလျှင် ကျပ် သိန်း ၅၀ ကနေ သိန်း ၈၀ နဲ့ ပြန်လည်ရောင်းစားတာတွေ ကျူးလွန်ထားပါတယ်။
သံလွင်တိုင်းမ်က ပြုစုထားတဲ့ အချက်အလက်တွေအရ မွန်ပြည်နယ်မှာ အာဏာသိမ်း စစ်တပ် လစဉ်ဖွင့်လှစ်နေတဲ့ စစ်မှုထမ်း အပတ်စဉ် ၁ ကနေ အပတ်စဉ် ၂၅ အထိ စစ်မှုထမ်း တပ်သား စုဆောင်းခံရသူ ၅၂၀၀ ထက်မနည်း ရှိလာခဲ့ပါတယ်။
တဖက်မှာလည်း စစ်အစိုးရက စစ်မှုထမ်းအကျုံးဝင်သူတွေကို အလှည့်ကျစနစ်နဲ့ ဆင့်ခေါ်နိုင်ရေး စာရင်းပြုစု မှတ်ပုံတင်ထားဖို့ ပြီးခဲ့တဲ့ မေ ၁၄ ရက်နေ့က ပြုလုပ်တဲ့ အစည်းအဝေးမှာ ညွှန်ကြားထားပါတယ်။
သတင်း – သံလွင်တိုင်းမ်
ဓာတ်ပုံ-MOI