ဖရန့်ဖက်၊ နိုဝင်ဘာ ၂
ဖရန့်ဖက်မြို့မှာ ရဲတပ်ဖွဲ့ဝင် ၁၀၀ ကျော်လောက် ဒဏ်ရာရရှိခဲ့ပြီး စတိုးဆိုင်တွေကို ဖျက်ဆီးခဲ့တဲ့ လုယက်သူတွေ၊ အဓိကရုဏ်း ဆင်နွှဲသူတွေကို ပြင်းပြင်းထန်ထန် ပြစ်ဒဏ်တွေ ချမှတ်သွားမှာ ဖြစ်ကြောင်း ဂျာမနီ အစိုးရဝန်ကြီးတွေက ခြိမ်းခြောက်လိုက်ပါတယ်။
ပိုမိုကျယ်ပြန့်တဲ့ အကြမ်းဖက်မှုတွေကို ကာကွယ်ဖို့ လုံခြုံရေးတပ်ဖွဲ့တွေရဲ့ဆောင်ရွက်ပုံကို ဝန်ကြီးတွေက ချီးကျူးခဲ့ပါတယ်။
Gen Z regelt လို့ခေါ်တဲ့ တက်ကြွလှုပ်ရှားသူများအဖွဲ့ဦးဆောင်တဲ့ ဆန္ဒပြပွဲတွေအတွင်း ဂျာမနီ မြို့ဒါဇင်ပေါင်းများစွာမှာ ပညာရေးစနစ် ပိုမို ကောင်းမွန်ရေး စားဝတ်နေရေး ကုန်ကျစရိတ် လျော့ကျရေး လူထောင်ပေါင်းများစွာ ဆန္ဒပြတောင်းဆိုပြီးနောက် ဖရန့်ဖက်မြို့ဟာ အဓိက ပြဿနာ ဖြစ်ပေါ်တဲ့ မြို့ ဖြစ်လာပါတယ်။
ဘဏ္ဍာရေးဆိုင်ရာ စုရပ်ဖြစ်တဲ့ ဖရန့်ဖက်မြို့မှာ ခေါင်းစွပ်တွေ ဝတ်ထားတဲ့ အဓိကရုဏ်း ဆင်နွှဲသူတွေက စတိုးဆိုင် ၁၇ ဆိုင်ကို ဖျက်ဆီးခဲ့ပြီး အဲဒီ ဆိုင်တွေထဲက ၅ ဆိုင်ကို လုယက်ခဲ့ကြတယ်လို့ ဟက်ဆီပြည်နယ် ပြည်ထဲရေးဝန်ကြီး ရိုမန် ပိုဆက်က ပြောပါတယ်။
ရဲ တပ်ဖွဲ့ဝင် ၁၃၀၀ ချထားခဲ့ပြီး ပဋိပက္ခတွေအတွင်း တပ်ဖွဲ့ဝင် ၁၀၀ ကျော် ဒဏ်ရာရရှိခဲ့တယ်လို့ ဝန်ကြီး ရိုမန်က ပြောပါတယ်။
ရဲတပ်ဖွဲ့က အသက် ၁၃ နှစ်နဲ့ ၂၉ နှစ်အရွယ်ကြား လူ ၅၄ ဦးကို ဖမ်းဆီးခဲ့ပါတယ်။
မိမိမြင်တွေ့ခဲ့ရတဲ့ အခြေအနေတွေကြောင့် ထိတ်လန့်သွားခဲ့ရပြီး အဲဒီလို အခြေအနေကို အကောင်းမြင်စရာ မရှိတာကြောင့် အခုလို အခြေအနေတွေ ဖြစ်ပွားလို့ မရကြောင်း မိမိအနေနဲ့ ရှင်းရှင်းလင်းလင်း ပြောချင်ကြောင်း သူက ပြောပါတယ်။
ဖမ်းဆီးခံရသူ အများစုဟာ ဂျာမနီ နိုင်ငံသားတွေ ဖြစ်ပြီး အနှောင့်အယှက် ဖြစ်အောင်လုပ်တဲ့ ဖြစ်ရပ်တွေမှာ ပါဝင်သူတွေ အများကြီးဟာ ရွှေ့ပြောင်းနေထိုင်တဲ့ နောက်ကြောင်း ရာဇဝင်ရှိသူတွေ ဖြစ်ကြောင်း ဝန်ကြီး ရိုမန်က ရဲတပ်ဖွဲ့ရဲ့ သတင်းအချက်အလက်တွေကို ကိုးကားပြီး ပြောပါတယ်။
ဆန္ဒပြသူတွေက ရဲတပ်ဖွဲ့ဝင်တွေကို ဓာတ်ဆီဗုံးများနဲ့ ပစ်ပေါက်ခဲ့ကြောင်းလည်း သိရပါတယ်။
အရေးပေါ် ဌာနတွေကို ရေဘူးတွေ၊ ကျောက်ခဲတွေ၊ ဓာတ်ဆီ ဗုံးတွေနဲ့ ပစ်ပေါက်ခဲ့ပြီး ပြတင်းပေါက်တွေကို ရိုက်ခွဲတာတွေ အပါအဝင် အကြမ်းဖက် နှောင့်ယှက်မှုတွေ ပြုလုပ်ခဲ့တယ်လို့ ဖရန့်ဖက် ရဲတပ်ဖွဲ့က ပြောပါတယ်။
ပြစ်မှု ကျူးလွန်သူတွေကို စစ်ဆေးဖော်ထုတ်ပြီး တာဝန်ခံခိုင်းမှာ ဖြစ်ကြောင်း ဂျာမနီ ပြည်ထဲရေးဝန်ကြီး အလက်ဇန်းဒါး ဒိုဘရန့်က ဆိုပါတယ်။
လက်ဝဲယိမ်း အစွန်းရောက်တွေနဲ့အတူ ရွှေ့ပြောင်းနေထိုင်သူ အသိုင်းအဝိုင်းက ပြဿနာ ရှာနေတာ ဖြစ်တယ်လို့ ဝန်ကြီး အလက်ဇန်းဒါးက စွပ်စွဲထားပါတယ်။
ဒါပေမဲ့ ဆန္ဒပြပွဲတွေမှာ ဘယ်အဖွဲ့တွေ ပါဝင်ခဲ့သလဲဆိုတာကို သူက မပြောသလို သူ့ရဲ့ ပြောဆိုမှုအတွက် အထောက်အထား ဖော်ပြခဲ့တာလည်း မရှိပါဘူး။
အဓိကရုဏ်းတွေ ဖြစ်ပွားနေချိန်ကို ပြည်ပက အစွန်းရောက် အုပ်စုတွေ ဝင်ရောက် အသုံးမချစေရေး ဆန္ဒပြပွဲတွေမတိုင်ခင် နယ်စပ် ထိန်းချုပ်မှုကို တင်းကြပ်ထားခဲ့တယ်လို့လည်း ဝန်ကြီး အလက်ဇန်းဒါးက ပြောဆိုထားပါတယ်။
Ref:Reuters