မနီလာ၊ ဇွန် ၈
ဖိလစ်ပိုင်ရဲ့ အဓိက တောင်ပိုင်းကျွန်း မင်ဒါနာအိုရှိ ဂျန်နရယ် ဆန်းတို့စ် စီးတီးမြို့ ကမ်းရိုးတန်းအလွန်မှာ ဇွန် ၈ ရက် ဒေသစံတော်ချိန် မနက် ၇ နာရီ ၃၇ မိနစ်က မဂ္ဂနီကျု့ဒ် ၇ ဒသမ ၈ အဆင့်ရှိ အားပြင်းတဲ့ ငလျင်လှုပ်ခတ်မှု ဖြစ်ပွားခဲ့ပါတယ်။
အနည်းဆုံး လူတစ်ဦး သေဆုံးတယ်လို့ ရဲတပ်ဖွဲ့က AFP သတင်းဌာနသို့ ပြောကြားပြီး တခြား ၄ ဦး ဒဏ်ရာရရှိခဲ့တယ်လို့ သိရပါတယ်။
ဖိလစ်ပိုင်၊ အင်ဒိုနီးရှားနဲ့ ဂျပန် အပါအဝင် ဒေသတွင်း နိုင်ငံ တချို့မှာ ဆူနာမီ သတိပေးချက်တွေ ထုတ်ပြန်ခဲ့ကြ ပါတယ်။
ငလျင်ဟာ ၁၀ ကီလိုမီတာ အနက်မှာ ဗဟိုပြု လှုပ်ခတ်ခဲ့တာ ဖြစ်တယ်လို့ ဖိလစ်ပိုင် မီးတောင်နဲ့ ငလျင် အင်စတီကျုက ပြောကြားပါတယ်။
သက်ဆိုင်ရာ အစိုးရ အေဂျင်စီတွေ အားလုံး ချက်ချင်း အရေးယူဆောင်ရွက်ကြဖို့ ဖိလစ်ပိုင် သမ္မတ မားကို့စ် ဂျူနီယာက ညွှန်ကြားထားပြီး လူတွေ ကုန်မြင့်ပိုင်းသို့ ပြောင်းရွှေ့ကြဖို့ တိုက်တွန်းထားပါတယ်။
ငလျင်လှုပ်ပြီးနောက် ဂျန်နရယ် ဆန်းတို့စ် စီးတီးမြို့ လေဆိပ်မှာ ဘေးကင်းရေး လေ့လာစစ်ဆေးဖို့အတွက် လုပ်ငန်းစဉ်တွေကို ရပ်ဆိုင်းထားခဲ့တယ်လို့ ဖိလစ်ပိုင် အရပ်ဖက် လေကြောင်းပျံသန်းရေး အာဏာပိုင် အဖွဲ့က ပြောပါတယ်။
မင်ဒါနာအိုရှိ တခြားလေဆိပ်တွေမှာ လုပ်ငန်းစဉ်တွေ ပုံမှန်လည်ပတ်နေဆဲ ဖြစ်တယ်လို့ ပို့ဆောင်ရေးဝန်ကြီးဌာနက ပြောပါတယ်။
ဖိလစ်ပိုင်မှာ ငလျင်လှုပ်ပြီးနောက် သြစတြေးလျက ဆူနာမီ စောင့်ကြည့်ခဲ့ပေမယ့် နောက်ပိုင်းမှာ ရပ်ဆိုင်းခဲ့ပါတယ်။
ဖိလစ်ပိုင် ကြက်ခြေနီအဖွဲ့ကို အမြင့်မားဆုံး အဆင့် တပ်လှန့်ထားပြီး မြေပြင်သို့ စေလွှတ်ထားပါတယ်။
ဖိလစ်ပိုင်ရဲ့ တူနာငါးမြို့တော်လို့ တင်စားခံရတဲ့ ဂျန်နရယ် ဆန်းတို့စ်မြို့ဟာ ငလျင်ကြောင့် အများဆုံး ထိခိုက်ခဲ့ရပါတယ်။
ဒီမြို့ဟာ ကမ္ဘာ့ လက်ဝှေ့ချန်ပီယံ၊ လွှတ်တော်အမတ် မန်နီ ပက်ကွီယိုရဲ့ မွေးရပ်မြို့လည်း ဖြစ်ပါတယ်။
အဲဒီလို ငလျင်လှုပ်ခတ်ပြီးနောက် နောက်ဆက်တွဲ ငလျင်လှိုင်းတွေလည်း လှုပ်ခတ်ခဲ့ပြီး အင်အား ၁ ဒသမ ၃ အဆင့်ကနေ ၆ ဒသမ ၇ အဆင့်အထိ ရှိတဲ့ နောက်ဆက်တွဲ ငလျင်လှိုင်း ၁၆ ခု လှုပ်ခတ်ခဲ့တယ်လို့ ဖိလစ်ပိုင်မီးတောင်နဲ့ ငလျင် အင်စတီကျုက ထုတ်ပြန်ပါတယ်။
လူမှုမီဒီယာပေါ်မှာ တင်ထားတဲ့ ဗီဒီယိုတွေနဲ့ ဓာတ်ပုံတွေမှာ ဂျန်နရယ် ဆန်းတို့စ်မြို့ရှိ ပျက်စီးသွားတဲ့ အဆောက်အဦတွေကို မြင်တွေ့ရပါတယ်။
ပြိုကျသွားတဲ့ အဆောက်အဦတွေထဲမှာ လူတွေ ပိတ်မိနေနိုင်တာကြောင့် ကယ်ဆယ်ရေး သမားတွေ လိုက်လံ ရှာဖွေနေကြပါတယ်။
စောစောပိုင်းမှာ လျှပ်စစ်ဓာတ်အား ပြတ်တောက်သွားခဲ့ပြီး နောက်ပိုင်းမှာ ပြန်ရခဲ့တယ်လို့ ဒေသခံတွေက ပြောပါတယ်။
ဒါပေမယ့် အင်တာနက်လိုင်းတွေ ပြတ်တောက်မှု မရှိတာကြောင့် လူမှုမီဒီယာပေါ်မှာ ငလျင် လှုပ်ခတ်မှုကြောင့် ပျက်စီးသွားပုံတွေကို ဒေသခံတွေ ဝေမျှ နေကြပါတယ်။
အင်ဒိုနီးရှား ကမ်းရိုးတန်းတလျှောက်က နေရာ သုံးနေရာမှာ ဆူနာမီလှိုင်းတွေ ဖြစ်ပေါ်ခဲ့တယ်လို့ သိရပြီး ဂျပန်က ၁ မီတာအထိ မြင့်တဲ့ ဆူနာမီလှိုင်းတွေ အိုကီနာဝါကျွန်းတွေကို ရိုက်ခတ်လာနိုင်တယ်လို့ သတိပေးချက် ထုတ်ပြန်ခဲ့ပေမယ့် နောက်ပိုင်းမှာ ပြန်ရုတ်သိမ်းခဲ့ ပါတယ်။
Ref:BBC