ရေး၊ မေ ၁၄
မွန်ပြည်နယ် ရေးမြို့နယ် လမိုင်းမြို့ပေါ်မှာ အမှတ် ၁၀၆ ခြေလျင်တပ်ရင်းက ဒုတပ်ရင်းမှူး ဗိုလ်မှူး ထွန်းရာကျော် ပစ်သတ်ခံရပြီးနောက် အစစ်ဆေးကြမ်းနေတယ်လို့ မြို့ခံတွေက သံလွင်တိုင်းမ်ကို ပြောပါတယ်။
ပြီးခဲ့တဲ့ မေ ၁၁ ရက်နေ့က လမိုင်းမြို့ပေါ်မှာ တပည့်တွေနဲ့အတူ အသုပ်လာဝယ်တဲ့ ဒုတပ်ရင်းမှူး ဗိုလ်မှူး ထွန်းရာကျော်ကို ရေးဘီလူးအဖွဲ့က သေနတ်နဲ့ အနီးကပ် ပစ်သတ်သွားခဲ့တာ ဖြစ်ပါတယ်။
ဒုတပ်ရင်းမှူး ပစ်သတ်ခံရပြီးနောက် စစ်ကော်မရှင်တပ်ဟာ မေ ၁၂ ရက်နေ့ကစလို့ လမိုင်းမြို့အဝင်အထွက်၊ ကော့ကဒွတ်ကျေးရွာအဆင်းလမ်းနဲ့ မြို့တွင်းမှာ ပိတ်ဆို့စစ်ဆေးမှုတွေ ဆက်တိုက်လုပ်ဆောင်နေပါတယ်။
စစ်ဆေးခံရသူတွေရဲ့ ပြောပြချက်အရ စစ်ကော်မရှင်တပ်ဟာ လမ်းသွားလမ်းလာ ကား၊ဆိုင်ကယ်တွေကို အသေးစိတ် စစ်ဆေးတာတွေ လုပ်ဆောင်နေပြီး သွားရောက်မယ့် နေရာတွေကအစ မေးမြန်းတာတွေ ရှိနေပါတယ်။
စစ်ကော်မရှင်တပ်ရဲ့ ပိတ်ဆို့စစ်ဆေးမှုတွေကြောင့် ဒေသခံပြည်သူတွေဟာ သွားရေးလာရေး အခက်ကြုံနေရသလို လူငယ်အများစုကလည်း စစ်မှုထမ်း ပေါ်တာဆွဲခံရမှာကို စိုးရိမ်နေကြပါတယ်။
ပစ်သတ်ခံရတဲ့ ဗိုလ်မှူး ထွန်းရာကျော်ဟာ ဒုတိယဗိုလ်မှူးကြီး ရာထူးတိုးပြီး ရေးကနေ တာချီလိတ်ကို တပ်ရင်းမှူးအနေနဲ့ မေ ၁၅ ရက်နေ့မှာ ပြောင်းရွှေ့ရမယ်လို့ တပ်တွင်းသတင်းရင်းမြစ်တွေထံက သိရပါတယ်။
ဗိုလ်မှူး ထွန်းရာကျော် ပစ်သတ်ခံရမှုဟာ ရေးမြို့နယ်မှာ အာဏာသိမ်းကာလအတွင်း စစ်တပ်မှာ ဒုတပ်ရင်းမှူးအဆင့်ရှိတဲ့ အရာရှိတစ်ဦး ပထမဆုံးအကြိမ် လုပ်ကြံသတ်ဖြတ်ခံရမှုလည်း ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-CJ