မြန်မာနဲ့ထိုင်း သဘာဝ ဓာတ်ငွေ့ပိုက်လိုင်း လုံခြုံရေးနဲ့ ထုတ်လုပ်မှု တိုးမြှင့်မယ်

နေပြည်တော်၊ ဘန်ကောက်၊ မေ ၁၃

နှစ်နိုင်ငံဖက်စပ် သဘာဝဓာတ်ငွေ့ ပိုက်လိုင်း တလျှောက် လုံခြုံရေး တိုးမြှင့်ရေးနဲ့ အဓိက ကမ်းလွန် လုပ်ကွက်တွေမှာ ထုတ်လုပ်မှု လျော့ကျလာမှုကို တုံ့ပြန်ရေး နောက်ထပ် တူးဖော်နိုင်မယ့် နည်းလမ်းများ ရှာဖွေရေး မြန်မာနဲ့ ထိုင်းတို့ သဘောတူထားကြောင်း အရာရှိတွေက ပြောပါတယ်။

လျှပ်စစ်နဲ့စွမ်းအင် ပြည်ထောင်စုဝန်ကြီး ဦးကိုကိုလွင်နဲ့ ထိုင်း PTTEP International Limited အမှုဆောင် အရာရှိချုပ်တို့ကြား မေ ၈ ရက်က နေပြည်တော်မှာ ဆွေးနွေးခဲ့ပြီးနောက် အခုလို ကြေညာချက် ထွက်ပေါ်လာတာ ဖြစ်ပါတယ်။

အဓိက ဆွေးနွေးခဲ့တာကတော့ မြန်မာ သဘာဝဓာတ်ငွေ့ လုပ်ကွက်တွေနဲ့ ထိုင်းသို့ ချိတ်ဆက်ထားတဲ့ အရေးကြီးတဲ့ ပိုက်လိုင်းတွေရဲ့ လုံခြုံရေး အခြေအနေပဲ ဖြစ်ပါတယ်။

ဒေသတွင်း စွမ်းအင်ပို့ဆောင်ရေး လမ်းကြောင်းတွေဟာ တည်ငြိမ်မှုဆိုင်ရာ အန္တရာယ်တွေနဲ့ ရင်ဆိုင်နေရပြီး အနှောင့်အယှက်မရှိ ထောက်ပံ့နိုင်ရေး ပူးတွဲလုံခြုံရေး အစီအစဉ်တွေ ဦးစားပေးဆောင်ရွက်ဖို့ နှစ်နိုင်ငံစလုံးက ဆောင်ရွက်ခဲ့ရပါတယ်။

ကပ္ပလီပင်လယ်ရှိ အရေးပါတဲ့ သဘာဝဓာတ်ငွေ့ လုပ်ကွက် တစ်ခု ဖြစ်တဲ့ ရတနာစီမံကိန်းက လျော့ကျလာနေတဲ့ ထုတ်လုပ်မှုကို ရပ်တန့်ရေးလည်း နှစ်နိုင်ငံ ဆွေးနွေးခဲ့ကြပါတယ်။

အဲဒီ နေရာမှာ နောက်ထပ် နေရာ အသစ်တွေ တူးဖော်နိုင်မယ့် နည်းပညာဆိုင်ရာ ရွေးချယ်စရာတွေနဲ့ ပတ်သက်လို့လည်း နှစ်နိုင်ငံ အရာရှိတွေ ဆွေးနွေးခဲ့ကြပါတယ်။

အဲဒီ သဘာဝဓာတ်ငွေ့ လုပ်ကွက်ကနေ မြန်မာနိုင်ငံရဲ့ ပြည်တွင်း ဓာတ်အားပေးရေးနဲ့ ထိုင်းနိုင်ငံရဲ့ စွမ်းအင် ကဏ္ဍနှစ်ခုစလုံးကို ဓာတ်ငွေ့ ထောက်ပံ့ပေးနေတာ ဖြစ်ပါတယ်။

အောင်သင်္ခစီမံကိန်း ဖော်ဆောင်နေမှုကိုလည်း ထိုင်းနဲ့ မြန်မာ ကိုယ်စားလှယ်တွေ ပြန်လည် သုံးသပ်ခဲ့ကြပါတယ်။

ဒီနေရာကို ဖော်ဆောင်နိုင်မယ်ဆိုရင် လျှပ်စစ်ဓာတ်အား ပြတ်တောက်မှုတွေနဲ့ ရင်ဆိုင်နေရတဲ့ မြန်မာ ပြည်တွင်း ဓာတ်အားပေးစနစ်အတွက် အများကြီး အထောက်အကူ ဖြစ်မယ်လို့ အများက ရှုမြင်ထားကြပါတယ်။

ပိုက်လိုင်းလုံခြုံရေးနဲ့ သဘာဝဓာတ်ငွေ့ တူးဖော်ရေးအပြင် ထိုင်းနဲ့ မြန်မာကြား ရေနက်ပိုင်း ကမ်းလွန်စီမံကိန်းတွေမှာ ရေရှည်ရင်းနှီးမြှုပ်နှံနိုင်မယ့် အလားအလာတွေနဲ့ ပတ်သက်လို့လည်း ဆွေးနွေးခဲ့ကြပါတယ်။

ထိုင်း နိုင်ငံခြားရေးဝန်ကြီးက စွမ်းအင်နဲ့ ပိုက်လိုင်းလုံခြုံရေး ကိစ္စကို မြန်မာ အာဏာပိုင်တွေဆီ တင်ပြခဲ့ပြီးနောက် အခုလို တွေ့ဆုံဆွေးနွေးမှု ထွက်ပေါ်လာတာ ဖြစ်ပါတယ်။

အဲဒီ တွေ့ဆုံဆွေးနွေးပွဲသို့ ဝန်ကြီးဌာန အမြဲတန်း အတွင်းဝန်၊ ညွှန်ကြားရေးမှူးချုပ်၊ သက်ဆိုင်ရာ ဌာနတွေက စီမံခန့်ခွဲရေး ညွှန်ကြားရေးမှူးတွေ၊ ထိုင်းအစိုးရပိုင် ရေနံနဲ့သဘာဝ ဓာတ်ငွေ့ စူးစမ်းရှာဖွေရေး PTTEP ကုမ္ပဏီ အမှုဆောင်အရာရှိတွေလည်း တက်ရောက်ခဲ့ကြပါတယ်။

မြန်မာမှာ ပြည်တွင်းစစ်နဲ့အတူ နိုင်ငံရေး အခြေအနေ မတည်ငြိမ် ဖြစ်နေချိန်မှာ အိမ်နီးချင်း တရုတ်၊ အိန္ဒိယနဲ့ ထိုင်းအပါအဝင် ပြည်ပနိုင်ငံတွေက စွမ်းအင်နဲ့ သဘာဝရင်းမြစ်တွေ ပိုမိုရရှိဖို့ အရှိန်မြှင့် ကြိုးပမ်းလာကြတာ တွေ့ရပါတယ်။

ဒီအတောအတွင်း မြန်မာကို အာဆီယံနဲ့ ပြန်လည် စေ့စပ်နိုင်ရေး ထိုင်းက ကူညီပေးပြီး မြန်မာက သဘာဝဓာတ်ငွေ့တွေ ပိုမို ပို့ဆောင်ပေးဖို့ သဘောတူထားတယ်ဆိုတဲ့ ဝေဖန်မှုတွေ ထွက်ပေါ်နေပါတယ်။

Source: The Nation