ကျိုက်ထို၊ စက်တင်ဘာ ၁၁
မွန်ပြည်နယ် ကျိုက်ထိုမြို့နယ် ငှက်ပျောတောကျေးရွာမှာရှိတဲ့ ရွှေတွင်းလုပ်ကွက် ခြောက်ခုကို စစ်တပ်က ဝင်ရောက်စီးနင်းပြီးနောက် လုပ်သား ၅၀ ကျော်ကို ဖမ်းဆီးသွားတယ်လို့ ဒေသခံတွေက သံလွင်တိုင်းမ်ကို ပြောပါတယ်။
အင်အား ၁၀၀ ကျော်ပါတဲ့ စစ်ကော်မရှင်တပ်ဟာ စက်တင်ဘာ ၉ ရက်နေ့ မနက် ၁၀ နာရီအချိန်ခန့်မှာ ငှက်ပျောတောကျေးရွာက ဂျစ်တူး၊ အငယ်ကောင်၊ သိန်းရွှေ၊ ဦးဖြူလေး၊ ကောင်းထက်ဇော်နာမည်ရှိ ရွှေလုပ်ကွက် ခြောက်ခုကို ဝင်ရောက်စီးနင်းခဲ့တာပါ။
အဲဒီစီးနင်းမှုအတွင်း ရွှေလုပ်သားတွေအပြင် ဘတ်ဟိုး နှစ်စီး၊ ဆိုင်ကယ် ၁၀ စီးနဲ့ လုပ်ငန်းသုံး ဆက် စပ်ပစ္စည်းတွေကို သိမ်းဆည်းသွားသလို ရွှေလုပ်သားတွေကိုတော့ ကင်မွန်းချောင်းရဲစခန်းမှာ ယာယီထိန်းသိမ်ထားတယ်လို့ စုံစမ်းသိရှိရပါတယ်။
ရွှေတွင်းတွေကို ဝင်ရောက်ဖမ်းဆီးတာဟာ ရွှေတွင်းလုပ်ငန်းရှင်တွေက စစ်ကော်မရှင်ထံ အခွန်မဆောင်ဘဲ ကရင်အမျိုးသားအစည်းအရုံး KNU တပ်မဟာ(၁) သထုံခရိုင်ဘက်ကို အခွန်ဆောင်ပြီး ရွှေတူးနေတာကြောင့် ဖြစ်နိုင်တယ်လို့ ဒေသခံတွေက ဆိုကြပါတယ်။
ကျိုက်ထိုမြို့နယ်နဲ့ဘီးလင်းမြို့နယ်တို့မှာ ရွှေတွင်းလုပ်ကွက်ပေါင်း ၃၀၀ ထက်မနည်းရှိပြီး စစ်ကော် မရှင်ထံ အခွန်ဆောင်တဲ့ လုပ်ကွက်ရှိသလို KNU ဘက်ကို အခွန်ဆောင်ပြီး လုပ်ကိုင်နေတဲ့ ရွှေလုပ်ကွက်တွေလည်း ရှိနေပါတယ်။
ပြီးခဲ့တဲ့နှစ် အောက်တိုဘာ ၃၀ ရက်နေ့ကလည်း ကျိုက်ထိုမြို့နယ် မဲရုံးလေးနဲ့မဲရုံးကြီးကျေးရွာကြားမှာ စစ်တပ်စစ်ကြောင်းဝင်ရောက်ချိန် ရွှေတွင်းလုပ်သားနဲ့ခြံသမား ၃၀ နီးပါး ဖမ်းဆီးသွားတယ်လို့ ဒေသခံတွေထံက သိရပါတယ်။
သတင်း – သံလွင်တိုင်းမ်
ဓာတ်ပုံ-Social Media