ကွာလာလမ်ပူ အောက်တိုဘာ ၂၇
မလေးရှားနိုင်ငံကနေ မြန်မာနိုင်ငံကို ပြန်လည်ပို့ဆောင်ခဲ့တဲ့ မြန်မာနိုင်ငံသား ရာနဲ့ချီဟာ ရန်ကုန်မြို့မှာ စစ်တပ်ရဲ့ ဖမ်းဆီးထိန်းသိမ်းမှုကို ခံနေရတယ်ဆိုတဲ့ သတင်းတွေ ထွက်ပေါ်လာပြီးနောက် မလေးရှားအစိုးရက မြန်မာအာဏာပိုင်တွေထံ တရားဝင်ရှင်းလင်းချက် တောင်းခံသွားမယ်လို့ ပြောကြားလိုက်ပါတယ်။
မလေးရှား နိုင်ငံခြားရေးဝန်ကြီး မိုဟာမက် ဟာဆန်က အောက်တိုဘာ ၂၆ ရက်နေ့မှာ ပြုလုပ်တဲ့ မလေးရှား လွှတ်တော်အစည်းအဝေးအတွင်း အခုလို ပြောဆိုလိုက်တာပါ။
မလေးရှားက ပြန်ပို့ခဲ့တဲ့ မြန်မာနိုင်ငံသား ၃၀၀ ခန့်ဟာ လက်ရှိအချိန်အထိ စစ်တပ်ရဲ့ ဖမ်းဆီးထိန်းသိမ်းမှုကို ခံနေရတယ်ဆိုတဲ့ သတင်းတွေဟာ လွှတ်တော်အတွင်း မေးခွန်းထုတ်စရာ ဖြစ်လာခဲ့တာပါ။
ဒီကိစ္စနဲ့ပတ်သက်ပြီး မလေးရှားလွှတ်တော်အမတ် အာမက် တာမီဇီ ဆူလေမန်က ပြန်ပို့ခံရသူတွေထဲမှာ ရိုဟင်ဂျာနဲ့ ရခိုင်တိုင်းရင်းသားတွေ ပါဝင်နေကြောင်း၊ သူတို့ကို စစ်တပ်က ဖမ်းဆီးထိန်းသိမ်းထားတယ်ဆိုတဲ့ သတင်းတွေအပေါ် စစ်အစိုးရအနေနဲ့ ဘယ်လိုဆောင်ရွက်မလဲဆိုပြီး မေးမြန်းခဲ့ပါတယ်။
အဲဒီမေးခွန်းကို ပြန်လည်ဖြေကြားရာမှာ နိုင်ငံခြားရေးဝန်ကြီး မိုဟာမက် ဟာဆန်က မြန်မာနိုင်ငံမှာရှိတဲ့ မလေးရှားသံရုံးတာဝန်ခံကို ဒီသတင်းတွေနဲ့ပတ်သက်ပြီး စုံစမ်းစစ်ဆေးဖို့ ညွှန်ကြားသွားမယ်လို့ ပြောပါတယ်။
ဒါ့အပြင် ဖမ်းဆီးခံထားရတယ်ဆိုတဲ့ မြန်မာနိုင်ငံသားတွေရဲ့ လက်ရှိအခြေအနေကိုလည်း သိရှိနိုင်ဖို့ ကြိုးပမ်းသွားမှာ ဖြစ်ပါတယ်။
“လူ ၃၀၀ လောက် ဖမ်းဆီးထိန်းသိမ်းခံထားရတယ်ဆိုတဲ့ သတင်းတွေရှိရင် မြန်မာအစိုးရဆီက ရှင်းလင်းချက် တောင်းခံသွားမှာပါ။ ကျွန်တော်တို့ကို ပေးထားတဲ့ ကတိကဝတ်တွေကို လိုက်နာဖို့လည်း တောင်းဆိုသွားမှာ ဖြစ်ပါတယ်” လို့ သူက ပြောကြားခဲ့ပါတယ်။
ပြီးခဲ့တဲ့ စက်တင်ဘာ ၂၉ ရက်နေ့မှာ မလေးရှားအစိုးရဟာ နိုင်ငံအတွင်း လူဝင်မှုကြီးကြပ်ရေးဆိုင်ရာ အကြောင်းအမျိုးမျိုးကြောင့် ထိန်းသိမ်းခံထားရတဲ့ မြန်မာနိုင်ငံသား ၁,၄၇၆ ဦးကို မြန်မာစစ်ရေယာဉ် သုံးစီးနဲ့ ပြန်လည်ပို့ဆောင်ခဲ့ပါတယ်။
အဲဒီလူတွေဟာ အောက်တိုဘာ ၄ ရက်နေ့မှာ ရန်ကုန်မြို့ကို ရောက်ရှိခဲ့ကြတာဖြစ်ပြီး နောက်ပိုင်းမှာ ရခိုင်တိုင်းရင်းသား ၄၀၀ ကျော်ဟာ စစ်တပ်ရဲ့ ထိန်းသိမ်းမှုအောက်မှာ ဆက်လက်ရှိနေတယ်ဆိုတဲ့ သတင်းတွေ ထွက်ပေါ်လာခဲ့တာ ဖြစ်ပါတယ်။
မလေးရှားအစိုးရကတော့ ပြန်ပို့ခံရသူတွေဟာ သူတို့ရဲ့ဆန္ဒအလျောက် ပြန်လည်သွားရောက်ဖို့ သဘောတူထားကြသူတွေဖြစ်ပြီး မြန်မာဘက်ကလည်း ဘေးကင်းလုံခြုံစွာ ပြန်လည်လက်ခံမယ်လို့ ကတိပေးထားကြောင်း ရှင်းလင်းခဲ့ပါတယ်။
ဒါပေမဲ့ မြန်မာနိုင်ငံမှာ လက်နက်ကိုင်ပဋိပက္ခတွေ ဆက်လက်ဖြစ်ပွားနေတဲ့အတွက် နေရပ်ပြန်သူတွေရဲ့ လုံခြုံရေးကို အာမခံပေးနိုင်ခြင်းမရှိဘူးလို့ ကုလသမဂ္ဂနဲ့ လူ့အခွင့်အရေးအဖွဲ့အစည်းတွေက သတိပေးထားကြပါတယ်။
မလေးရှားအစိုးရဟာ မြန်မာနိုင်ငံသား စုစုပေါင်း ၅,၀၀၀ ကို ပြန်လည်ပို့ဆောင်ဖို့ စီစဉ်ထားတာဖြစ်ပြီး ပထမအသုတ် ၁,၄၇၆ ဦးကို ပြန်ပို့ပြီးနောက် ဒုတိယအသုတ်အဖြစ် နောက်ထပ် ၃,၅၂၄ ဦးကို ပြန်ပို့ဖို့ စီစဉ်ထားပါတယ်။
အခုလို ပထမအသုတ်က ပြန်ပို့ခံရသူတွေ စစ်တပ်ရဲ့ ဖမ်းဆီးထိန်းသိမ်းမှုကို ခံနေရတယ်ဆိုတဲ့ သတင်းတွေ ထွက်ပေါ်လာတာကြောင့် ကျန်ရှိနေတဲ့ မြန်မာနိုင်ငံသားတွေရဲ့ နေရပ်ပြန်ရေးအစီအစဉ်နဲ့ လုံခြုံရေးအပေါ်မှာလည်း မေးခွန်းထုတ်မှုတွေ ရှိလာနေပါတယ်။
လက်ရှိမှာတော့ မလေးရှားအစိုးရက မြန်မာအာဏာပိုင်တွေဆီက ရှင်းလင်းချက်တောင်းခံဖို့ ပြင်ဆင်နေပြီး ဖမ်းဆီးထိန်းသိမ်းခံထားရသူတွေရဲ့ အရေအတွက်နဲ့ အခြေအနေမှန်ကို သီးခြားအတည်ပြုနိုင်ခြင်း မရှိသေးပါဘူး။
Ref:AsiaNewsNetwork