မကွေး အောက်တိုဘာ ၂၈
မကွေးတိုင်း ပေါက်မြို့နယ်မှာ ဖမ်းဆီးထားရာကနေ ထွက်ပြေးသွားတဲ့ သုံ့ပန်းတွေနဲ့ ဦးဆောင်ထွက်ပြေးတဲ့ PDF ရဲဘော်တို့ကို ပြန်လည်ဖမ်းဆီးရမိတယ်လို့ ပေါက်အခြေစိုက် တော်လှန်ရေးရဲဘော်တစ်ဦးက သံလွင်တိုင်းမ်ကို ပြောပါတယ်။
စစ်သုံ့ပန်း ၁၃ ယောက်ကို ဦးဆောင်ပြီးထွက်ပြေးတဲ့ PDF ရဲဘော်ဖိုးသားနဲ့ သုံ့ပန်း ၁၃ ဦးထဲက ၈ ဦး တို့ကို ပြန်လည်ဖမ်းဆီးရမိခဲ့တာပါ။
“အကုန်လုံးကို ပိတ်ဆို့ထားနိုင်ခဲ့ပြီးတော့ ပစ်ခတ်ဖမ်းဆီးခဲ့ရတယ်။ ဖိုးသားကိုတော့ မနေ့ကမှ ဖမ်းမိတာ။ သူတို့က ကပစ ၂၄ ဘက်ကို ဦးတည်ပြီး ပြေးတယ်လို့ယူဆတယ်။” လို့ ဒေသတော်လှန်ရေး ရဲဘော်တစ်ဦးက သံလွင်တိုင်းမ်ကို ပြောပါတယ်။
စစ်သုံ့ပန်း ၈ ဦးကို အောက်တိုဘာလ ၂၃ ရက်မှာ ဖမ်းဆီးရမိခဲ့ပြီး ဖိုးသားကိုတော့ အောက်တိုဘာ ၂၆ ရက်မှာ ဖမ်းဆီးရမိခဲ့တာပါ။
ဖမ်းဆီးစဉ်အတွင်း ပစ်ခတ်မှု နှစ်ကြိမ်ဖြစ်ပွားခဲ့ပြီး စစ်သုံ့ပန်း တချို့သေဆုံးတယ်လို့ သိရပေမဲ့ သံလွင်တိုင်းမ်အနေနဲ့ သီးခြား အတည်မပြုနိုင်သေးပါဘူး။
ထွက်ပြေးသွားသူတွေထံကနေ သေနတ် ၁ လက် ပြန်လည်ရရှိခဲ့ပြီး လွတ်မြောက်နေသူတွေကိုလည်း ဆက်လက်ရှာဖွေနေကြဆဲဖြစ်တယ်လို့သိရပါတယ်။
အောက်တိုဘာ ၂၁ ရက် မနက် ၂ နာရီဝန်းကျင်မှာ PDF ရဲဘော်ဖိုးသားက စစ်သုံ့ပန်း ၁၃ ဦး ဓားစာခံ ၃ ဦးနဲ့အတူ လက်နက် ၄ လက် ကျည် ၂၀၀ ယူဆောင်ပြီး ထွက်ပြေးခဲ့တာဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-PDF