နေပြည်တော်၊ ၂၆
လာမယ့် မြန်မာ့ရိုးရာအတာသင်္ကြန်ပွဲတော်မှာ အလှပြယာဉ်၊ ရေပက်ခံကားတွေနဲ့ ရေပက်ကစားတာ မပြုလုပ်ကြဖို့ စီမံထားတယ်လို့ စစ်ကော်မရှင်က မတ်လ ၂၆ ရက်နေ့ ရက်စွဲနဲ့ အသိပေးထုတ်ပြန်ပါတယ်။
စစ်ကော်မရှင်ကတော့ ဒီနှစ် မြန်မာ့ရိုးရာအတာသင်္ကြန်ပွဲတော်မှာ လမ်းလျှောက်သင်္ကြန်ပွဲတော်တွေကို ဦးစားပေးဆောင်ရွက်သွားမှာဖြစ်တာကြောင့် ရေပက်ခံကားတွေနဲ့ ရေမကစားဖို့ အသိပေးလာတာပါ။
ဒီအစီအစဉ်ဟာ ပြီးခဲ့တဲ့ မတ်လ ၂၄ ရက်နေ့က နေပြည်တော် ပြုလုပ်တဲ့ အစည်းအဝေးအတွင်း စစ်ခေါင်းဆောင်က သင်္ကြန်ကာလအတွင်း စက်သုံးဆီသုံးစွဲမှု များပြားမှု မရှိစေရေးအတွက် နိုင်ငံတဝန်းမှာ လမ်းလျှောက်သင်္ကြန် ကျင်းပဖို့ ညွှန်ကြားချက်ကြောင့် ဖြစ်ပါတယ်။
စစ်ကော်မရှင်ကတော့ လမ်းလျှောက်သင်္ကြန်ပွဲတော်ကို နေပြည်တော်၊ ရန်ကုန်၊ မန္တလေး၊ မော်လမြိုင်အပါအဝင် သက်ဆိုင်ရာ တိုင်းနဲ့ပြည်နယ်တွေရဲ့ ခရိုင်၊မြို့အလိုက်မှာလည်း ပြည်သူတွေ ပျော်ရွှင်စွာ ပါဝင်ဆင်နွှဲနိုင်ဖို့ ဆောင်ရွက်သွားမယ်လို့ ဆိုထားပါတယ်။
ဒါ့အပြင် အခုနှစ် ကျင်းပမယ့် သင်္ကြန်ပွဲတော်ဟာ သာမာန်ပျော်ပွဲရွှင်ပွဲတစ်ခုထက်ပိုပြီး အစိုးရ၊ လွှတ်တော်ကိုယ်စားလှယ်တွေ၊ ဝန်ထမ်းတွေ၊ ပြည်သူတွေနဲ့အတူ ပူးပေါင်းပြီး စိတ်သစ်လူသစ်၊ နိုင်ငံရေး အခင်းအကျင်းသစ်တွေနဲ့ အတူတကွ ဆင်နွှဲကြမယ့် အနှစ်သာရရှိတဲ့ ပွဲတော်ကြီး တစ်ခု ဖြစ်တယ်လို့ ဆိုပါတယ်။
လမ်းလျှောက်သင်္ကြန်ပွဲတော်မှာ ပြည်သူတွေအားလုံး လှည်းနေလှေအောင်း မြင်းဇောင်းမကျန် ပျော်ရွှင်စွာ ဆင်နွှဲနိုင်ဖို့ မြို့ကြီးအသီးသီးအပြင် ရပ်ကွက်ကျေးရွာတွေအထိ လမ်းလျှောက်သင်္ကြန်မဏ္ဍုပ်တွေ ပြုလုပ်ကျင်းပသွားမယ်လို့ အသိပေးထားပါတယ်။
သတင်း – သံလွင်တိုင်းမ်
ဓာတ်ပုံ – ယမန်နှစ် ဘားအံ သင်္ကြန် ပုံဟောင်း