ငြိမ်းချမ်းရေး သဘောတူညီမှုပါ သတ်မှတ်ချက် ၉၀ ရာခိုင်နှုန်းကို အမေရိကန်နဲ့ ယူကရိန်း သဘောတူထား

ဝါရှင်တန်၊ ကိဗ်၊ ဒီဇင်ဘာ ၁၆

ရုရှားနဲ့ ယူကရိန်း ဖြစ်ပွားနေတဲ့ စစ်ပွဲ အဆုံးသတ်ရေး ငြိမ်းချမ်းရေး သဘောတူညီမှုပါ သတ်မှတ်ချက် ၉၀ ရာခိုင်နှုန်းကို အမေရိကန်၊ ယူကရိန်းနဲ့ ဥရောပ အဓိကနိုင်ငံတွေကြား ဘုံသဘောတူညီမှု ရရှိထားပြီ ဖြစ်ကြောင်း အမေရိကန် အကြီးတန်းအရာရှိ နှစ်ဦးက ဒီဇင်ဘာ ၁၅ ရက်မှာ ပြောကြားပြီး နယ်မြေဆိုင်ရာ မေးခွန်းတွေနဲ့ ပတ်သက်လို့တော့ မဖြေရှင်းရသေးဘူးလို့ ပြောပါတယ်။

ဒေါ်နယ်ထရန့်ရဲ့ ငြိမ်းချမ်းရေး မစ်ရှင် အထူးကိုယ်စားလှယ် စတိဗ် ဝစ်ကော့ဖ်၊ သမ္မတရဲ့ သမက် ဂျာရက် ကူချ်နာ၊ ယူကရိန်းသမ္မတ ဗိုလိုဒီမာ ဇီလန်စကီးနဲ့ ဥရောပ ထိပ်တန်း အရာရှိတွေ ဘာလင်မြို့မှာ နှစ်ရက်ခွဲကြာ အသည်းအသန် ဆွေးနွေးခဲ့ပြီးနောက် အခုလိုပြောဆိုချက်တွေ ထွက်ပေါ်လာတာ ဖြစ်ပါတယ်။

လူမှုမီဒီယာပေါ်မှာ ဖော်ပြထားတဲ့ ပို့စ် တစ်ခုမှာ သမ္မတ ဇီလန်စကီးက အဲဒီ ညှိနှိုင်းမှုတွေကို ပထမဆုံး မူကြမ်း အဖြစ် ဖော်ပြထားပေမယ့် စိတ်ပိုင်းဆိုင်ရာ အစိတ်အပိုင်းကတော့ ခိုင်မာတယ်လို့ ပြောပါတယ်။

ယူကရိန်းသမ္မတက နှစ်ဖက်စလုံးအနေနဲ့ အတူတကွ အရမ်း ကောင်းကောင်း အလုပ်လုပ်နေပေမယ့် အဖျက်အမှောင့် လုပ်ဆောင်နေသူတွေကို ဖယ်ရှားရမယ်လို့ ဆိုပါတယ်။

လာမယ့် သီတင်းပတ်ကုန်ရက်အတွင်း မီယာမီမှာ တွေ့ဆုံကြမယ့် သူတွေထဲ အမှုဆောင် အဖွဲ့တွေ၊ စစ်ဖက်ဆိုင်ရာ ပုဂ္ဂိုလ်တွေပါဝင်မှာ ဖြစ်ပြီး နယ်မြေတွေ ကိစ္စအတွက် မြေပုံတွေကိုကြည့်ပြီး လေ့လာကြမှာ ဖြစ်ကြောင်း အကြီးတန်း အရာရှိ တစ်ဦးက သတင်းထောက်တွေကို ဖုန်းနဲ့ ဖြေဆိုပါတယ်။

ရုရှား အရာရှိတွေနဲ့ နောက်တစ်ကြိမ် ဘယ်အချိန် တွေ့ဆုံမလဲ ဆိုတာကိုတော့ ရှင်းရှင်းလင်းလင်း မသိရသေးပါဘူး။

လောလောဆယ်အထိတော့ ရုရှားနဲ့ ယူကရိန်းကြား သဘောတူညီမှု ၉၀ ရာခိုင်နှုန်းလောက် အထိ ရရှိပြီလို့ ပြောနိုင်ကြောင်း အကြီးတန်း အရာရှိ တစ်ဦးက ပြောထားပါတယ်။

ဒါပေမဲ့ နောက်ထပ် ညှိနှိုင်းစရာ ကိစ္စအချို့ ရှိနေသေးတယ်လို့ အဲဒီ အမည်မဖော်လိုတဲ့ အရာရှိက ဆိုတာပါ။

အမေရိကန် ကိုယ်စားလှယ် အဖွဲ့ဟာ ရုရှားသမ္မတ ဗလာဒီမာ ပူတင်နဲ့ မော်စကိုမှာ ဒီဇင်ဘာ ၂ ရက်က ၅ နာရီနီးပါးကြာ တွေ့ဆုံခဲ့ကြပါတယ်။

အဲဒီ တွေ့ဆုံမှုဟာ ရှည်ကြာလွန်းပြီး သူ့အနေနဲ့ စိုးရိမ်မိကြောင်းနဲ့ အချက်၂၀ ပါ အဆိုပြုချက်ရဲ့ သတ်မှတ်ချက် တချို့ကို ပယ်ချခဲ့ကြောင်း ပူတင်က အိန္ဒိယမှာ ပြုလုပ်ခဲ့တဲ့ အင်တာဗျူးအတွင်း ပြောဆိုပါတယ်။

ရုရှားရဲ့တောင်းဆိုမှုတွေကို အသားပေးထားတဲ့ အချက် ၂၈ ချက်ပါ အဆိုပြုချက်လို မဟုတ်ဘဲ ဘာလင်မှာ ဆွေးနွေးခဲ့တဲ့ အချက် ၂၀ ပါ အဆိုပြုချက်တွေ မပေါက်ကြားခဲ့ပါဘူး။

ယူကရိန်းကို လုံခြုံရေး အာမခံပေးမယ့် ကိစ္စနဲ့ ပတ်သက်လို့ သဘောတူညီမှု ရရှိခဲ့ပြီ ဖြစ်ပေမယ့် အသေးစိတ်ကို မပြောနိုင်သေးဘူးလို့ အရာရှိတွေက ပြောပါတယ်။

ဒါပေမဲ့ အမေရိကန်နဲ့ တခြား နိုင်ငံတစ်နိုင်ငံကြား သဘောတူညီမှု တစ်ခုခုကို လွှတ်တော်က အတည်ပြုပေးရမှာ ဖြစ်ပါတယ်။

ယူကရိန်းအနေနဲ့ ငြိမ်းချမ်းရေး သဘောတူညီမှုအတွက် နေတိုး အဖွဲ့ဝင် ဖြစ်ခွင့်ကို လက်လွှတ်ခံရမယ်လို့လည်း သိရပါတယ်။

Ref:The Hill

Leave a Reply

This site uses Akismet to reduce spam. Learn how your comment data is processed.