သရက်ချောင်း၊ အောက်တိုဘာ ၁၅
တနင်္သာရီတိုင်း သရက်ချောင်းမြို့နယ်မှာ စစ်ကော်မရှင်တပ် စစ်ကြောင်းထိုးဝင်ရောက်လာပြီးနောက် နေအိမ် ၅၀ ကျော် မီးရှို့ဖျက်ဆီးခံလိုက်ရပြီး ရာနဲ့ချီတဲ့ နေအိမ်တွေ မွှေနှောက်ခံထားရတယ်လို့ ဒေသခံတွေက သံလွင်တိုင်းမ်ကို ပြောပါတယ်။
စစ်ကော်မရှင်တပ်ဟာ ပြီးခဲ့တဲ့ စက်တင်ဘာ ၂၈ ရက်နေ့ကစလို့ သရက်ချောင်းမြို့နယ် ရန်တောင်ရွာကတဆင့် ကင်းရှေ့၊ ကျောက်လှေကား၊ မိုးရွှေကုန်းနဲ့စော်ဖျားရွာတို့ကို စစ်ကြောင်းပတ်ထိုးခဲ့တာ ဖြစ်ပါတယ်။
စစ်ကြောင်းဝင်တဲ့ နှစ်ပတ်ကျော်ကာလအတွင်း ကျောက်လှေကား၊ စော်ဖျားနဲ့မိုးရွှေကုန်းကျေးရွာတို့က အိမ်ခြေ ၅၀ ကျော် မီးရှို့ခံထားရပြီး အိမ်ခြေ ၃၀၀ ကျော်ဟာလည်း မွှေနှောက်ခံထားရပါတယ်။
အဲဒီစစ်ကြောင်းဟာ အောက်တိုဘာ ၁၃ ရက်နေ့မှာ သင်ကျွန်းရွာ၊ အောက်တိုဘာ ၁၄ ရက်နေ့မှာ သရက်နှစ်ခွကျေးရွာဘက်ကို ပြန်ဆုတ်သွားပြီလို့ တော်လှန်ရေးအင်အားစုတွေထံကနေ သိရပါတယ်။
စစ်ကြောင်းဝင်ရောက်လာချိန် ရန်တောင်၊ သင်းကျွန်း၊ ဥတ္တူ၊ ညောင်ဇင်၊ ကြာအင်း၊ ကျောက်လှေကား၊ မဲနယ်အိုး၊ သရက်နှစ်ခွကျေးရွာတို့က ဒေသခံ ၅၀၀၀ ထက်မနည်း ထွက်ပြေးတိမ်းရှောင်ခဲ့ရပါတယ်။
ပြီးခဲ့တဲ့ စက်တင်ဘာပထမအပတ်တုန်းကလည်း သရက်ချောင်းမြို့နယ်ထဲ စစ်ကော်မရှင်တပ် စစ်ကြောင်းထိုးစဉ် နေအိမ် အလုံး ၁၀၀ ထက်မနည်း မီးရှိုဖျက်ဆီးခံခဲ့ရတယ်လို့ ဒေသခံတွေထံက သိရပါတယ်။
သတင်း – သံလွင်တိုင်းမ်
ဓာတ်ပုံ – CJ