KNU ဗဟိုဌာနချုပ် အသေခံဒရုန်းနဲ့ ထပ်မံတိုက်ခိုက်ခံရ

လှိုင်းဘွဲ၊ မတ် ၁၈

ကရင်အမျိူးသားအစည်းအရုံး KNU ဗဟိုဌာနချုပ်ကို စစ်ကောင်စီတပ်က အသေခံဒရုန်းတွေနဲ့ သုံးကြိမ် လာရောက်ဗုံးကြဲတိုက်ခိုက်သွားခဲ့ပြီး ဌာနဆိုင်ရာရုံးနေရာအနား ကျရောက်ပေါက်ကွဲခဲ့ကာ လူထိခိုက်မှုမရှိဘူးလို့ KNU သတင်းရင်းမြစ်တွေက သံလွင်တိုင်းမ်ကို ပြောပါတယ်။

မတ်လ ၁၈ ရက်နေ့ အစောပိုင်းမှာ စစ်ကောင်စီတပ်ရဲ့ ဒရုန်းတွေက ကရင်ပြည်နယ် လှိုင်းဘွဲမြို့နယ် KNU တပ်မဟာ ၇ နယ်မြေထဲက ဗဟိုဌာနချုပ်ထဲကို ဦးတည်ပစ်မှတ်ထားပြီး လာရောက်ဗုံးကြဲတိုက်ခိုက်သွားခဲ့တာပါ။

ဒရုန်းဗုံးကြဲတိုက်ခိုက်မှုကြောင့် KNU ဗဟိုဌာနချုပ်ထဲက ဌာနဆိုင်ရာ ရုံးမြေနေရာမှာ ကျရောက် ပေါက်ကွဲခဲ့ပေမယ့် လူထိခိုက်မှုမရှိဘဲ ရုံးအဆောက်အဦး ခေါင်မိုးအနည်းငယ်သာ ထိခိုက်ပျက်စီးသွားခဲ့တယ်လို့ KNU တပ်မဟာ ၇ သတင်းရင်းမြစ်တစ်ဦးက ဆိုပါတယ်။

KNU ဗဟိုဌာနချုပ်ကို လာရောက်ဗုံးကြဲတိုက်ခိုက်ခဲ့တဲ့ စစ်ကောင်စီတပ်ရဲ့ ဒရုန်းတွေဟာ လှိုင်းဘွဲမြို့နယ် ရှမ်းရွာသစ်မြို့အခြေစိုက် ဗျူဟာစခန်းကုန်းက ဒရုန်းတွေဖြစ်ကြပြီး အဲဒီဗျူဟာစခန်းကနေ KNU ဌာနချုပ်နေရာအပါအဝင် တပ်မဟာ ၇ နယ်မြေထဲက အခြားစခန်းတွေအပေါ် မကြာခဏ ဗုံးကြဲတိုက်ခိုက်နေခဲ့တာပါ။

ပြီးခဲ့တဲ့ မတ်လ ၁၄ ရက်နေ့ကလည်း KNU တပ်မဟာ ၇ နယ်မြေထဲက စစ်ကောင်စီတပ်စခန်းဖြစ်တဲ့ ပူလူးတူစခန်းကို KNLA KNDO ပူးပေါင်းအဖွဲ့ တိုက်ခိုက်သိမ်းယူခဲ့ပြီး စစ်ကောင်စီတပ်က ၁၂ ဦးသေဆုံးခဲ့သလို ၁၃ ဦးကတော့ ထိုင်းနိုင်ငံဘက်ခြမ်းကို ထွက်ပြေးသွားခဲ့ပါတယ်။

KNU ဗဟိုဌာနချုပ်ဟောင်းဖြစ်တဲ့ မာနယ်ပလောကို ပြီးခဲ့တဲ့နှစ် ၂၀၂၄ ခုနှစ် နှစ်ကုန်ပိုင်းက KNLA KNDO တော်လှန်ရေးပူးပေါင်းအဖွဲ့က သိမ်းယူလိုက်ပြီးနောက်ပိုင်းမှာ စစ်ကောင်စီတပ်က KNU ဗဟိုဌာနချုပ်နေရာကို ဒရုန်းတွေနဲ့ ၃ ကြိမ်ထက်မနည်း ဗုံးကြဲတိုက်ခိုက်နေလျက်ရှိရာ အခုနှစ် ၂၀၂၅ ဇန်နဝါရီလ ၃၁ ရက်နေ့ ကရင့်တော်လှန်ရေးနေ့မှာလည်း ဒရုန်းဗုံးကြဲတိုက်ခိုက်ခဲ့ပါတယ်။

KNU တပ်မဟာ ၇ နယ်မြေထဲမှာ စစ်ကောင်စီတပ်ရဲ့ စခန်းတွေဖြစ်ကြတဲ့ မာနယ်ပလောဒေသက စခန်းတွေနဲ့ ပိုင်ကျုံမြို့နယ် ပူးလူးတူစခန်းတို့ကို KNLA KNDO ပူးပေါင်းအဖွဲ့က တိုက်ခိုက်သိမ်းယူလိုက်ပြီးနောက် တပ်မဟာ ၇ နယ်မြေထဲမှာ စစ်ကောင်စီတပ်နဲ့ တော်လှန်ရေးပူးပေါင်းအဖွဲ့တို့အ ကြား နှစ်ဖက်စစ်ရေးတိုက်ပွဲတွေ ပြင်းထန်လျက်ရှိနေတာ ဖြစ်ပါတယ်။

သတင်း – သံလွင်တိုင်းမ်

ဓာတ်ပုံ – KNU

Leave a Reply

This site uses Akismet to reduce spam. Learn how your comment data is processed.