ကျောက်ဆင်ကျေးရွာ စာသင်ကျောင်းမှာ စစ်ကောင်စီတပ်စွဲပြီး ဒေသခံတွေကို ဖမ်းဆီးစစ်ဆေးနေ

လောင်းလုံ၊ အောက်တိုဘာ ၁၉

တနင်္သာရီတိုင်းဒေသကြီး၊ ထားဝယ်ခရိုင်၊ လောင်းလုံမြို့နယ်၊ ကျောက်ဆင်ကျေးရွာရှိ စာသင်ကျောင်းမှာ စစ်ကောင်စီတပ်စွဲနေထိုင်ပြီး ဒေသခံတွေကို ဖမ်းဆီးစစ်ဆေးမှုတွေလုပ်နေတယ်လို့ သိရပါတယ်။

အောက်တိုဘာလ ၁၁ ရက်နေ့က ပျူ စောထီးအဖွဲ့ဝင် ကျောက်ဆင်ကျေးရွာအုပ်ချုပ်ရေးမှူး အသတ်ခံရပြီးနောက်ပိုင်းမှာ စစ်ကောင်စီတပ်ဖွဲဝင် အင်အား ၂၀ ခန့် ရောက်ရှိနေထိုင်နေတယ်လို့ သိရပါတယ်။

စစ်ကောင်စီတပ်ဖွဲ့ဝင်တွေ ရောက်ရှိပြီးနောက်ပိုင်း မောင်းမကန်၊ ကျောက်ဆင်၊ သဘော့ဆိပ်၊ ပြင်ကြီးကျေးရွာတွေက ဒေသခံတွေနဲ့ NLD ပါတီဝင်တို့ရဲ့ နေအိမ်တွေကို ဝင်ရောက်ရှာဖွေတာ၊ ဖမ်းဆီးတာတွေလုပ်နေတာကြောင့် NLD ပါတီဝင်များ အပါအဝင် ဒေသခံ ၂၀ ကျော်ဖမ်းဆီးခံခဲ့ရတယ်လို့ သိရပါတယ်။

ဖမ်းဆီးခံရသူတွေအနက်က အချို့ကို ပြန်လွှတ်ပေးခဲ့တာတွေရှိသလို နေအိမ်တွေမှာ ဝင်ရောက်ဖမ်းစဉ်တုန်းက အချို့ နေအိမ်ထဲတွေက ပစ္စည်းတွေကို ဖျက်စီးခဲ့တာတွေရှိတယ်လို့ သိရပါတယ်။



“ရီဦးအသတ်ခံရပြီးနောက်ပိုင်း တော်တော်အဖမ်းခံရတယ်။ ပြန်လွှတ်ပေးလိုက်တဲ့သူက အနည်းငယ်ဘဲရှိတယ်။ သူတို့တွေလဲ စစ်ဆေးခံရတုန်းက ရိုက်နှက်ခံရတာတွေရှိတယ်လို့ သိရတယ်။ စကစတွေနဲ့ ပျူ စောထီးတွေပေါင်းပြီး ဒေသခံတွေကို တော်တော်လေး စစ်ဆေးဒုက္ခပေးနေကြတယ်”လို့ ဒေသခံတစ်ဦးက သံလွင်တိုင်မ်းကိုပြောပါတယ်။

ဖမ်းဆီးစစ်ဆေးသူတွေကို စစ်ကောင်စီတပ်စွဲထားတဲ့စာသင်ကျောင်းမှာ စစ်ဆေးပြီး မောင်းမကန်ရဲစခန်းမှာ ချုပ်နှောင်ထားတယ်လို့ သိရပါတယ်။

လောင်းလုံမြို့နယ်မှာ အုပ်ချုပ်ရေးမှူးတွေ အသတ်ခံရပေမယ့် သေဆုံးသူတွေနေရာမှာ ပျူ စောထီးအဖွဲ့တွေက နေရာယူလုပ်ကိုင်နေတာတွေရှိတယ်လို့ သိရပါတယ်။

သတင်း – သံလွင်တိုင်းမ်

Leave a Reply

This site uses Akismet to reduce spam. Learn how your comment data is processed.