ဘူကာဗူ၊ စက်တင်ဘာ ၁၁
ကွန်ဂို ဒီမိုကရက်တစ်နိုင်ငံ အရှေ့ပိုင်းက သူပုန်တွေ ထိန်းချုပ်ထားတဲ့ ဘူကာဗူ ဒေသရှိ စာသင်ကျောင်း နှစ်ကျောင်း မီးလောင်ကျွမ်းမှုကြောင့် ကျောင်းသားတွေထွက်ပြေးချိန် လူအုပ် တက်နင်းမိပြီး ကျောင်းသား အနည်းဆုံး ၂၄ ဦး သေဆုံးခဲ့ကြောင်း အရာရှိတွေက ပြောပါတယ်။
အဲဒီ မီးလောင်မှုအတွင်း အရွယ်ရောက်ပြီးသူတွေလည်း သေဆုံးကြောင်း သိထားရပြီး လူနေထူထပ်တဲ့ ကာဒူတူဒေသမှာ သေဆုံးသူ အရေအတွက် နောက်ထပ် ပိုများလာနိုင်တယ်ဆိုတဲ့ စိုးရိမ်မှုတွေ ရှိနေပါတယ်။
အသက်ရှင် လွတ်မြောက်သူတွေကို အနီးအနား ဆေးရုံတွေဆီ တင်ပို့ထားပြီး ရိုက်ကူးထားတဲ့ ရုပ်သံဖိုင်တွေအရ ကလေးတွေ ဆေးရုံပေါ်မှာ နာကျင် အော်ဟစ်နေကြတာ မြင်တွေ့ရပါတယ်။
အဲဒီ မီးလောင်မှုအတွင်း လူနေအိမ် ၃၀၀ လောက် ပျက်စီးသွားခဲ့ပြီး မီးလောင်ကျွမ်းရတဲ့ အကြောင်းရင်းကို မသိရသေးပါဘူး။
လက်နက်ကိုင်တွေ ခန့်အပ်ထားတဲ့ အာဏာပိုင်တွေက သေဆုံးသူ အရေအတွက် ၂၄ ဦး ရှိတယ်လို့ စက်တင်ဘာ ၁၀ ရက် ညနေပိုင်းက ကနဦး ဖော်ပြထားပြီး သေဆုံးသူ အရေအတွက် ပိုများလာနိုင်တယ်ဆိုတဲ့ စိုးရိမ်မှုတွေ ရှိနေပါတယ်။
လူမှုမီဒီယာပေါ်မှာ ပျံ့နှံ့နေတဲ့ ဓာတ်ပုံတွေမှာ ကလေးငယ်တွေ လှုပ်ရှားမှု မရှိတော့ဘဲ လဲကျနေတာကို မြင်တွေ့ရပါတယ်။
နေ့လယ်ပိုင်းမှာ မီးငြိမ်းသတ်နိုင်ခဲ့ပေမယ့် အမှိုက်တွေ၊ သတ္တုတွေကနေ မီးခိုးတွေ ဆက်ဆက် ထွက်ပေါ်နေခဲ့တယ်လို့ မျက်မြင်သက်သေ တစ်ဦးက ရိုက်တာ သတင်းဌာနကို ပြောပါတယ်။
တောင်ကီဗူးပြည်နယ် မြို့တော်ဖြစ်ပြီး ကွန်ဂိုရဲ့ လူနေ အထူထပ်ဆုံး တောင်ပေါ်မြို့တွေထဲက တစ်ခုဖြစ်တဲ့ ဘူကာဗူကို M23 လက်နက်ကိုင်တွေက ပြီးခဲ့တဲ့နှစ် ဖေဖော်ဝါရီက သိမ်းပိုက်ခဲ့တာ ဖြစ်ပါတယ်။
ဒီအတောအတွင်း ကင်ရှာဆာရှိ အစိုးရက လူမှုမီဒီယာပေါ်မှာ ကြေညာချက် ထုတ်ပြန်ထားပေမယ့် ထိခိုက်သေဆုံးမှု အသေးစိတ် အခြေအနေကို ဖော်ပြထားတာ မရှိပါဘူး။
အမျိုးသား ပညာရေးဝန်ကြီးဌာနက လူသေဆုံးမှုများတဲ့မီးလောင်မှုအတွက် များစွာ ဝမ်းနည်းရကြောင်း ကြေညာချက်မှာ ဖော်ပြထားပါတယ်။
ပြီးခဲ့တဲ့ သီတင်းပတ်ကုန်ရက်က ကင်ရှာဆာမှာ အလားတူ မီးလောင်မှု ဖြစ်ပွားပြီးနောက် အခုလို နောက်ထပ် ဝမ်းနည်းစရာ ဖြစ်ရပ် ဖြစ်ပွားခဲ့တာ ဖြစ်ပါတယ်။
မီးလောင်မှု ဖြစ်ပွားခဲ့တဲ့ ကျောင်းတွေရဲ့ အခြေအနေကို လေ့လာပြီး စာဆက်လက် သင်ကြား ပို့ချနိုင်ရေး ဆောင်ရွက်ဖို့လည်း ဝန်ကြီးဌာနက ညွှန်ကြားထားပါတယ်။
ပြီးခဲ့တဲ့ သီတင်းပတ်ကုန်ရက်က ကင်ရှာဆာမြို့ ခန်းမ တစ်ခုမှာ မင်္ဂလာဆောင် ကျင်းပချိန် လူအုပ် တက်နင်းမှု ဖြစ်ပွားပြီးနောက် အလားတူ ဝမ်းနည်းစရာ ဖြစ်ရပ် ဖြစ်ပွားခဲ့တာ ဖြစ်ပါတယ်။
အဲဒီဖြစ်ရပ်ဆိုးတွေကို တုံ့ပြန်တဲ့အနေနဲ့ အစိုးရက ဘေးကင်းရေးဆိုင်ရာ တင်းကြပ်တဲ့ အစီအစဉ်တွေ ချမှတ်ထားပြီး အများပြည်သူ စုဝေးရာနေရာတွေမှာ စံသတ်မှတ်ရေး နိုင်ငံတဝှမ်း အဖွဲ့တွေ စေလွှတ်ထားပါတယ်။
Ref:Reuters