ဘန်ကောက် ဩဂုတ် ၆
မြန်မာနိုင်ငံမှာ အသွင်ပြောင်းသမ္မတအဖြစ် တာဝန်ယူနေတဲ့ ဗိုလ်ချုပ်မှူးကြီးဟောင်း ဦးမင်းအောင်လှိုင်ဟာ သြဂုတ် ၇ ရက်နေ့က ထိုင်းနိုင်ငံကို တရားဝင်သွားရောက်ခဲ့ပြီး ထိုင်းအစိုးရက နိုင်ငံတော်အဆင့် အခမ်းအနားနဲ့ အနီရောင်ကော်ဇောခင်း ကြိုဆိုခဲ့ပါတယ်။
ဘန်ကောက်မြို့မှာ ကျင်းပတဲ့ ကြိုဆိုပွဲမှာ ထိုင်းဝန်ကြီးချုပ် အနုတင် ချန်ဝီရာကူနဲ့အတူ ဦးမင်းအောင်လှိုင်က ဂုဏ်ပြုတပ်ဖွဲ့ကို စစ်ဆေးခဲ့ပြီး စစ်တပ်တီးဝိုင်းက နှစ်နိုင်ငံ နိုင်ငံတော်သီချင်းတွေကိုလည်း တီးမှုတ်ခဲ့ပါတယ်။
ဒီခရီးစဉ်ဟာ ထိုင်းအစိုးရက မြန်မာနဲ့ အာဆီယံအကြား ဆက်ဆံရေးကို ပြန်လည်တိုးမြှင့်နိုင်ဖို့ ကြိုးပမ်းနေတဲ့ အစီအစဉ်ရဲ့ တစ်စိတ်တစ်ပိုင်းလည်း ဖြစ်ပါတယ်။
နှစ်နိုင်ငံ တွေ့ဆုံဆွေးနွေးပွဲအတွင်း ဦးမင်းအောင်လှိုင်က ငြိမ်းချမ်းရေး၊ စီးပွားရေးဖွံ့ဖြိုးတိုးတက်ရေးနဲ့ အာဆီယံအဖွဲ့ဝင်နိုင်ငံတွေနဲ့ ဆက်ဆံရေး ပိုမိုကောင်းမွန်လာအောင် ဆက်လက်ဆောင်ရွက်သွားမယ်လို့ ပြောကြားခဲ့ပါတယ်။
ဒါ့အပြင် “မြန်မာနိုင်ငံဟာ ဒီမိုကရေစီလမ်းကြောင်းပေါ်မှာ ရှိနေပြီး ပိုမိုကောင်းမွန်တဲ့ အနာဂတ်ဆီ ဦးတည်နေပါတယ်” လို့လည်း ပြောဆိုခဲ့ပါတယ်။
ဒါပေမယ့် အာဆီယံဘက်ကတော့ မြန်မာနိုင်ငံအပေါ် ချမှတ်ထားတဲ့ ဘုံသဘောတူ ငြိမ်းချမ်းရေးအစီအစဉ်ကို အကောင်အထည်ဖော်မှုအခြေအနေကို ဆက်လက်စောင့်ကြည့်နေဆဲဖြစ်ပြီး၊ မြန်မာနဲ့ ပုံမှန်ဆက်ဆံရေး ပြန်စနိုင်ဖို့ကတော့ “အချိန်ယူရဦးမယ်” လို့ အာဆီယံ အထူးကိုယ်စားလှယ် မာရီယာ ထရီဆာ လာဇာရိုက မကြာသေးခင်က ပြောထားပါတယ်။
တစ်ဖက်မှာလည်း လူ့အခွင့်အရေးအဖွဲ့အစည်းတွေနဲ့ အနောက်နိုင်ငံတချို့က မြန်မာစစ်တပ်ဟာ အရပ်သားတွေအပေါ် ပြင်းထန်တဲ့ လူ့အခွင့်အရေးချိုးဖောက်မှုတွေနဲ့ စစ်ရာဇဝတ်မှုတွေ ကျူးလွန်နေတယ်လို့ စွပ်စွဲထားပြီး၊ ဒီစွပ်စွဲချက်တွေကို စစ်အစိုးရဘက်ကတော့ ငြင်းဆိုထားပါတယ်။
လွတ်လပ်တဲ့ စောင့်ကြည့်လေ့လာရေးအဖွဲ့တစ်ခုကလည်း အရပ်သားတွေကို ပစ်မှတ်ထား တိုက်ခိုက်မှုတွေ၊ အထူးသဖြင့် လေကြောင်းတိုက်ခိုက်မှုတွေ ပိုမိုပြင်းထန်လာတယ်လို့ မကြာသေးခင်က ထုတ်ပြန်ထားပါတယ်။
သုတေသီတွေကတော့ ထိုင်းနိုင်ငံအနေနဲ့ မြန်မာနဲ့ ပြန်လည်ထိတွေ့ဆက်ဆံတာက အာဆီယံအတွင်း သြဇာလွှမ်းမိုးမှုကို တိုးလာစေနိုင်ပေမယ့်၊ ဦးမင်းအောင်လှိုင်ရဲ့ အစိုးရကို တရားဝင်အသိအမှတ်ပြုနေသလို မဖြစ်ရအောင် သတိထားဖို့ လိုတယ်လို့ သုံးသပ်နေကြပါတယ်။
ထိုင်းအစိုးရထုတ်ပြန်ချက်အရ ဝန်ကြီးချုပ် အနုတင်က “ထိုင်းဟာ မြန်မာနိုင်ငံရဲ့ မိတ်ဆွေနဲ့ မိတ်ဖက်နိုင်ငံ ဖြစ်တယ်” လို့ ပြောဆိုခဲ့ပြီး၊ နှစ်နိုင်ငံပူးပေါင်းဆောင်ရွက်မှုက နှစ်နိုင်ငံ ပြည်သူတွေအတွက် အကျိုးကျေးဇူးတွေ ဖြစ်ပေါ်လာမယ်လို့ ယုံကြည်ကြောင်းလည်း ပြောကြားခဲ့ပါတယ်။
ခရီးစဉ်အတွင်း ဦးမင်းအောင်လှိုင်ဟာ ထိုင်း-မြန်မာ စီးပွားရေးဖိုရမ်ကိုလည်း တက်ရောက်ခဲ့ပါတယ်။ ထိုင်းအစိုးရကတော့ ဟိုတယ်၊ ဘဏ်လုပ်ငန်း၊ ကုန်ထုတ်လုပ်ရေးနဲ့ စွမ်းအင်ကဏ္ဍတွေ အပါအဝင် မြန်မာနိုင်ငံနဲ့ စီးပွားရေးပူးပေါင်းဆောင်ရွက်မှုတွေကို ပြန်လည်အသက်သွင်းဖို့ ကြိုးစားနေပါတယ်။
ဒါပေမယ့် COVID-19 ကပ်ရောဂါနဲ့ ၂၀၂၁ အာဏာသိမ်းမှုနောက်ပိုင်း နယ်စပ်ကုန်သွယ်ရေး ထိခိုက်လာတာ၊ ပြည်တွင်းပဋိပက္ခ ဆက်လက်ဖြစ်ပွားနေတာနဲ့ အနောက်နိုင်ငံတွေရဲ့ ပိတ်ဆို့အရေးယူမှုတွေကြောင့် ထိုင်းကုမ္ပဏီတချို့ဟာ မြန်မာနိုင်ငံထဲက ရင်းနှီးမြှုပ်နှံမှုတွေကို ပြန်လည်သုံးသပ်တာ၊ လျှော့ချတာ ဒါမှမဟုတ် ရပ်ဆိုင်းတာတွေ လုပ်နေရတယ်လို့ ထိုင်း-မြန်မာ စီးပွားရေးကောင်စီဘက်က ပြောထားပါတယ်။
Ref:Reuters