ပုလော၊ ဇွန် ၈
တနင်္သာရီတိုင်း ပုလောမြို့နယ်နဲ့လောင်းလုံးမြို့နယ်တို့မှာ တစ်ရက်တည်း မြေမြှုပ်မိုင်း ပေါက်ကွဲမှုကြောင့် အရပ်သားပြည်သူ လေးဦး ထိမှန်ဒဏ်ရာရရှိခဲ့တယ်လို့ ဒေသခံတွေက သံလွင်တိုင်းမ်ကို ပြောပါတယ်။
ပြီးခဲ့တဲ့ ဇွန် ၄ ရက်နေ့ မနက် ၁၀ နာရီအချိန်လောက်မှာ ပုလောမြို့နယ် မှော်မိကျေးရွာနေ အသက် ၃၈ နှစ်အရွယ် ဒေါ်ခိုင်ဇင်နွယ်နဲ့ သားဖြစ်သူ အသက် ၁၂ အရွယ် မောင်စွမ်းထက်အောင်တို့ဟာ ကျေးရွာအနီး တောထဲမှာ ဟင်းရွက်ခူးသွားစဉ် မိုင်းထိသွားတာ ဖြစ်ပါတယ်။
အဲဒီနေ့ ညနေ ၅ နာရီအချိန်ခန့်မှာလည်း လောင်းလုံးမြို့နယ် ပဉ္စသီမော်ကျေးရွာနေ အသက် ၅၇ နှစ်အရွယ် ဒေါ်သက်သက်စန်းနဲ့ သမီးဖြစ်သူ အသက် ၂၈ နှစ်အရွယ် မနွေလှိုင်းဧကရီဦးတို့ဟာ ထားဝယ်ကနေ လောင်းလုံးဘက်ကို ဆိုင်ကယ်နဲ့ပြန်လာချိန် မြေမြှုပ်မိုင်းပေါက်ကွဲမှုနဲ့ ကြုံနေရပါတယ်။
မြေမြှုပ်မိုင်း နင်းမိပေါက်ကွဲမှုကြောင့် အဲဒီဒေသခံ လေးဦးဟာ ခြေထောက်၊ လက်နဲ့ ခန္ဓကိုယ်တွေမှာ မိုင်းစမှန်ဒဏ်ရာရရှိခဲ့ပြီး ပုလောပြည်သူ့ဆေးရုံနဲ့ထားဝယ်ပြည်သူ့ဆေးရုံတို့မှာ ဆေးကုသမှုခံယူနေရတယ်လို့ သိရပါတယ်။
ဒီဖြစ်စဉ်နဲ့ ပတ်သက်ပြီး စစ်ကော်မရှင်တပ်နဲ့ တော်လှန်ရေးတပ်ဖွဲ့တွေက တစ်စုံတစ်ရာ အသိပေးထုတ်ပြန်တာ မတွေ့ရသေးပါဘူး။
ပြီးခဲ့တဲ့ မတ် ၂၄ ရက်နေ့ကလည်း ပုလောမြို့နယ် မီးလောင်ချောင်းကျေးရွာအနီးမှာ မြေမြှုပ်မိုင်း နင်းမိပေါက်ကွဲမှုကြောင့် အမျိုးသား တစ်ဦး ခြေထောက်တစ်ဖက် ပြတ်တောက်ဒဏ်ရာရရှိခဲ့ပါတယ်။
သတင်း – သံလွင်တိုင်းမ်