ရေး၊ အောက်တိုဘာ ၁၄
မွန်ပြည်နယ် ရေးမြို့နယ်မှာ တစ်ကျော့ပြန် ဖြစ်ပွားနေတဲ့ နှစ်ဖက်တိုက်ပွဲအတွင်း စစ်ကော်မရှင်တပ်ဘက်က အထိနာတယ်လို့ တော်လှန်ရေးတပ်ဖွဲ့ တာဝန်ရှိသူတွေက သံလွင်တိုင်းမ်ကို ပြောပါတယ်။
စစ်ကော်မရှင်တပ်ဟာ အောက်တိုဘာ ၁၀ ရက်နေ့ကစလို့ ရေးမြို့နယ်ရဲ့ စံပြ၊ အောင်သပြေ၊ ကနင်ကမော့နဲ့ ဘေးလမိုင်းကျေးရွာအနီး ပတ်ဝန်းကျင်ကို အင်အားအလုံးအရင်းနဲ့ စစ်ကြောင်းထိုးနေတာ ဖြစ်ပါတယ်။
အောက်တိုဘာ ၁၂ ရက်နေ့က မနက်ပိုင်းက အောင်သပြေနဲ့ဘေးလမိုင်းကျေးရွာအနီးမှာ စစ်ကော် မရှင်တပ် စစ်ကြောင်း ကြားဖြတ်တိုက်ခိုက်ခံရတာကြောင့် အထိနာသွားတာပါ။
အဲဒီတိုက်ခိုက်မှုအတွင်း စစ်ကော်မရှင်တပ်ဖွဲ့ဝင် ၁၀ ဦးထက်မနည်း ထိခိုက်သေဆုံးနိုင်ကြောင်းနဲ့ တိုက်ခိုက်မှုပြီးနောက် စစ်ကောင်မရှင်တပ်ဟာ မော့ကနင်ကျေးရွာဘက်ကို ပြန်ဆုတ်သွားမယ်လို့ ရေးပြည်သူ့ကာကွယ်ရေးတပ်ဖွဲ့ YPDF တာဝန်ခံ ဗိုလ်ရန်နိုင်က သံလွင်တိုင်းမ်ကို ပြောပါတယ်။
စစ်ကော်မရှင်တပ်ဟာ ရွေးကောက်ပွဲမတိုင်မီ ရေး – ထားဝယ်လမ်းပိုင်း ပြန်လည်ထိန်းချုပ်ဖို့အတွက် အင်အားအလုံးအရင်းနဲ့ စစ်ကြောင်းထိုးနေတာ ဖြစ်ပြီး အနည်းဆုံး အင်အား ၅၀၀ လောက် ရှိနိုင်တယ်လို့ တော်လှန်ရေးတပ်ဖွဲ့တွေက ပြောကြပါတယ်။
မွန်ပြည်နယ် ရေးမြို့နယ်ဟာ စစ်ကော်မရှင် ကျင်းပပြုလုပ်မယ့် ရွေးကောက်ပွဲအပိုင်း ၁ မှာ ပါဝင်တဲ့ မြို့နယ်တစ်ခု ဖြစ်ပြီး တော်လှန်ရေးတပ်ဖွဲ့တွေ အများဆုံး အခြေစိုက်တဲ့ ဒေသလည်း ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-YPDF