ရေဖြူ၊ အောက်တိုဘာ ၉
တနင်္သာရီတိုင်း ရေဖြူမြို့နယ် ကျွဲတလင်းနဲ့လော့သိုင်းကျေးရွာကြားမှာ နှစ်ဖက်တိုက်ပွဲ ပြန်လည်ဖြစ်ပွားနေတယ်လို့ ကရင်အမျိုးသားလွတ်မြောက်ရေးတပ်မတော် KNLA တပ်ရင်း ၂၇ ထံကနေ သိရပါတယ်။
အောက်တိုဘာ ၈ ရက်နေ့ မနက် ၇ နာရီလောက်မှာ ရာဖူးကျေးရွာကနေ စစ်ကြောင်းထိုးလာတဲ့ စစ်ကော်မရှင်တပ်ကို တော်လှန်ရေးမဟာမိတ်တပ်ဖွဲ့တွေက ကြားဖြတ်တိုက်ခိုက်ရာကနေ နှစ်ဖက်တိုက်ပွဲ ဖြစ်ပွားခဲ့တာပါ။
အချိန်နာရီဝက်ကျော်ကြာ ဖြစ်ပွားခဲ့တဲ့ နှစ်ဖက်တိုက်ပွဲအတွင်း စစ်ကော်မရှင်တပ်ဖွဲ့ဝင် ၅ ဦးထက်မနည်း သေဆုံးပြီးနောက် ရာဖူးကျေးရွာဘက်ကို ပြန်ဆုတ်သွားတယ်လို့ KNLA တပ်ရင်း ၂၇ တာဝန်ရှိသူတစ်ဦးက သံလွင်တိုင်းမ်ကို ပြောပါတယ်။
ပြီးခဲ့တဲ့ စက်တင်ဘာနောက်ဆုံးအပတ်ကလည်း ရေဖြူမြို့နယ် ထားဝယ်အထူးစီးပွားရေးဇုန်ထဲ စစ်ကြောင်းထိုးလာတဲ့ စစ်ကော်မရှင်တပ် ပိတ်ဆို့တိုက်ခိုက်ခံရတာကြောင့် စစ်ကော်မရှင်တပ်ဖွဲ့ဝင် ၁၃ သေဆုံးခဲ့တယ်လို့ တော်လှန်ရေးတပ်ဖွဲ့တွေက သတင်းထုတ်ပြန်ထားပါတယ်။
စစ်ကော်မရှင်တပ်ဟာ ရွေးကောက်ပွဲမတိုင်ခင် နယ်မြေရှင်းလင်းရေး ခေါင်းစဉ်နဲ့ ရေဖြူမြို့နယ်မှာ တစ်ရွာဝင် တစ်ရွာထွက် စစ်ကြောင်းထိုးတာတွေ ရှိနေတာပါ။
တစ်ရွာဝင် တစ်ရွာထွက် စစ်ကြောင်းထိုးနေတဲ့ စစ်ကော်မရှင်တပ်ဟာ ပြီးခဲ့တဲ့ စက်တင်ဘာ ၃၀ ရက်နေ့ကလည်း ဧကနိကျေးရွာက နေအိမ် ၁၀ လုံး မီးရှို့ဖျက်ဆီးခဲ့တယ်လို့ ဒေသခံတွေရဲ့ ပြောပြချက်အရ သိရပါတယ်။
သတင်း – သံလွင်တိုင်းမ်
ဓာတ်ပုံ-PDF