တိုကျို စက်တင်ဘာ ၁၀
ဂျပန်နိုင်ငံရဲ့ နာမည်ကျော် ဖူဂျီတောင်မှာ နွေရာသီတောင်တက်ရာသီ နောက်ဆုံးနေ့ဖြစ်တဲ့ စက်တင်ဘာ ၁၀ ရက်မှာ မိုးသည်းထန်ပြီး မြူထူထပ်နေချိန် မြေပြိုမှုတစ်ခု ဖြစ်ပွားခဲ့ပါတယ်။
စက်တင်ဘာ ၉ ရက်က လေပြင်းတိုက်ခတ်ပြီး မိုးသည်းထန်စွာ ရွာသွန်းခဲ့တာကြောင့် တောင်ပေါ်ရှိ ကားရပ်နားရာနေရာတစ်ခုမှာ တောင်ပေါ်မှာအလုပ်လုပ်နေသူတွေရဲ့ မော်တော်ယာဉ် ၃ စီး မြေကြီးအောက် တစ်စိတ်တစ်ပိုင်း မြုပ်သွားခဲ့ပါတယ်။
ဒါပေမယ့် မြေပြိုမှုကြောင့် ထိခိုက်ဒဏ်ရာရသူ မရှိခဲ့ဘူးလို့ ရှင်ဇူအိုကာ ဒေသအစိုးရ တာဝန်ရှိသူတွေက ပြောပါတယ်။
အဲဒီ မြေပြိုမှုဟာ ပင်လယ်ရေမျက်နှာပြင်အထက် ၃,၇၇၆ မီတာ မြင့်တဲ့ ဖူဂျီတောင်ကို တက်ရောက်နိုင်တဲ့ အဓိကဝင်ပေါက် ၄ ခုထဲက တစ်ခုမှာရှိတဲ့ ကားရပ်နားရာနေရာမှာ ဖြစ်ပွားခဲ့တာပါ။
မြေပြိုမှုအပြင် စက်တင်ဘာ ၉ ရက်တည်းမှာပဲ တောင်တက်သမား ၂ ဦး အရေးပေါ်အကူအညီ လိုအပ်ခဲ့တာကြောင့် ရဲတပ်ဖွဲ့က ကယ်ဆယ်ရေးလုပ်ဆောင်ခဲ့ပါတယ်။
အသက် ၃၀ နဲ့ ၄၀ ကြားခန့် အမျိုးသားတစ်ဦးကို တောင်ထိပ်အနီးမှာ လဲကျနေတဲ့အခြေအနေနဲ့ တွေ့ရှိခဲ့ပြီး၊ နောက်ထပ် အသက် ၆၀ ကျော်ခန့် အမျိုးသားတစ်ဦးကိုတော့ တောင်တက်လမ်းပေါ်မှာ လဲကျနေတဲ့အခြေအနေနဲ့ တွေ့ရှိခဲ့တာ ဖြစ်ပါတယ်။
သူတို့နှစ်ဦးရဲ့ လက်ရှိကျန်းမာရေးအခြေအနေကိုတော့ ရဲတပ်ဖွဲ့က အသေးစိတ်ထုတ်ပြန်ခြင်း မရှိသေးပါဘူး။
စက်တင်ဘာ ၁၀ ရက် မနက်ပိုင်းမှာ ရိုက်ကူးထားတဲ့ ဗီဒီယိုနဲ့ ဓာတ်ပုံတွေမှာလည်း တောင်တက်လမ်းတွေနဲ့ ကားလမ်းတွေကို မိုးရေနဲ့ မြူထူထပ်စွာ ဖုံးလွှမ်းနေတဲ့အခြေအနေကို တွေ့ရပါတယ်။
ဖူဂျီတောင်ဟာ တရားဝင်တောင်တက်ခွင့်ပြုတဲ့ ဇူလိုင်လကနေ စက်တင်ဘာလအထိ ကာလအတွင်း နှစ်စဉ် တောင်တက်သမား ၂၀၀,၀၀၀ ကျော် လာရောက်လေ့ရှိတဲ့ နာမည်ကျော် ခရီးသွားနေရာတစ်ခု ဖြစ်ပါတယ်။
ဒါပေမယ့် နှစ်စဉ် တောင်တက်သမားတွေထဲမှာ အရေးပေါ်ကယ်ဆယ်ရသူ ဒါဇင်နဲ့ချီရှိပြီး သေဆုံးသူ တချို့လည်း ရှိခဲ့ပါတယ်။
ခရီးသွားဧည့်သည်များပြားလာမှုကြောင့် ဖြစ်ပေါ်နေတဲ့ ခရီးသွားအလွန်လာရောက်တဲ့ ပြဿနာကို လျှော့ချဖို့ မကြာသေးမီနှစ်တွေမှာ ဖူဂျီတောင်တက်ခွင့်နဲ့ပတ်သက်တဲ့ စည်းမျဉ်းတွေကိုလည်း တင်းကျပ်လာပါတယ်။
အထူးသဖြင့် အဆင်သင့်မဖြစ်ဘဲ တောင်တက်လာသူတွေ တောင်ထိပ်အထိ မတက်နိုင်အောင် စီမံချက်တွေချမှတ်ထားပြီး တောင်တက်လမ်းတလျှောက်ရှိ တောင်တက်အနားယူစခန်းတွေမှာ အနည်းဆုံး တစ်ညအိပ်ဖို့ သတ်မှတ်ထားပါတယ်။
Ref:AFP