တနင်္သာရီ၊ ဧပြီ ၂၅
တနင်္သာရီတိုင်း တနင်္သာရီမြို့နယ် ဗောဓိကမ်း-ညောင်ပင်ကွင်းကျေးရွာလမ်းပိုင်းမှာ စစ်ကော်မရှင်တပ် စစ်ကြောင်းထိုးနေတာကြောင့် ကျေးရွာ ၁၀ ရွာက ဒေသခံတွေ ထွက်ပြေးတိမ်းရှောင်နေရတယ်လို့ တော်လှန်ရေးအင်အားစုတွေထံကနေ သိရပါတယ်။
အင်အား ၂၀၀ ဝန်းကျင်ပါတဲ့ စစ်ကော်မရှင်တပ်ဟာ ပြီးခဲ့တဲ့ ဧပြီ ၂၁ ရက်နေ့ကစလို့ ဗောဓိကမ်း-ညောင်ပင်ကွင်းကျေးရွာ လမ်းပိုင်းကို အင်အားအလုံးအရင်းနဲ့ စစ်ကြောင်းထိုးလာတာကြောင့် အဲဒီလမ်းပိုင်းရှိ ကျေးရွာတွေက ဒေသခံတွေ ကြိုတင်ထွက်ပြေးတိမ်းရှောင်နေရတာပါ။
တော်လှန်ရေးအင်အားစုတွေရဲ့ ပြောပြချက်အရ အဲဒီစစ်ကော်မရှင် စစ်ကြောင်းဟာ တနင်္သာရီမြို့ပေါ်ကနေ ညောင်ပင်ကွင်းအခြေစိုက် ခမရ ၅၆၁ တပ်ရင်းမှတဆင့် ငါးမိုင်၊ ခြောက်မိုင်ကျေးရွာဘက်ကို စစ်ကြောင်းထိုးနေတာ ဖြစ်ပါတယ်။
ဧပြီ ၂၂ ရက်နေ့နဲ့ ၂၃ ရက်နေ့ကလည်း ငါးမိုင်ကျေးရွာနဲ့ ခြောက်မိုင်ကျေးရွာအနီးမှာ စစ်ကြောင်းထိုးလာတဲ့ စစ်ကော်မရှင်တပ်နဲ့ တော်လှန်ရေးအင်အားစု ပူးပေါင်းတပ်တွေကြား နှစ်ဖက်တိုက်ပွဲဖြစ်ပွားခဲ့ပြီး စစ်ကော်မရှင်ဘက်က ထိခိုက်တာတွေ ရှိခဲ့တယ်လို့ မြိတ်ခရိုင်အမှတ် ၂ တပ်ရင်း ပြန်ကြားရေးတာဝန်ခံက သံလွင်တိုင်းမ်ကို ပြောပါတယ်။
စစ်ကော်မရှင်ရဲ့ စစ်ကြောင်းထိုးမှုကြောင့် ငါးမိုင်၊ ခြောက်မိုင်၊ ဆင်ခေါင်း၊ ဘန်လော၊ ဘန်လင်၊ ထုံထော်၊ ကျွဲထိန်းကုန်းစတဲ့ ကျေးရွာ ၁၀ ရွာက ဒေသခံတွေ ကြိုတင်ထွက်ပြေးတိမ်ရှောင်နေကြသလို ကျေးရွာအတွင်း ပိတ်မိနေတဲ့ ဒေသခံတွေလည်း ရှိတယ်လို့ ဆိုပါတယ်။
အရင်က စစ်ကြောင်းထိုးရင် စစ်ကြောင်းနဲ့တိုးတဲ့ အရပ်သားပြည်သူတွေကို စစ်ကော်မရှင်တပ်က ဖမ်းဆီးတာတွေ လုပ်ဆောင်လေ့ရှိပေမယ့် လက်ရှိမှာတော့ ဖမ်းဆီးတာတွေမရှိတဲ့အပြင် ကျေးရွာအတွင်း ပိတ်မိနေတဲ့ အရပ်သားတွေကိုလည်း အပြင်မထွက်ခိုင်းဘဲ နေအိမ်အတွင်းမှာ နေခိုင်းထားတယ်လို့ ဆိုပါတယ်။
ဒါကြောင့် တနင်္သာရီမြို့နယ် ဗောဓိကမ်း-ညောင်ပင်ကွင်းကျေးရွာလမ်းပိုင်းရှိမှာ လတ်တလော ဖြစ်ပေါ်နေတဲ့ စစ်ရေးအခြေအနေတွေကြောင့် အဲဒီလမ်းပိုင်းတွေ အသုံးမပြုကြဖို့နဲ့ ဘေးကင်းရာကို ကြိုတင်ပြောင်းရွှေ့ကြဖို့ မြိတ်ခရိုင် အမှတ် ၂ တပ်ရင်းက ဧပြီ ၂၂ ရက်နေ့ ရက်စွဲနဲ့ ထုတ်ပြန်ထားပါတယ်။
သတင်း – သံလွင်တိုင်းမ်
ဓာတ်ပုံ-CJ