သံဖြူဇရပ် နိုဝင်ဘာ ၁၅
သံဖြူဇရပ်မြို့နယ်တွင် တန်ဆောင်တိုင်မီးထွန်းပွဲတော်အထိမ်းအမှတ် ကီလိုမီတာ(၇၀) လမ်းကြမ်း စက်ဘီးစီးပြိုင်ပွဲအား နိုဝင်ဘာ(၁၄)ရက်နေ့ နံနက်ပိုင်းက ကျင်းပပြုလုပ်ခဲ့သည်။
အဆိုပါပြိုင်ပွဲတွင် သံဖြူဇရပ်မြို့ ဒေသခံ စက်ဘီးသမားများကသာ ပထမ၊ ဒုတိယနှင့် တတိယဆုများ ကို ဆွတ်ခူးရရှိခဲ့သည်။
” ဒို့မြို့မှာ လွန်ခဲ့တဲ့နှစ်ပေါင်း(၃၀)လောက်က ပျောက်ကွယ်သွားတဲ့ တန်ဆောင်တိုင်ပွဲတော်ကို ရိုးရာ အစဉ်လာမပျက် ကျင်းပသွားချင်တာရယ်။ ကိုယ့်မြို့ကိုယ့်ရွာကို အေးချမ်းသာယာတဲ့ ပတ်ဝန်းကျင်ကို ကယ် တင်ချင်တာရယ်၊ တစ်ဖက်ကိုအာရုံမရောက်ပဲနဲ့ ဒီအပေါ်မှာစိတ်ဝင်စားမူရှိဖို့ စိတ်လေလွင့်တဲ့ လူငယ်တွေ မူးယစ်ဆေးဝါးသုံးစွဲမှုတွေလျော့သွားဖို့။ ကိုယ့်မြို့ကိုယ့်ရွာမှာရှိတဲ့ ရွက်ပုန်းသီးပညာသည်လူငယ်တွေကို ဖော် ထုတ်ပေးချင်တဲ့ဆန္ဒကြောင့် လုပ်ဖြစ်တာပါ” ဟု ကျင်းပရေးကော်မတီမှ အမြဲစိမ်းကိုအောင်က ပြောသည်။
“စက်ဘီးစီးပြိုင်ပွဲတွေက နေရာတော်တော်များများ မှာမရှိတော့ဘူး။ ခုလိုကျင်းပပေးတဲ့အတွက် လူငယ် မျိုးဆက်သစ်စက်ဘီးစီးအားကစားသမားတွေ ပေါ်ပေါက်လာစေတယ်။ နောက်ပြီးမြို့ရဲ့ တန်ဆောင်တိုင်ပွဲတော် လည်း ပိုပြီးစည်ကားမှုဖြစ်စေတာပေါ့။ နောက်ပြီး စက်ဘီးစီးပြိုင်ပွဲတွေကို သံဖြူဇရပ်နှင့် မော်လမြိုင်လောက်သာ ကျင်းပတာ တွေ့ရပြီး ကျန်တဲ့မြို့နယ်တွေလည်း ပြိုင်ပွဲပြုလုပ်ကျင်းပနိုင်ဖို့လည်းမျှော်လင့်မိတယ်”ဟု မုဒုံမှ လူငယ်စက်ဘီးစီးအားကစားသမား ကိုဇော်လင်းထက်ကပြောသည်။
လမ်းကြမ်းစက်ဘီးစီးပြိုင်ပွဲတွင် ပထမဆုအားသံဖြူဇရပ်မြို့နယ် ဝဲခမိကျေးရွာမှ စောဆန်းအေး၊ ဒုတိယ ဆုအား သံဖြူဇရပ်မြို့ ကြာကန်ရပ်ကွက်မှ ဇော်လင်း၊ တတိယဆုအား သံဖြူဇရပ်မြို့မှ ရဲဝင်းတို့ရှိခဲ့ကြောင်း သိရသည်။
သတင်း – ကျဲရော့
Thanlwintimes