မကွေး၊ ဩဂုတ် ၆
မကွေးတိုင်း မြိုင်မြို့နယ်မှာ စစ်ကောင်စီတပ်တွေနဲ့ ပြည်သူ့ကာကွယ်ရေးတပ်တို့ကြား ဖြစ်ပွားခဲ့တဲ့ တိုက်ပွဲအတွင်း ရဲကင်းစခန်းတစ်ခုနဲ့ လက်နက်ခဲယမ်းတွေကို သိမ်းဆည်းရရှိခဲ့တဲ့အပြင် စစ်ကောင်စီဘက်က ၃ ဦးသေဆုံးခဲ့တယ်လို့ People Democratic Army (PDO/PDA) ထံကသိရပါတယ်။
ပြီးခဲ့တဲ့ ဩဂုတ် ၃ ရက်မှာ မြိုင်မြို့နယ်က ကိုင်းတောမစခန်းနဲ့ ရေစက်ကုန်းရဲကင်းတို့ကို တိုက်ခိုက်ခဲ့တဲ့ တိုက်ပွဲအတွင်း ရေစက်ကုန်းရဲကင်းကို သိမ်းပိုက်နိုင်ခဲ့ပေမယ့် ကာကွယ်ရေးရဲဘော်နှစ်ဦး ကျဆုံးခဲ့တယ်လို့ PDA တပ်ဖွဲ့က ဆိုပါတယ်။ အဲဒီတိုက်ပွဲကို အဖွဲ့နှစ်ဖွဲ့ခွဲပြီး ၅ နာရီကြာ တိုက်ခိုက်ခဲ့ရတယ်လို့ သိရပါတယ်။
“ကျနော်တို့ အဖွဲ့အနေနဲ့ စစ်အာဏာရှင်စနစ်ကို အမြတ်ဖြတ်ဖို့အတွက် မူဝါဒတွေ လမ်းစဉ်တွေ ချမှတ်ပြီး လုပ်ဆောင်နေတာဖြစ်တယ်။ စစ် သုံး စစ်အမြစ်ပြတ်ဖို့ ရရာလက်နက်ကို ကိုင်စွဲပြီး လက်နက်ကိုင်တော်လှန်ရေးမှာ စစ်ကိုစစ်နဲ့တူအောင် တိုက်မယ်။ တိုက်ပွဲကို တိုက်ပွဲနဲ့ တူအောင် တိုက်မယ်။ ရန်သူကို ရန်သူလိုပဲ ကျင့်ကြံမယ်။ လူထုအားဖြင့် တော်လှန်ရေးကို အနိုင်တိုက်သွားပါမယ်” လို့ PDO/PDA ရဲ့ သတင်းနဲ့ ပြန်ကြားရေးက တာဝန်ရှိသူတစ်ဦးက သံလွင်တိုင်းမ်ကိုပြောပါတယ်။
တိုက်ပွဲအတွင်း PDO/PDA က အသက် ၁၇ နှစ်အရွယ် ရဲဘော် မဟောက်နဲ့ အသက် ၂၃ နှစ်အရွယ် အညာမြေတပ်ပေါင်းစုက ရဲဘော် G-Shock တို့ ကျဆုံးခဲ့တာပါ။
ရေစက်ကုန်းရဲကင်းစခန်းကို ရခဲ့ပေမယ့် ရဲဘော်နှစ်ဦး ကျဆုံးပြီး ထိခိုက်ဒဏ်ရာရသူတွေလည်းရှိတာကြောင့် ကိုင်းတောမ ရဲစခန်းကို စခန်း ခြံစည်းရိုးထိ ဝင်ရောက်တိုက်ခိုက်ခဲ့ပြီး ပြန်လည်ဆုတ်ခွာခဲ့ရတယ်လို့ သိရပါတယ်။
အဲဒီ တိုက်ခိုက်မှုကိုတော့ ပြည်သူ့ ဒီမိုကရက်တစ်တပ်တော် (PDA)၊ ပြည်သူ့တော်လှန်ရေးတပ်ဦး (PRF)၊ ကျောင်းသားတော်လှန်ရေးတပ်ဖွဲ့ (SRF)၊ ပြည်သူ့လွတ်မြောက်ရေး တပ်မတော် (PLA)-(အမှတ် ၈၁၅ တပ်ဖွဲ့ အနောက်မြောက်စစ်ဒေသ)၊ ပခုက္ကူစုဖွဲ့မှု (Young Force. PPDF. Thu Rain. Hunter Pakokku. Earthquake)၊ အညာမြေတပ်ပေါင်းစု၊ မြိုင်မြို့နယ် ပ.က.ဖနဲ့ မြိုင်စုဖွဲ့မှု တပ်ရင်းတို့က ပူးတွဲဖော်ဆောင်ခဲ့တာ ဖြစ်ပါတယ်။
သံလွင်တိုင်း
ဓာတ်ပုံ – PDO/PDA