KNU နယ်မြေမှာ ခြောက်လအတွင်း စစ်ကောင်စီကြောင့် အရပ်သား ၁၃၀ ကျော်သေဆုံး

မော်လမြိုင်၊ ဇူလိုင် ၁၄

ကော်သူးလေအုပ်ချုပ်နယ်မြေထဲမှာ စစ်ကောင်စီတပ်ရဲ့ လူ့အခွင့်အရေးချိုးဖောက်မှုတွေကြောင့် အခုနှစ် နှစ်ဝက်အတွင်း အရပ်သားပြည်သူ ၁၃၀ ကျော် သေဆုံးခဲ့ရပြီး ၁၀၀ နီးပါး ဖမ်းဆီးခံခဲ့ရတယ်လို့ ကရင်အမျိုးသားအစည်းအရုံး KNU ဗဟိုက ထုတ်ပြန်ပါတယ်။

အခုနှစ် ဇန်နဝါရီလကနေ ဇွန်လကုန်အထိ ကော်သူးလေအုပ်ချုပ်နယ်မြေထဲမှာ စစ်ကောင်စီတပ်က ပြည်သူလူထုအပေါ် လေကြောင်း၊ ဒရုန်းနဲ့ လက်နက်ကြီးပစ်ခတ်တိုက်ခိုက်တာ၊ သေနတ်နဲ့ အ ကြောင်းမဲ့ပစ်ခတ်တာ၊ မိုင်းထောင်တာစတဲ့ လူ့အခွင့်အရေးချိုးဖောက်မှုအကြိမ်ပေါင်း ၂၃၀၀ ထက်မနည်း ကျူးလွန်ခဲ့တယ်လို့ ထုတ်ပြန်ပါတယ်။

စစ်ကောင်စီတပ်ရဲ့ လူ့အခွင့်အရေးချိုးဖောက်မှုမျိုးစုံ ကျူးလွန်တာတွေကြောင့် ဒေသခံပြည်သူ ၉၆ ဦး ဖမ်းဆီးခြင်းခံခဲ့ရပြီး ၁၃၄ ဦး သေဆုံးခဲ့ရကာ ၄၃၉ ဦး ထိခိုက်ဒဏ်ရာရရှိခဲ့တယ်လို့ KNU က ဆိုပါတယ်။

ဒါ့အပြင် ဘုရားကျောင်း ၆ ကျောင်း၊ ဘုန်းကြီးကျောင်း ၂၃ ကျောင်း၊ စာသင်ကျောင်း ၁၄ ကျောင်း၊ ဆေးပေးခန်း ၂ ခန်း၊ ဆေးရုံ ၂ လုံးအပါအဝင် နေအိမ် ၁၀၂၄ လုံးထက်မနည်း ထိခိုက်ပျက်စီးဆုံးရှုံးခဲ့ရပြီး ပြည်သူ ၇ ဦး လမ်းပြပေါ်တာနဲ့ အတင်းအဓမ္မခိုင်းစေခြင်းကို ခံခဲ့ရတယ်လို့ ထုတ်ပြန်ချက်မှာ ပါရှိပါတယ်။

ဒီလို အရပ်သားပြည်သူလူထုအပေါ် စစ်ကောင်စီတပ်က ပစ်မှတ်ထားပြီး ရည်ရွယ်ချက်ရှိရှိနဲ့ အ ကြမ်းဖက်လုပ်ရပ်တွေကို ကျူးလွန်ကာ ပြည်သူလူထုရဲ့ ရပိုင်ခွင့်အခွင့်အရေးတွေကို ကျူးလွန်နေတဲ့အတွက် အာဏာသိမ်းကာလအတွင်း ထွက်ပြေးတိမ်းရှောင်ရသူ တစ်သန်းကျော်အထိ ရှိလာခဲ့တာပါ။

ဒါ့အပြင် ကော်သူးလေအုပ်ချုပ်နယ်မြေထဲမှာ KNLA KNDO တော်လှန်ရေးပူးပေါင်းတပ်ဖွဲ့နဲ့ စစ်ကောင်စီတပ်တို့အကြား တိုက်ပွဲကြီးတိုက်ပွဲငယ်ပေါင်း ၁၈၂၇ ကြိမ်ဖြစ်ပွားခဲ့ရာ စစ်ကောင်စီဘက်က ၁၉၀၃ ဦး သေဆုံးပြီး ၁၂၇၅ ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။

အဲဒီတိုက်ပွဲအတွင်း ကရင်အမျိုးသားလွတ်မြောက်ရေးတပ်မတော် KNLA ၊ KNDO အပါအဝင် တော်လှန်ရေးပူးပေါင်းတပ်ဖွဲ့ဘက်ကလည်း ၈၁ ဦး ကျဆုံးပြီး ၂၉၈ ဦး ထိခိုက်ဒဏ်ရာရရှိခဲ့တယ်လို့ ထုတ်ပြန်ထားချက်အရ သိရပါတယ်။

သတင်း – သံလွင်တိုင်းမ်

ဓာတ်ပုံ-KHRG

Leave a Reply

This site uses Akismet to reduce spam. Learn how your comment data is processed.