ဘေဂျင်း ၊ဧပြီ ၂၈
ကမ္ဘာ့အင်အားကြီး နှစ်နိုင်ငံဟာ ပြိုင်ဘက်တွေမဟုတ်ဘဲ လက်တွဲဖော်တွေ ဖြစ်သင့်တယ်လို့ တရုတ်သမ္မတ ရှီကျင့်ဖျင်က အမေရိကန်နိုင်ငံခြားရေးဝန်ကြီး အန်တိုနီဘလင်ကန်ကို ပြောခဲ့ပါတယ်။
သမ္မတရှီက မိမိတို့ရဲ့ ဆက်ဆံရေးတွေမှာတော့ ဖြေရှင်းရမယ့် ကိစ္စတော်တော်များများရှိနေတယ် လို့ ဘလင်ကန်နဲ့ တွေ့ဆုံချိန်မှာပြောခဲ့တာပါ။
တစ်နှစ်အတွင်း တရုတ်ကို ဒုတိယအကြိမ်ရောက်ရှိလာတဲ့ ဘလင်ကန်ဟာ ဘေဂျင်းမှာ တရုတ်ထိပ် တန်းနိုင်ငံရေးသမားတွေနဲ့ တွေ့ဆုံမှာဖြစ်ပြီး တရုတ်၊ထိုင်ဝမ်အရေးနဲ့ ကုန်သွယ်ရေး အပါအဝင် အဓိက သဘောထားကွဲလွဲရာ နယ်ပယ်တွေနဲ့ ပတ်သက်ပြီး တင်ပြဆွေးနွေးသွားမှာဖြစ်တယ်လို့ အမေရိကန်အရာရှိတွေက ပြောပါတယ်။
ပြီးခဲ့တဲ့နှစ်က အမေရိကန်သမ္မတ ဂျိုးဘိုင်ဒန်နဲ့ တွေ့ဆုံပြီးနောက်ပိုင်း မိမိတို့နှစ်နိုင်ငံအနေနဲ့ တိုးတက်မှုတချို့ရှိအောင် လုပ်ဆောင်ဖို့ လိုအပ်နေတယ်လို့ ရှီက ပြောထားပါတယ်။
ဒါ့အပြင် တရုတ်ရဲ့ ဖွံ့ဖြိုးတိုးတက်မှုကို အမေရိကန်က အပေါင်းလက္ခဏာဆောင်တဲ့ အမြင်မျိုးနဲ့ ရှုမြင်ဖို့ မိမိတို့မျှော်လင့်တယ်လို့လည်း သူက ပြောပါသေးတယ်။
အခြေခံကျတဲ့ ပြဿနာတွေကို ဖြေရှင်းလိုက်မယ်ဆိုပါက နှစ်နိုင်ငံဆက်ဆံရေး တည်ငြိမ်ပြီး ပိုကောင်းလာမှာဖြစ်သလို ရှေ့ဆက်နိုင်မှာဖြစ်တယ်လို့ သမ္မတရှီက ပြောခဲ့ပါတယ်။
တရုတ်နဲ့ အမေရိကန် ဆက်ဆံရေးမှာ ထိုင်ဝမ်ဟာ မဖြတ်ကျော်သင့်တဲ့ ပထမဆုံးအနီရောင်စည်း ဖြစ်တယ်လို့ တရုတ်နိုင်ငံခြားရေးဝန်ကြီးက ဘလင်ကန်ကို အစောပိုင်းက သတိပေးထားပါတယ်။
ဘလင်ကန်အနေနဲ့ ဘေဂျင်းအခြေစိုက် အမေရိကန်သံရုံးမှာ သတင်းစာရှင်းလင်းပွဲ လုပ်ဆောင်ဖို့ ရှိတယ်လို့ သိရပါတယ်။
Ref:AFP/CNA