ဘန်ကောက်၊ သြဂုတ် ၅
နှစ်နိုင်ငံကြား အပစ်အခတ်ရပ်စဲရေး သဘောတူပြီးနောက် တစ်ပတ်ကြာတဲ့အထိ သဘောတူညီမှု ချိုးဖောက်တာတွေ ရှိနေချိန် သြဂုတ် ၇ ရက်မှာ ပြုလုပ်မယ့် ဝန်ကြီးအဆင့် ဆွေးနွေးမှု မတိုင်ခင် ကမ္ဘောဒီးယားနဲ့ထိုင်း ကာကွယ်ရေးအရာရှိတွေကြား မလေးရှားမှာ သြဂုတ် ၄ ရက်က စတင်ပြီး ကနဦး ဆွေးနွေးမှုတွေ ပြုလုပ်နေပြီ ဖြစ်ပါတယ်။
ကမ္ဘောဒီးယားနဲ့ ထိုင်းနယ်စပ်မှာ ၅ ရက်ကြာ တိုက်ပွဲတွေ ဖြစ်ပွားခဲ့ပြီးနောက် မလေးရှားမှာ အမေရိကန်ရဲ့ ကြားဝင် ညှိနှိုင်းပေးမှု၊ တရုတ်ရဲ့ စောင့်ကြည့်မှုနဲ့အတူ အပစ်ရပ်ရေး သဘောတူညီမှု ရရှိခဲ့ပါတယ်။
အိမ်နီးချင်း နှစ်နိုင်ငံကြား ဆယ်စုနှစ် တစ်စုကျော်အတွင်း အဆိုးရွားဆုံး တိုက်ခိုက်မှု ဖြစ်ပြီးနောက် လူ ၄၃ ဦး သေဆုံးခဲ့ပြီး လူပေါင်း ၃ သိန်းကျော် ထွက်ပြေးခဲ့ရပါတယ်။
နှစ်နိုင်ငံစလုံးက ကာကွယ်ရေးဝန်ကြီးတွေဟာ အထွေထွေနယ်စပ်ကော်မတီ အစည်းအဝေးကျင်းပဖို့ ရှိနေပြီး အပစ်အခတ်ရပ်စဲမှု ဘယ်လို ထိန်းသိမ်းမလဲဆိုတာ ဆွေးနွေးသွားမှာ ဖြစ်ကြောင်း ထိုင်းနဲ့ ကမ္ဘောဒီးယား အာဏာပိုင်တွေက ပြောပါတယ်။
သြဂုတ် ၇ ရက် ဆွေးနွေးမှုကိုတော့ အမေရိကန်၊ တရုတ်နဲ့ မလေးရှား ကိုယ်စားလှယ်တွေ စောင့်ကြည့်သွားမှာ ဖြစ်ပါတယ်။
အငြင်းပွားနေတဲ့ နယ်စပ်မှာ ထိုင်းက မြေတူးစက်တွေသုံးပြီး သံဆူးကြိုးတွေနဲ့ကာရန်ပြီးတော့ အပစ်အခတ် ရပ်စဲရေး သဘောတူညီမှုကို ချိုးဖောက်တယ်ဆိုပြီး ကမ္ဘောဒီးယား ကာကွယ်ရေးဝန်ကြီးဌာနက စွပ်စွဲထားပါတယ်။
လက်ရှိ ဆွေးနွေးမှုတွေ ပြုလုပ်နေပေမယ့် အိမ်နီးချင်း နှစ်နိုင်ငံကြား မယုံကြည်မှုတွေ မြင့်တက်နေတာ တွေ့ရပါတယ်။
ကမ္ဘောဒီးယားက သူတို့ရဲ့ စစ်သား ၁၈ ဦးကို တတ်နိုင်သမျှ အမြန်ဆုံး ပြန်လွှတ်ပေးဖို့ တောင်းဆိုထားပြီး ထိုင်းက ဒဏ်ရာရထားတဲ့ စစ်သား တချို့ကိုပဲ ပြန်လွှတ်ပေးထားတာ ဖြစ်ပါတယ်။
လက်ကျန် ကမ္ဘောဒီးယားစစ်သားတွေကို စစ်အကျဉ်းသားတွေ အဖြစ် ကောင်းကောင်း ပြုမူစောင့်ရှောက်ထားတယ်လို့ ထိုင်းအရာရှိတွေက ပြောကြားထားပါတယ်။
Ref:Reuters