မော်လမြိုင် ၊ ဇန်နဝါရီ (၁၃)
ကိုဗစ်-၁၉ အကြပ်အတည်းကာလ မွန်ပြည်နယ်အတွင်းမှာ အိမ်တွင်းအကြမ်းဖက်မှုတွေ ပိုမိုမြင့်တက်ခဲ့တယ်လို့ အမျိူးသမီးအရေး ဆောင်ရွက်နေသူတွေက ပြောပါတယ်။
၂၀၂၀ ခုနှစ် မတ်လက စတင်ခဲ့တဲ့ ကိုဗစ်-၁၉ ကပ်ရောဂါဟာ (၁)နှစ် နီးပါး ကြာမြင့်လာတာနဲ့အတူ လူထုအကြားမှာ စီးပွားရေး အကြပ်အတည်းတွေကိုလည်း ရင်ဆိုင်လာရပါတယ်၊
ဒီကာလအတွင်းမှာတော့ မွန်ပြည်နယ်မှာ အိမ်တွင်းအကြမ်းဖက်မှုတွေက အရင်ကာလထက် ပိုမို မြင့်တက်ခဲ့ပြီး တစ်ပတ်ကို အနည်းဆုံး တစ်ကြိမ်လောက် ဖြစ်ပေါ်နေတယ်လို့ မွန်အမျိုးသမီးကွန်ယက်မှ မိချယ်ရီစိုးက ပြောပါတယ်။
“မြို့နယ်တိုင်းမှာ အပတ်တိုင်း တစ်မှုနှစ်မှု မဖြစ်တဲ့ အပတ် မရှိဘူး။ သက်ငယ်မုဒိန်းတွေလည်း အရင်ထက် များလာတာပေါ့”လို့ ဆိုပါတယ်။
အရင်က safe house တွေမှာ အကူအညီ လာရောက်တောင်းခံတဲ့ အမျိူသမီးဟာ တစ်လကို (၁၀) ဦးဝန်းကျင်သာ ရှိပေမယ့် ကိုဗစ်ကာလမှာတော့ အယောက်(၃၀) လောက်အထိ မြင့်တက်ခဲ့တာ ဖြစ်ပါတယ်။
အခုလို အိမ်အတွင်းအကြမ်းဖက်မှုတွေ မြင့်တက်ခဲ့သလို တစ်ဖက်မှာလည်း သက်ငယ်မုဒိန်းမှုတွေက အရင်ကာလထက်စာရင် ပိုမို အဖြစ်များခဲ့တယ်လို့ အမျိုးသမီးအရေး ဆောင်ရွက်နေသူတွေက ပြောပါတယ်။
“အဓိက စီးပွားရေးပေါ့ ။ စီးပွားရေး အဆင်မပြေတဲ့အခါ အိမ်တွင်းအကြမ်းဖက်မှုတွေ ဖြစ်လာတယ်။ဒီအခြေအနေတွေမှာ သက်ငယ်မုဒိန်းတွေကလည်း ပိုများလာတယ်။အခုနှစ်သစ်မှာတင်ပဲ သက်ငယ်မုဒိန်း နှစ်မှုက အစောကြီး ဖြစ်နေပြီး”လို့ မေတ္တာဆုံစည်းအရပ်ဘက်အဖွဲ့အစည်း ဥက္ကဋ္ဌ ဒေါ်သီသီနွယ်က ပြောပါတယ်။
မွန်ပြည်နယ်ရဲတပ်ဖွဲ့ရဲ့ (၂၀၂၀)ခုနှစ် နိုဝင်ဘာလအထိ စာရင်းတွေအရတော့ မွန်ပြည်နယ်အတွင်းမှာ မုဒိန်းမှု (၈၉)မှု ဖြစ်ပွားခဲ့ပြီး အများစုကတော့ အသက်မပြည့်သေးတဲ့ သမီးရည်းစား စုံတွဲတွေ ဖြစ်တယ်လို့ ဖော်ပြထားပါတယ်။
သတင်း – သံလွင်တိုင်းမ်