မော်လမြိုင် ၊ ဧပြီ ၉
မွန်ပြည်နယ်မှာ အစိုးရအဖွဲ့ အပြောင်းအလဲ ဖြစ်လာပေမယ့် ဒေသတွင်းမှာတော့ လောင်းကစားဝိုင်းတွေကို ဆက်လက်ပြုလုပ်သွားဖို့ ရှိနေတယ်လို့ စစ်ကော်မရှင်နဲ့နီးစပ်သူတွေက သံလွင်တိုင်းမ်ကို ပြောပါတယ်။
စစ်တပ်ဦးဆောင်တဲ့ ရွေးကောက်ပွဲကနေ ပေါ်ထွက်လာတဲ့ မွန်ပြည်နယ် အစိုးရအဖွဲ့ရဲ့ ဝန်ကြီးချုပ်နဲ့ ဝန်ကြီးတွေကို ပြီးခဲ့တဲ့ ဧပြီ ၇ ရက်နေ့က ကျင်းပတဲ့ မွန်ပြည်နယ် လွှတ်တော် အစည်းအဝေးမှာ ကန့်ကွက်သူမရှိ အတည်ပြုခန့်အပ်ထားပါတယ်။
အဲဒီဝန်ကြီးတွေဟာ လာမယ့် မွန်ပြည်နယ် လွှတ်တော် အစည်းအဝေးမှာ ကျမ်းသစ္စာ ကျိန်ဆိုပြီး အစိုးရ တာဝန်တွေကို ထမ်းဆောင်ရတော့မှာ ဖြစ်ပါတယ်။
စစ်ကော်မရှင်နဲ့ နီးစပ်သူတွေရဲ့ ပြောပြချက်အရ မွန်ပြည်နယ် အစိုးရအဖွဲ့ အပြောင်းအလဲ ဖြစ်လာပေမယ့် ဒေသတွင်းမှာတော့ လောင်းကစားဝိုင်းတွေကို ဆက်လက်ပြုလုပ်သွားဖို့ အစီအစဉ် ရှိတယ်လို့ သိရပါတယ်။
လောင်းကစားဝိုင်းတွေက ရရှိလာတဲ့ ဝင်ငွေတွေဟာ စစ်ကော်မရှင် ဖွဲ့စည်းထားတဲ့ ပြည်သူ့စစ်အဖွဲ့အပါအဝင် ရပ်ရွာ ပြည်သူ့လုံခြုံရေးနဲ့အကြမ်းဖက်နှိမ်နင်းရေးအဖွဲ့တွေကို ထောက်ပံ့ပေးနေရတာကြောင့်လို့ ဆိုပါတယ်။
မော်လမြိုင် ဒေသခံ တစ်ဦးကတော့ လက်ရှိအချိန်ထိ ဒေသတွင်း နေရာအနှံ့မှာ လောင်းကစားဝိုင်းတွေ ဆက်ရှိနေသလို ဒေသတွင်းမှာ ရိုးရာတစ်ခုလိုတောင် ဖြစ်လာပြီလို့ ဝေဖန်ပါတယ်။
“လောင်းကစားဝိုင်းက ရှိနေတယ်။အခုက လုပ်နေတာပဲ။ ရွှေပြည်အေးမှာ ရှိတယ်။ဇေယျာသီရိမှာလည်း ဖြစ်နေတယ်။သာယာအေးမှာလည်း ဖြစ်နေတယ်။ လောင်းကစားဝိုင်းတွေကတော့ နေရာတိုင်းမှာရှိနေတယ်။ ပွဲကတော့ ကြည့်မယ့် လူတောင်မရှိဘူး။ လောင်းကစားက မပျောက်ဘူး။ ဒါက ရိုးရာလို ဖြစ်သွားပြီ”လို့ ဆိုပါတယ်။
လောင်းကစားဝိုင်းတွေဟာ စစ်တပ်အာဏာသိမ်းပြီးနောက် ဒေသတွင်းမှာ ကျယ်ကျယ်ပြန့်ပြန့် ရှိလာပြီး ဦးအောင်ကြည်သိန်း ဦးဆောင်တဲ့ အစိုးရလက်ထက်မှာ တရားဝင်သဖွယ် ပွဲပါမစ်တွေ ချပေးပြီး လုပ်ကိုင်ခွင့်တွေ ပေးအပ်ခဲ့တာပါ။
ဒေသတွင်းမှာ လောင်းကစားဝိုင်းတွေကြောင့် အရွယ်မရောက်သေးတဲ့ ကလေးသူငယ်တွေကအစ အကျင့် စာရိတ္တပိုင်း ဆိုင်ရာ ပျက်စီးမှုတွေ ရှိလာပေမယ့် မွန်ပြည်နယ်စစ်ကော်မရှင်ကတော့ လျစ် လျူရှုထားတာ ဖြစ်ပါတယ်။
မွန်ပြည်နယ်မှာတော့ လောင်းကစားဝိုင်းတွေကြောင့် မကြာခဏဆိုသလို ဆိုင်ကယ် ခိုးမှုတွေ၊ ခိုးဆိုးလုနှိုက်မှုတွေ၊ လိမ်လည်မှုတွေ ဆက်တိုက် ဖြစ်ပွားနေပေမယ့် စစ်ကော်မရှင်ကတော့ လောင်းကစားဝိုင်းတွေကို ဆက်လက်ခွင့်ပြုထားဆဲ ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ-CJ