မော်လမြိုင် ၊ ဧပြီ ၈
အာဏာသိမ်း စစ်ကော်မရှင်ရဲ့ မွန်ပြည်နယ်အစိုးရအဖွဲ့သစ် ဝန်ကြီးချုပ်နဲ့ ဝန်ကြီးနေရာ အများစုကို စစ်တပ်နဲ့ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီ ကိုယ်စားလှယ်တွေက ရယူခဲ့ပါတယ်။
မွန်ပြည်နယ်အစိုးရအဖွဲ့ရဲ့ ဝန်ကြီးချုပ်နဲ့ ဝန်ကြီးတွေကို ဧပြီ ၆ ရက်နေ့နဲ့ ဧပြီ ၇ ရက်နေ့က ကျင်းပတဲ့ မွန်ပြည်နယ် လွှတ်တော် အစည်းအဝေးမှာ ကန့်ကွက်သူမရှိ အတည်ပြုခန့်အပ်ခဲ့တာပါ။
အတည်ပြုခန့်အပ်ခံရတဲ့ ဝန်ကြီး ၁၁ ဦးမှာ မွန်ညီညွှတ်ရေးပါတီက ကိုယ်စားလှယ် နှစ်ဦး၊ ပအိုဝ်းအမျိုးသားတိုးတက်ရေးပါတီက ကိုယ်စားလှယ် တစ်ဦးသာ ပါဝင်ပြီး ကျန်ဝန်ကြီး ရှစ်ဦး နေရာကို စစ်တပ်နဲ့ ကြံ့ခိုင်ရေးပါတီက ရယူထားပါတယ်။
တပ်မတော်သား ကိုယ်စားလှယ်တွေဖြစ်တဲ့ ဗိုလ်မှူးချုပ် အောင်ဝင်းသန်းက မွန်ပြည်နယ် ဝန်ကြီးချုပ်၊ ဗိုလ်မှူးကြီး ကျော်စွာမြင့်၊ လုံခြုံရေးနဲ့နယ်စပ်ရေးရာ ဝန်ကြီး ရယူထားပါတယ်။
ကြံ့ခိုင်ရေးပါတီ ကိုယ်စားလှယ်တွေဖြစ်တဲ့ ဦးတင်ဇော်ထွန်းက လူမှုရေးဝန်ကြီး၊ ဦးမင်းဇေယျာဦးက လျှပ်စစ်၊စွမ်းအင်၊ စက်မှုနဲ့ လမ်းပန်းဆက်သွယ်ရေး ဝန်ကြီး၊ ဦးမင်းမြင့်မောင်လေးက စိုက်ပျိုးရေး၊ မွေးမြူရေးနဲ့ ဆည်မြောင်း ဝန်ကြီး၊ စစ်တပ် သြဇာခံ ဒေါက်တာ အောင်မြတ်ကျော်စိန်က စည်ပင်သာယာရေးဝန်ကြီး နေရာ ရယူထားတာပါ။
ဒါ့အပြင် ကြံ့ခိုင်ရေးပါတီ ကိုယ်စားလှယ်တွေဖြစ်တဲ့ ဦးမျိုးမင်းလှိုင်က ဗမာတိုင်းရင်းသားရေးရာ ဝန်ကြီး၊ ဦးစောအောင်ကျော်သိန်းက ကရင်တိုင်းရင်းသားရေးရာ ဝန်ကြီးနေရာ ရရှိထားပါတယ်။
မွန်ညီညွှတ်ရေးပါတီက ကိုယ်စားလှယ် နှစ်ဦးဖြစ်တဲ့ နိုင်လယိတမက စီမံကိန်းနဲ့ဘဏ္ဍာရေးဝန်ကြီး၊ မိလဝီဟန်က သယံဇာတနဲ့ သဘာဝပတ်ဝန်းကျင် ထိန်းသိမ်းရေးဝန်ကြီး၊ ပအိုဝ်းအမျိုးသားတိုးတက်ရေးပါတီက ကိုယ်စားလှယ် ဦးချစ်သိန်းက ပအိုဝ်းတိုင်းရင်းသားရေးရာ ဝန်ကြီးနေရာ ခန့်အပ်ခံခဲ့ရပါတယ်။
မွန်ပြည်နယ်အစိုးရအဖွဲ့ ဝန်ကြီးချုပ်နဲ့ ဝန်ကြီးတွေအဖြစ် ခန့်အပ်ခံရသူတွေဟာ လာမယ့် မွန်ပြည်နယ် လွှတ်တော် အစည်းအဝေးမှာ ကျမ်းသစ္စာ ကျိန်ဆိုသွားမယ်လို့ သိရပါတယ်။
သတင်း – သံလွင်တိုင်းမ်
ဓာတ်ပုံ-MOI