ဂျိုဟိုး ဘာရူး၊ သြဂုတ် ၇
ရုရှားကို ယုံကြည်ရတဲ့၊ အရေးကြီးတဲ့ မိတ်ဖက်အဖြစ် မလေးရှားက မှတ်ယူထားပြီး ပိုရင်းနီးတဲ့ ဆက်ဆံရေး ထူထောင်ဖို့ ဆန္ဒရှိတယ်လို့ ဘုရင် ဆူလ်တန် အေဗရာဟင် ဆူလ်တန်က သြဂုတ် ၆ ရက် မော်စကို ခရီးစဉ်အတွင်း သမ္မတ ဗလာဒီမာ ပူတင်ကို ပြောကြားခဲ့ပါတယ်။
ပူတင်ရဲ့ ဖိတ်ခေါ်ချက်အရ သြဂုတ် ၅ ရက်ကနေ သြဂုတ် ၁၀ ရက် အထိ သွားရောက်တဲ့ မလေးရှားဘုရင်ရဲ့ ခရီးစဉ်ဟာ နှစ်နိုင်ငံကြား ၁၉၆၇ ခုနှစ်မှာ သံတမန် ဆက်ဆံရေး စတင်ပြီး နောက်ပိုင်း မလေးရှား နိုင်ငံ့ခေါင်းဆောင်တစ်ယောက်ရဲ့ ပထမဆုံး နိုင်ငံတော်ခရီးစဉ် ဖြစ်ပါတယ်။
ရုရှားဖက်ဒရေးရှင်းသို့ သွားရောက်တဲ့ ဒီနိုင်ငံတော် ခရီးစဉ်ကြောင့် နှစ်နိုင်ငံကြား ဆက်ဆံရေးနဲ့ ပူးပေါင်းဆောင်ရွက်မှု ထပ်ပြီး အားကောင်းလာစေမှာ ဖြစ်တယ်လို့ ဘုရင် ဆူလ်တန် အေဗရာဟင်က ပြောပါတယ်။
မလေးရှားဟာ ရုရှားနဲ့ ဆက်ဆံရေး ထူထောင်တဲ့ အစောဆုံး အာဆီယံ နိုင်ငံတွေမှာ ပါဝင်တယ်လို့လည်း ဘုရင် ဆူလ်တန် အေဗရာဟင်က ဆိုတာပါ။
၂၀၂၅ ပထမ ၅ လအတွင်း မလေးရှားနဲ့ ရုရှားကြား အပြန်အလှန် ကုန်သွယ်မှု ၄၀ ရာခိုင်နှုန်း ပိုများလာခဲ့ပါတယ်။
မလေးရှားကို BRICS အဖွဲ့ဝင် ဖြစ်လာစေရေး ရုရှားက ထောက်ခံ ကူညီ ပေးဖို့ ဆန္ဒရှိတယ်လို့လည်း သိရပါတယ်။
မလေးရှား ကိုယ်စားလှယ် အဖွဲ့မှာ ကာကွယ်ရေးဝန်ကြီး၊ နိုင်ငံခြားရေး ဝန်ကြီးဌာန အတွင်းရေးမှူးချုပ်နဲ့ ရုရှားနိုင်ငံဆိုင်ရာ မလေးရှား သံအမတ်ကြီးတို့ ပါဝင်ပါတယ်။
လက်ရှိ အာဆီယံဥက္ကဋ္ဌ မလေးရှားအနေနဲ့ ရုရှားနဲ့ ဗဟာဗျူဟာမြောက် ပူးပေါင်းဆောင်ရွက်မှုတွေ ပြုလုပ်သွားမယ်လို့လည်း ဆိုပါတယ်။
မလေးရှားဘုရင်ဟာ စင်ကာပူ၊ တရုတ်နဲ့ ဘရူနိုင်းပြီးနောက် စတုတ္ထမြောက် နိုင်ငံတော် ခရီးစဉ်အဖြစ် ရုရှားသို့ ရောက်ရှိနေတာ ဖြစ်ပါတယ်။
ဝန်ကြီးချုပ် အန်ဝါလည်း ရုရှားသို့ ပြီးခဲ့တဲ့ နှစ်နှစ်အတွင်း နှစ်ကြိမ် သွားရောက်ခဲ့ပြီး နှစ်နိုင်ငံ ဆက်ဆံရေး တိုးမြှင့်ထားပါတယ်။
Ref:Agencies