တနင်္သာရီ၊ ဩဂုတ် ၇
တနင်္သာရီတိုင်း တနင်္သာရီမြို့နယ် အောက်ကင်း ကျေးရွာအခြေစိုက် အမှတ် ၅၅၇ ခြေမြန်တပ်ရင်းမှာ တာဝန်ထမ်း ဆောင်နေတဲ့ စစ်မှုထမ်း သင်တန်းဆင်း တပ်သားတစ်ဦး လက်နက်ခဲယမ်းနဲ့အတူ အလင်းဝင်ရောက်လာခဲ့တယ်လို့ တနင်္သာရီမြို့နယ် ပြည်သူ့ကာကွယ်ရေးအဖွဲ့ထံက သိရပါတယ်။
အောက်ကင်းကျေးရွာအခြေစိုက် ခမရ ၅၅၇ မှာ တာဝန်ထမ်းနေတဲ့ စစ်မှုထမ်းသင်တန်းဆင်း တပ်သားတစ်ဦးဟာ ပြီးခဲ့တဲ့ ဇူလိုင် ၃၀ ရက်နေ့မှာ ပြည်သူ့ကာကွယ်ရေးအဖွဲ့ထံ ဆက်သွယ် အလင်းဝင်ခဲ့တာပါ။
အလင်းဝင်လာတဲ့ စစ်ကောင်စီတပ်သားဟာ တပ်သား အမည်လွှဲ မောင်တင်ဝင်း ဖြစ်ပြီး သေနတ်တစ်လက်နဲ့အတူ အလင်းဝင်ခဲ့တယ်လို့ ဆိုပါတယ်။
မောင်တင်ဝင်းဟာ ရန်ကုန်တိုင်း ဇာတိဖြစ်ပြီး ညဖက်အပြင်သွားချိန် စစ်မှုထမ်း တပ်သားသစ် စုဆောင်းခံရကာ အပတ်စဉ် ၉ ကို တက်ရောက်ခဲ့ပြီးနောက် တနင်္သာရီမြို့နယ်အခြေစိုက် ခမရ ၅၅၇ တပ်ရင်းကို ရောက်ရှိလာခဲ့တာ ဖြစ်ပါတယ်။
အလင်းဝင်လာတဲ့ စစ်ကောင်စီတပ်သားကို တနင်္သာရီမြို့နယ် ပြည်သူ့ကာကွယ်ရေးအဖွဲ့က စောင့်ရှောက်ထားတယ်လို့ သိရပါတယ်။
ပြီးခဲ့တဲ့ ဇူလိုင် ၂၉ ရက်နေ့ကလည်း တနင်္သာရီမြို့နယ် သိန်းခွန်ရွာ ရှေ့တန်းတိုက်ပွဲမှာ တာဝန်ထမ်းဆောင်နေတဲ့ စစ်ကောင်စီတပ်သားနှစ်ဦး ကရင်အမျိုးသားလွတ်မြောက်ရေးတပ်မတော် KNLA တပ်ရင်း ၁၁ ထံ လက်နက်ခဲယမ်းနဲ့အတူ အလင်းဝင်ခဲ့တယ်လို့ သိရပါတယ်။
သတင်း – သံလွင်တိုင်းမ်
ဓာတ်ပုံ – တနင်္သာရီ ပကဖ