နေပြည်တော် ၊ ဩဂုတ် ၇
နေပြည်တော်ရှိ အမှတ် (၂) တပ်မတော်ဆေးရုံကြီး ခုတင် ၁၀၀ မှာ ဆေးကုသမှုခံယူနေတဲ့ ယာယီ သမ္မတ ဦးမြင့်ဆွေဟာ ဒီကနေ့ မနက် ၈ နာရီကျော်မှာ ကွယ်လွန်သွားပြီလို့ အမျိုးသားကာကွယ်ရေးနဲ့ လုံခြုံရေးကောင်စီက ဩဂုတ် ၇ ရက်နေ့မှာ သတင်းထုတ်ပြန်ပါတယ်။
ကွယ်လွန်ချိန်မှာ အသက် (၇၄) နှစ် ရှိပြီး အာရုံကြောတွေ နှေးကွေးတုန့်ဆိုင်းတဲ့ရောဂါအပြင် အဲဒီရောဂါနဲ့ ဆက်စပ်ဖြစ်ပေါ်တဲ့ အာရုံကြောအားနည်းရောဂါတွေ ရှိနေတာပါ။
ယာယီ သမ္မတ ဦးမြင့်ဆွေရဲ့ စျာပနကိုတော့ နိုင်ငံတော်စျာပနအဖြစ် ကျင်းပပြုလုပ်သွားမယ်လို့ ထုတ်ပြန်ချက်မှာ ဖော်ပြပါတယ်။
စစ်ကောင်စီထံကနေ အာဏာသုံးရပ်ကို လွှဲအပ်ခံထားရတဲ့ အမျိုးသားကာကွယ်ရေးနဲ့ လုံခြုံရေးကောင်စီက ဦးမြင့်ဆွေရဲ့ ကျန်းမာရေးဟာ အထူးစိုးရိမ်ဖွယ်အခြေအနေလို့ ဩဂုတ် ၅ ရက်နေ့မှာ သတင်းထုတ်ပြန်ခဲ့ပြီး နောက်နှစ်ရက် ဩဂုတ် ၇ ရက်နေ့မှာ ကွယ်လွန်ခဲ့တာဖြစ်ပါတယ်။
ဦးမြင့်ဆွေဟာ ၂၀၂၁ ခုနှစ် ဖေဖော်ဝါရီမှာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ဦးဆောင်တဲ့ စစ်တပ်အာဏာသိမ်းမှုမှာ ကျင်းပခဲ့တဲ့ အမျိုးသားကာကွယ်ရေးနဲ့ လုံခြုံရေးကောင်စီအစည်းအဝေးအတွင်း ယာယီ သမ္မတအဖြစ် တာဝန်ယူခဲ့သူပါ။
အဲဒီအစည်းအဝေးကနေ နိုင်ငံတော်ကို အရေးအပေါ်အခြေအနေဖြစ် ကြေညာဖို့ အုပ်ချုပ်ရေး၊ ဥပဒေပြုရေးနဲ့ တရားစီရင်ရေးအာဏာတွေကို တပ်မတော်ကာကွယ်ရေးဦးစီးချုပ်ထံ တစ်နှစ်လွှဲအပ်ဖို့ ဆုံးဖြတ်ခဲ့သူလည်း ဖြစ်ပါတယ်။
အဲဒီနောက်ပိုင်း ဖွဲ့စည်းပုံအခြေခံဥပဒေအရ ၆ လ သက်တမ်းကို နှစ်ကြိမ်အထိ တိုးခွင့်ရှိတဲ့အပေါ် စစ်ခေါင်းဆောင်တင်ပြလာတဲ့ အချက်တွေအားလုံးကို ထောက်ခံပေးပြီး အရေးပေါ်သက်တမ်းကို ၂၀၂၄ ခုနှစ် ဖေဖော်ဝါရီအထိ ဦးမြင့်ဆွေက တိုးမြှင့်ပေးခဲ့တာပါ။
ဒါ့အပြင် ၂၀၂၄ ခုနှစ် ဇူလိုင်လကုန်မှာ ခေါ်ယူတဲ့ ကာလုံအစည်းအဝေးမတိုင်ခင် ဇူလိုင် ၁၈ ရက်ကစတင်ပြီး နေအိမ်မှာ ဆေးခွင့်နဲ့ အနားယူကာ အထူးဆေးကုသမှုအဖွဲ့ရဲ့ အနီးကပ်ကျန်းမာရေးစောင့်ရှောက်မှုကို ခံယူခဲ့ပါတယ်။
ဒီအတွက်ကြောင့် ယာယီသမ္မတရုံးက အမျိုးသားကာကွယ်ရေးနဲ့ လုံခြုံရေးဆိုင်ရာကိစ္စရပ်တွေအတွက် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို ယာယီသမ္မတအဖြစ် ၂၀၂၄ ခုနှစ် ဇူလိုင် ၂၂ ရက်နေ့မှာ စတင် တာဝန်ပေးအပ်ခဲ့တာပါ။
အဲဒီနောက်ပိုင်း ၆ လ တစ်ကြိမ် ခေါ်ယူခဲ့တဲ့ ကာလုံအစည်းအဝေးကနေ အရေးပေါ်အခြေအနေ ပယ်ဖျက်တဲ့အချိန်အထိ ဦးမြင့်ဆွေရဲ့ ကျန်းမာရေးဆိုးရွားလာကာ စစ်ကောင်စီကနေ စစ်ကော်မရှင်အဖြစ် အသွင်ပြောင်းပြီး ရက်ပိုင်းအလိုမှာ ကွယ်လွန်ခဲ့တာ ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ – MOI