ညောင်လေးပင်၊ သြဂုတ် ၅
KNU ညောင်လေးပင်ခရိုင် တိုက်ပွဲအတွင်း ဖမ်းဆီးရမိထားတဲ့ စစ်သုံ့ပန်းတွေကို နေရပ်ကို ပြန်လည်ပို့ဆောင်ခဲ့ ပြီး နေရပ်မပြန်နိုင်သေးတဲ့ သူတွေကိုလည်း အလုပ်အကိုင်ရှာဖွေပေးကာ ထိန်းသိမ်းထားလျက်ရှိတယ်လို့ KNU ဗဟိုက ထုတ်ပြန်ပါတယ်။
ပြီးခဲ့တဲ့ ဇွန် ၂၅ ရက်နေ့က KNU မုန်းမြို့နယ် တောင်စုကျေးရွာမှာ စစ်ကြောင်းထိုးအထိုင်ချခဲ့တဲ့ စစ်ကောင်စီတပ်တွေကို ကရင်အမျိုးသားလွတ်မြောက်ရေးတပ်မတော် KNLAနဲ့ ပူးပေါင်းတပ်ဖွဲ့တို့က တိုက်ခိုက်ခဲ့ရာ လက်နက်ခဲယမ်းအများအပြားနဲ့ စစ်သုံ့ပန်း ၂၃ ဦးကို ဖမ်းဆီးရမိခဲ့တာပါ။
အဲဒီနေ့တစ်ရက်ထဲမှာပဲ KNU ကျောက်ကြီးမြို့နယ် တော်ဝိကျေးရွာမှာ ဖြစ်ပွားခဲ့တဲ့ နှစ်ဖက်တိုက်ပွဲမှာ လက်နက်ခဲယမ်းအများအပြားနဲ့ စစ်သုံ့ပန်း ၃ ဦးကို KNLA ပူးပေါင်းတပ်ဖွဲ့တွေက ဖမ်းဆီးရမိခဲ့ပါတယ်။
ဖမ်းဆီးရမိခဲ့တဲ့ စစ်ကောင်စီတပ်က စစ်သုံ့ပန်း ၂၆ ဦးကို စစ်စည်းကမ်းဥပဒေနဲ့အညီ KNLA တပ်ရင်း ၉ ထံမှာ ထိန်းသိမ်းထားပြီး အိမ်ပြန်လိုသူတွေကို ပြန်လည်ပို့ဆောင်ပေးတာ၊ လုံခြုံရေးအရ ပြန်လို့မရတဲ့သူတွေ၊ မပြန်လိုသူတွေကိုတော့ အလုပ်အကိုင်ရှာဖွေပေးပြီး ကောင်းမွန်စွာထိန်းသိမ်းထားလျက်ရှိတယ်လို့ KNU ဗဟိုက ဆိုထားပါတယ်။
ဖမ်းဆီးခံရတဲ့ စစ်ကောင်စီ စစ်သုံ့ပန်းတွေဟာ အများစုက မတရားစစ်မှုထမ်းခံရတဲ့သူတွေ ဖြစ်ကြပြီး အချို့ကတော့ စစ်မှုမထမ်းလိုတော့တဲ့ စစ်မှုထမ်းသက်ပြည့် စစ်သားတွေလည်းပါဝင်တယ်လို့ KNU ဗဟိုရဲ့ ထုတ်ပြန်ချက်မှာ ဖော်ပြပါတယ်။
ကရင်အမျိုးသားအစည်းအရုံး KNU အနေနဲ့ ဖမ်းဆီးရမိတဲ့ စစ်သုံ့ပန်းတွေကို ကောင်းမွန်စွာထိန်းသိမ်းထားပေမယ့် စစ်ကောင်စီက လူမှုကွန်ယက်ပေါ်မှာ ဝါဒဖြန့်သတင်းအမှားတွေကို ဖြန့်ဝေလျက်ရှိတာကို သတိထားနိုင်ကြဖို့ KNU ဗဟိုက အသိပေးထုတ်ပြန်ထားပါတယ်။
သတင်း – သံလွင်တိုင်းမ်
ဓာတ်ပုံ-KNU