ဝါရှင်တန်၊ ဇူလိုင် ၁၁
အမေရိကန်က ယူကရိန်းသို့ နေတိုးအဖွဲ့ကနေတစ်ဆင့် လက်နက်တွေ ပေးပို့သွားမှာ ဖြစ်ကြောင်း၊ ရုရှားနဲ့ ပတ်သက်လို့ ဇူလိုင် ၁၄ ရက်မှာ အဓိက ကြေညာချက် ထုတ်ပြန်သွားမယ်လို့ အမေရိကန်သမ္မတ ဒေါ်နယ် ထရန့်က ဇူလိုင် ၁၀ ရက်မှာ ပြောကြားလိုက်ပါတယ်။
၂၀၂၂ ခုနှစ် ဖေဖော်ဝါရီလမှာ ယူကရိန်းသို့ ရုရှားရဲ့ ရာနှုန်းပြည့် ကျူးကျော်မှုကြောင့် စတင် ဖြစ်ပေါ်လာခဲ့တဲ့ စစ်ပွဲ အဆုံးသတ်ရေး ကြိုးပမ်းမှု တိုးတက်မလာတဲ့အတွက် ရုရှားသမ္မတ ဗလာဒီမာ ပူတင် အပေါ် စိတ်ပျက်မိကြောင်း ထရန့်က ပြီးခဲ့တဲ့ ရက်ပိုင်းမှာ ပြောကြားခဲ့ ပါတယ်။
ထရန့်က ရုရှားနဲ့ ပတ်သက်လို့ ဇူလိုင် ၁၄ ရက်မှာ အဓိက ကြေညာချက်ထုတ်ပြန်သွားမယ်လို့ NBC News သတင်းဌာနသို့ ပြောကြားခဲ့ပေမယ့် အသေးစိတ်ကို ထုတ်ဖော်ပြောဆိုတာ မရှိပါဘူး။
အမေရိကန်က လက်နက်တင်ပို့မှုနဲ့ ပတ်သက်လို့ အမေရိကန်၊ နေတိုးနဲ့ ယူကရိန်းကြား သဘောတူညီမှု အသစ်တစ်ရပ် ရရှိထားတယ်လို့လည်း ထရန့်က ပြောကြားပါတယ်။
မိမိတို့က နေတိုးအဖွဲ့ဆီ လက်နက် ပေးပို့သွားမှာ ဖြစ်ပြီး အဲဒီ လက်နက်တွေအတွက် နေတိုးအဖွဲ့က ရာနှုန်းပြည့် ငွေပေးမှာ ဖြစ်တယ်လို့ ထရန့်က ဆိုတာပါ။
သမ္မတဟောင်း ဂျိုး ဘိုင်ဒန် လက်ထက်က ယူကရိန်းသို့ လက်နက် အများအပြား ပေးပို့ခဲ့ပေမယ့် ဒေါ်နယ်ထရန့် ဒုတိယအကြိမ် အိမ်ဖြူတော်သို့ ရောက်လာပြီးနောက်ပိုင်း အခုလက်နက် ပေးပို့မယ့် အစီအစဉ်ဟာ ပထမဆုံး ဖြစ်ပါတယ်။
သမ္မတ လုပ်ပိုင်ခွင့် အာဏာနဲ့ ထရန့် ရွေးချယ်ထားတဲ့ အဖွဲ့ တစ်ဖွဲ့က နေတိုး အဖွဲ့သို့ ပေးပို့မယ့် လက်နက် အမျိုးအစားတွေကို ရွေးချယ် ဆုံးဖြတ်မှာ ဖြစ်တယ်လို့ သတင်းရင်းမြစ် နှစ်ခုက ပြောပါတယ်။
အဲဒီ လက်နက်တွေဟာ အရေးပေါ် အခြေအနေတွေအတွက် အမေရိကန်က မဟာမိတ်တွေကို ပေးပို့နိုင်ရေး စုဆောင်းထားတဲ့ လက်နက်တွေ ဖြစ်ပါတယ်။
ယူကရိန်းအတွက် ရည်ရွယ်ပြီး အမေရိကန်က ထရန့်လက်ထက် နေတိုး အဖွဲ့သို့ ပထမဆုံး ပေးပို့မယ့် လက်နက်တွေရဲ့ တန်ဖိုးဟာ ဒေါ်လာ သန်း ၃၀၀ ရှိတယ်လို့ သတင်းရင်းမြစ် တစ်ခုက ပြောပါတယ်။
အမေရိကန်ရဲ့ လက်နက်ပေးပို့မှု ရပ်ဆိုင်းလိုက်တာနဲ့ ရုရှားက ဒရုန်းတွေနဲ့ အရှိန်မြှင့် တိုက်ခိုက်နေတာကြောင့် ယူကရိန်းတပ်ဖွဲ့ဝင်တွေကြား စိုးရိမ်မှုတွေ ထွက်ပေါ်နေပါတယ်။
Ref:Reuters