မကွေး၊ ဇူလိုင် ၃၀
မကွေးတိုင်း၊ မကွေးမြို့နယ် ကျေးရွာနှစ်ရွာက ပြည်သူတွေကို စစ်မှုထမ်းအတွက် ဖမ်းဆီးခေါ်ဆောင်တာတွေပြုလုပ်နေတယ်လို့ ဒေသခံတွေကပြောပါတယ်။
မကွေးမြို့နယ်၊ နေပြည်တော် – ကံပြား လမ်းပေါ်မှာရှိတဲ့ ဖိုးလေးလုံးရွာနဲ့ လေးတိုင်စင်ရွာကလူငယ်တွေ၊ လမ်းသွားလမ်းလာတွေကို စစ်ကောင်စီလက်အောက်ခံတပ်တွေက ဖမ်းဆီးထားတာဖြစ်တယ်လို့ သိရပါတယ်။
“ဘယ်အဖွဲ့ကဆွဲတာလဲတော့မသိရသေးဘူး။ ပြီးခဲ့တဲ့ ညောင်ပင်ရွာကိစ္စမှာတော့ ပျူခေါင်းဆောင် ကိုဝင်းမြိုင်နဲ့အဖွဲ့က ဆွဲတာ။ အခုလည်းသူပဲထင်ပါတယ်” လို့ ဒေသခံတစ်ဦးက သံလွင်တိုင်းမ်ကိုပြောပါတယ်။
အကြောင်းမဲ့အဖမ်းခံလိုက်ရတဲ့ လူငယ်အရေအတွက်မှာ ၁၀ ဦးထက် မကရှိနေပြီး မကွေး ၃၀၁ ခြေမြန်တပ်ရင်းကို ဖမ်းဆီးခေါ်ဆောင်သွားတယ်လို့ သိရပါတယ်။
ဖမ်းဆီးခံထားရသူတွေထဲက ငွေကြေးတတ်နိုင်သူတွေကို အနည်းဆုံးကျပ်သိန်း ၅၀ ပေးပြီးမှ ပြန်လည်ထုတ်ယူနိုင်ခဲ့တယ်လို့ ဆိုပါတယ်။
မကွေးတိုင်း စလင်းမြို့နယ်မှာလည်း အလားတူဖြစ်ရပ်မျိုးတွေဖြစ်ပွားနေပြီး အနည်းဆုံး ကျပ်သိန်း ၆၀ နဲ့ရွေးရတာမျိုးတွေလည်းရှိနေပါတယ်။
ဒါ့အပြင် မကွေးတိုင်းမှာ စစ်ကောင်စီပေါ်တာဆွဲတဲ့ ရက်တွေအတွင်း ပျောက်ဆုံးသွားတဲ့ အသက် ၁၄ နှစ်ကနေ ၁၇ နှစ်အရွယ်ကလေးငယ်တွေများလာတယ်လို့လည်း ဒေသခံတွေကပြောပါတယ်။
သံလွင်တိုင်းမ်
ဓာတ်ပုံ – MOI
ပုံစာ – မကွေးတိုင်းမှ ပြည်သူ့စစ်မှုထမ်းအပတ်စဉ် (၁/၂၀၂၄) သင်တန်းတက်ရောက်ခဲ့သူများ။