ပုလော၊ ဇူလိုင် ၃၁
တနင်္သာရီတိုင်း ပုလောမြို့နယ် ပုလောကုန်းကျေးရွာ ဘုန်းကြီးကျောင်းမှာ တပ်စွဲထားတဲ့ စစ်ကောင် စီစခန်းက တပ်ဖွဲ့ဝင်တွေအားလုံး စခန်းစွန့်ခွာထွက်ပြေးသွားတယ်လို့ တော်လှန်ရေးအင်အားစုအဖွဲ့တွေထံကနေ သိရပါတယ်။
စစ်ကောင်စီဟာ အဲဒီဘုန်းကြီကျောင်းမှာ ပြီးခဲ့တဲ့ ၂၀၂၂ နှစ်ကုန်ပိုင်းလောက်ကတည်းက ဝင်ရောက်တပ်စွဲခဲ့တာဖြစ်ပြီး စစ်ကောင်စီတပ်နဲ့ပြည်သူ့စစ်အဖွဲ့ဝင် ၃၀ နီးပါး စခန်းထိုင်တာ ဖြစ်ပါတယ်။
စစ်ကောင်စီတပ်နဲ့ပြည်သူ့စစ်အဖွဲ့ဝင်တွေ စွန့်ခွာထွက်ပြေးသွားတဲ့အတွက် အဲဒီစခန်းကို ကရင်အ မျိုးသားကာကွယ်ရေးတပ် KNDO အပါအဝင် တော်လှန်ရေးတပ်ဖွဲ့တွေက ဇူလိုင် ၂၉ ရက်နေ့မှာ နယ်မြေရှင်းလင်းရေး လုပ်ဆောင်ခဲ့တာပါ။
နယ်မြေရှင်းလင်းရေး လုပ်ဆောင်စဉ် စစ်ကောင်စီထံကနေ တူမီးနှစ်လက်၊ လက်လုပ်လေ သေနတ်တစ်လက်၊ ပြည်သူ့စစ်ပစ္စည်းတွေ၊ ရိက္ခာတချို့နဲ့ အသုံးအပြုပြီးသား လက်နက်ခဲယမ်းတချို့ သိမ်း ဆည်းရမိခဲ့ပါတယ်။
မြိတ်ခရိုင်တပ်ရင်း ၁ ပြန်ကြားရေးတာဝန်ခံက ပုလောကုန်းကျေးရွာကို တော်လှန်းရေးတပ်ဖွဲ့တွေ ထိန်းချုပ်ထားတဲ့အတွက် ပိတ်မိမှာစိုးရိမ်တာကြောင့် စခန်းစွန့်ခွာထွက်ပြေးသွားတာ ဖြစ်နိုင်တယ်လို့ သံလွင်တိုင်းမ်ကို ပြောပါတယ်။
စစ်ကောင်စီတပ်ဖွဲ့ဝင်တွေ စွန့်ခွာသွားတဲ့ ပုလောကုန်းရွာ ဘုန်းကြီးကျောင်း၊ စာသင်ကျောင်းနဲ့ ရွာထဲကနေရာတချို့မှာ ခြေနင်းမိုင်းတွေ ထောင်သွားတဲ့အတွက် ဒေသခံပြည်သူတွေအနေနဲ့ သတိ ထားသွားလာကြဖို့ တိုက်တွန်းတာပါ။
ဇူလိုင်လဆန်းပိုင်းတုန်းကလည်း ထိုင်း-မြန်မာနယ်စပ် တနင်္သာရီမြို့နယ် မိုးကဖော့စခန်းက စစ်ကောင်စီတပ်ဖွဲ့ ဝင်တွေအားလုံး စခန်းစွန့်ခွာခဲ့ပါသေးတယ်။
သတင်း – သံလွင်တိုင်းမ်
ဓာတ်ပုံ-CJ