မော်လမြိုင် ၊ မတ် (၃၁)
တနင်္သာရီတိုင်းဒေသကြီး၊ သရက်ချောင်းမြို့နယ်၊ တောင်ပျောက်တိုက်နယ်မှာ စစ်ကောင်စီတပ် အင်အားအလုံးအရင်းနဲ့ စစ်ကြောင်းထိုးလာတာကြောင့် ဒေသခံတွေ ထွက်ပြေး တိမ်းရှောင်နေရတယ်လို့ စစ်ရှောင်အရေးကူညီနေသူတွေက ပြောပါတယ်။
အင်အား ၂၀၀ လောက်ပါတဲ့ စစ်ကောင်စီ စစ်ကြောင်းဟာ မတ်လ ၃၀ ရက်နေ့ မနက်ပိုင်းမှာ တောင်ပျောက်တိုက်နယ်ထဲက သဲချောင်းကြီးကျေးရွာဘက်ကို စစ်ကြောင်းထိုးလာတာ ဖြစ်ပါတယ်။
စစ်ကောင်စီတပ်က အင်အားအလုံးအရင်းနဲ့ စစ်ကြောင်းထိုးလာတာကြောင့် သဲချောင်းကြီး၊ ဝင်းကဖော်၊ အလယ်စု၊ ကျွဲခြံရွာက ဒေသခံတွေဟာ ဘေးလွတ်ရာကို ထွက်ပြေးတိမ်းရှောင်နေရတာပါ။
စစ်ကြောင်းထိုးလာတဲ့ စစ်ကောင်စီတပ်ဟာ အခုအခါမှာတော့ သဲချောင်းကြီးကျေးရွာအနီးမှာ စခန်းချထားပြီး လက်နက်ကြီးတွေ အဆင့်သင့်တပ်ဆင်ထားတယ်လို့ ဒေသခံတွေက ပြောပါတယ်။
စစ်ကောင်စီဘက်က စစ်ကြောင်းထိုးလာတာကြောင့် ဒေသပြည်သူ့ကာကွယ်ရေးတပ်ဖွဲ့တွေနဲ့ နှစ်ဖက် တိုက်ပွဲဖြစ်ပွားမှာကို ဒေသခံတွေက စိုးရိမ်နေကြတာ ဖြစ်ပါတယ်။
ပြီးခဲ့တဲ့ရက်ပိုင်းကလည်း တောင်ပျောက်တိုက်နယ်ထဲက စစ်ကောင်စီတပ်ဟာ ဝင်းကဖော်ကျေးရွာဘက်ကို လက်နက်ကြီး ရမ်းသမ်းပစ်ခတ်တာတွေ လုပ်ဆောင်ထားပါတယ်။
သတင်း – သံလွင်တိုင်းမ်