မော်လမြိုင် ၊ စက်တင်ဘာ (၂၃)
မွန်တိုင်းရင်းသားတွေအနေနဲ့ လာမယ့် ရွေးကောက်ပွဲမှာ မွန်ညီညွတ်ရေးပါတီကိုသာ မဲပေးဖို့ မွန်လူငယ်ဆုံရပ်အဖွဲ့က စက်တင်ဘာလ (၂၂)ရက်နေ့မှာ ထုတ်ပြန်ချက်ထုတ်ပြီး တိုက်တွန်းလိုက်ပါတယ်။
လက်ရှိနိုင်ငံရေးဖြစ်စဉ်မှာ တစ်ပါတီစနစ် ကြီးစိုးမှုကြောင့် တိုင်းရင်းသားတွေရဲ့ အခွင့်အရေးတွေ ဆုံးရှုံးနေတယ်လို့ မွန်လူငယ်ဆုံရပ်အဖွဲ့က ဆိုထားပါတယ်။
ဒါကြောင့် လွှတ်တော်အတွင်းမှာ မွန်ပါတီရဲ့ ကိုယ်စားလောင်းတွေ နေရာရမှသာ မွန်တိုင်းရင်းသားတွေရဲ့ ဖွံ့ဖြိုးတိုးတက်ရေးကို ဆောင်ရွက်နိုင်မှာ ဖြစ်တယ်လို့ မွန်လူငယ်ဆုံရပ်အကြံပေးက ပြောပါတယ်။
“ တိုင်းရင်းသားပါတီတွေ အနိုင်ရလာရင် ကိုယ့်ကံကြမ္မာကို ကိုယ်ဖန်တီးခွင့်တွေ ပိုပြီးတော့ များပြားလာမယ် ။ တိုင်းရင်းသားအခွင့်အရေးတွေ ပိုပြီး များပြားလာမယ်လို့ ယုံကြည်တယ်” မွန်လူငယ်ဆုံရပ်အကြံပေး ဉာဏ်စိုက်ရာမာန်က ပြောပါတယ်။
မွန်လူငယ်ကွန်ယက်ဟာ မွန်တိုင်းရင်းသားလူငယ်တွေနဲ့ စုစည်းထားတာဖြစ်လို့ သူတို့ရဲ့ တိုက်တွန်းချက်အတိုင်း ဆောင်ရွက်သွားမယ်လို့ ရေးဒေသခံ တစ်ဦးက ပြောပါတယ်။
“ သူတို့ရဲ့ ထုတ်ပြန်ချက်အတိုင်း မွန်လူငယ်တွေက တက်တက်ကြွကြွ လိုက်နာကြတာကို တွေ့ရတယ် သူ့ရဲ့ထုတ်ပြန်ချက်အတိုင်း တစ်သွေးတစ်သံတည်းလို့ ပြောလို့ရပါတယ်” လို့ ရေးဒေသခံ မင်းစိုးသိန်းက ပြောပါတယ်။
မွန်လူငယ်ကွန်ယက်ဟာ ပြည်ပနိုင်ငံတွေအပြင် မွန် ၊ ကရင် ၊ တနင်္သာရီ ၊ ရန်ကုန်တိုင်းနဲ့ ပဲခူးတိုင်းတို့က မွန်လူငယ်တွေ စုစည်းထားတဲ့ ကွန်ယက် ဖြစ်ပါတယ်။
ပြီးခဲ့တဲ့ ၂၀၁၇ ခုနှစ်မှာတော့ မွန်ပြည်နယ် ဘီးလူးကျွန်း ချောင်းဆုံတံတားကို ဗိုလ်ချုပ်အောင်ဆန်းတံတားလို့ အမည်ပြောင်းလဲခဲ့တဲ့အပေါ် သောင်းနဲ့ချီတဲ့ မွန်လူထုက ကန့်ကွက်ကြောင်း အစိုးရအပေါ် ဆန္ဒပြခဲ့ပါတယ်။
သတင်း – ဝင်းနိုင်သက်