ဘားအံ၊ သြဂုတ် ၃၀
ကရင်အမျိုးသားအစည်းအရုံး KNU ကို အကြမ်းဖက်အုပ်စုနဲ့ မတရားအသင်းအဖြစ် အာဏာသိမ်း စစ်ကော် မရှင်ရဲ့ ကြေညာမှုအပေါ် ဘာမှဂရုစိုက်စရာမလိုကြောင်းနဲ့ ဒီလုပ်ရပ်ဟာ သူခိုးက လူကိုပြန်ဟစ်တာလို့ KNU ပြောခွင့်ရ ပဒိုစောတောနီးက တုံ့ပြန်လိုက်ပါတယ်။
KNU ကို စစ်ကော်မရှင်ရဲ့ အကြမ်းဖက်မှုတိုက်ဖျက်ရေးဗဟိုအဖွဲ့က ဩဂုတ် ၂၈ ရက်နေ့ ရက်စွဲနဲ့ အကြမ်းဖက် အုပ်စုအဖြစ် ကြေညာခဲ့သလို စစ်ကော်မရှင် ပြည်ထဲရေးဝန်ကြီးဌာနကလည်း မတရားအသင်းအဖြစ် ကြေညာချက်ထုတ်ပြန်ခဲ့တာ ဖြစ်ပါတယ်။
စစ်ကော်မရှင်ကတော့ KNU ဟာ အများပြည်သူလုံခြုံရေး၊ အသက်အိုးအိမ်စည်းစိမ်၊ နိုင်ငံပိုင်အ ဆောက်အအုံ၊ အခြေခံအဆောက်အအုံတွေ၊ လမ်းတံတားတွေနဲ့ မြို့ရွာတွေကို ဖျက်ဆီးခဲ့တယ်လို့ စွပ်စွဲထားပါတယ်။
KNU ပြောခွင့်ရ ပဒိုစောတောနီးက စစ်ကော်မရှင်ရဲ့ ကြေညာမှုဟာ သူခိုးက လူကိုပြန်ဟစ်တာ ဖြစ်လို့ ဘာမှဂရုစိုက်စရာမလိုကြောင်းနဲ့ စစ်အုပ်စုကသာ ကမ္ဘာသိ အကြမ်းဖက်သမားတွေ ဖြစ်တယ်လို့ ပြောပါတယ်။
အာဏာသိမ်း စစ်ကော်မရှင်က ပြုလုပ်ကျင်းပသွားမယ့်ရွေးကောက်ပွဲကို လုံးဝလက်မခံဘဲ ဆန့် ကျင်ကန့်ကွက်သွားမယ်လို့ KNU ဗဟိုက ထုတ်ပြန်ကြေညာလိုက်ပြီး ရက်ပိုင်းအတွင်းမှာပဲ စစ်ကော်မရှင်က KNU အပေါ် အကြမ်းဖက်အဖွဲ့နဲ့ မတရားအသင်းအဖြစ် ပြန်လည်ကြေညာခဲ့တာဖြစ်ပါတယ်။
စစ်အုပ်စုရဲ့ KNU အပေါ် မတရားအသင်းနဲ့အကြမ်းဖက်အုပ်စုအဖြစ် ကြေညာလိုက်တဲ့နောက် ဆက်တွဲကြောင့် ပြည်သူတွေဟာ အရင်အခြေအနေကထက် သွားလာရေးနဲ့ လုံခြုံရေးတွေမှာ ပိုခက်ခဲလာနိုင်သလို မတရားအသင်းနဲ့ ဆက်သွယ်တယ်ဆိုပြီး ခေါင်းစဉ်တပ် ဖမ်းဆီးမှုတွေ ပိုလုပ်လာနိုင်တယ်လို့ ကရင်လူ့အခွင့်အရေးအဖွဲ့-KHRG ရဲ့ ညွှန်ကြားရေးမှူး စောအဲဘတ်က ထောက်ပြပါတယ်။
အာဏာသိမ်း စစ်ကော်မရှင်ဘက်ကတော့ အထွေထွေရွေးကောက်ပွဲကို လာမယ့်ဒီဇင်ဘာလထဲမှာ ကျင်းပပြုလုပ်သွားမှာဖြစ်ပြီး ရွေးကောက်ပွဲမတိုင်ခင် ကရင်ပြည်နယ်ထဲက အာရှလမ်းမကြီးအပါအဝင် သင်္ဃန်းညီနောင်၊ မြဝတီမြို့တို့ကို ပြန်လည်စိုးမိုးထိန်းချုပ်နိုင်ဖို့အတွက် အပြင်းအထန် ထိုးစစ်ဆင်နေပါတယ်။
လက်ရှိ ကော့ကရိတ်မြို့ထဲကို စစ်ကော်မရှင်တပ်တွေက အင်အားအလုံးအရင်းနဲ့ ဖြည်းဆည်းထားနေပြီး တော်လှန်ရေးအင်အားစုတွေ စိုးမိုးထိန်းချုပ်ထားတဲ့ အာရှလမ်းမနဲ့ ဒေါနတောင်ပေါ်လမ်းဟောင်း၊ ကျုံဒိုး-နဘူးလမ်းတွေကို စစ်ကြောင်းထိုးလာခဲ့ရာ တိုက်ပွဲတွေဆက်လက်ပြင်းထန်နေတာဖြစ်ပါတယ်။
ဒါ့အပြင် မြဝတီမြို့နယ်တောင်ဘက် ထိုင်း-မြန်မာနယ်စပ်နားက ဝေါ်လေဗျူဟာစခန်းကုန်းကို KNLA ဦးဆောင်တဲ့ မဟာမိတ်ပူးပေါင်းအဖွဲ့တွေက ဆက်လက်ဝိုင်းရံပိတ်ဆို့တိုက်ခိုက်နေပြီး ဗျူ ဟာစခန်းကုန်းမကျရေးအတွက် စစ်ကော်မရှင်တပ်က လေကြောင်းကနေ အပြင်းအထန်ဗုံးကြဲပစ်ကူပေးကာ ခုခံတိုက်ခိုက်နေပါတယ်။
နိုင်ငံရေးလေ့လာသူတချို့ရဲ့ သုံးသပ်ချက်တွေအရ စစ်ကော်မရှင်က KNU ကို အကြမ်းဖက်အုပ်စုနဲ့ မတရားအသင်းအဖြစ် ကြေညာလိုက်တဲ့အတွက် တိုက်ပွဲတွေ ပိုမိုပြင်းထန်လာနိုင်ပြီး ဒေသတွင်းမှာရှိတဲ့ အရပ်သားလူထုတွေအပေါ်မှာလည်း ပစ်မှတ်ထားကာ စစ်ကော်မရှင်တပ်တွေက တိုက်ခိုက်တာတွေ ပိုမိုလုပ်ဆောင်လာနိုင်တယ်လို့ ဆိုထားပါတယ်။
သတင်း – သံလွင်တိုင်းမ်
ဓာတ်ပုံ-KNU