နေပြည်တော်၊ ဩဂုတ် ၃၀
နွေဦးတော်လှန်ရေးရဲ့ တပ်ဦးဖြစ်တဲ့ အမျိုးသားညီညွတ်ရေးအစိုးရ NUG ကို စစ်အနိုင်တိုက်ရေး အပြောင်းအလဲတွေ လုပ်ဖို့ စစ်အာဏာရှင်စနစ်ကို ဆန့်ကျင်နေကြသူတွေ ဝိုင်းဝန်းတိုက်တွန်းနေချိန်မှာ စစ်အရှိန်အမြှင့်ဖို့ အထူးတိုင်းစစ်ဌာနကို ဖွဲ့စည်းလာပါတယ်။
NUG ကာကွယ်ရေးဝန်ကြီးဌာနက ပြည်သူ့ကာကွယ်ရေးတပ်မတော်၊ အမှတ် (၁) စစ်ဆင်ရေးနယ်မြေရှိ တပ်ရင်းတွေ၊ ဗျူဟာတွေကို စနစ်တကျ စုဖွဲ့မှု ပြုလုပ်ပြီး အထူးတိုင်းစစ်ဌာနကို ဖွဲ့စည်းတာဝန်ပေးအပ်ခဲ့တယ်လို့ ဩဂုတ် ၂၇ ရက်နေ့မှာ ကြေညာခဲ့တာပါ။
အထူးတိုင်းစစ်ဌာနဟာ ပြည်သူ့ကာကွယ်ရေးတပ်မတော်၊ စစ်ရုံးချုပ်ရဲ့ တိုက်ရိုက်ကွပ်ကဲမှုအောက်မှာရှိပြီး အမှတ် (၁) စစ်ဆင်ရေးနယ်မြေရဲ့ စစ်ဆင်ရေးကွပ်ကဲမှုအောက်မှာရှိတဲ့ တိုင်းစစ်ဌာန ဖြစ်တယ်လို့ ကြေညာချက်မှာ ဖော်ပြပါတယ်။
အထူးတိုင်းစစ်ဌာနအနေနဲ့ တိုင်းစစ်ဌာနကွပ်ကဲမှုအောက်မှာရှိတဲ့ နည်းဗျူဟာတွေ၊တပ်ရင်းတွေနဲ့ တိုင်းစစ်ဌာနစစ်ဆင်ရေးကွပ်ကဲမှုအောက်မှာရှိတဲ့ ပြည်သူ့ကာကွယ်ရေးအဖွဲ့ (ပကဖ)တွေ၊ ဒရုန်းလက်ရုံးတပ်ဖွဲ့တွေကို ဦးစီးကွပ်ကဲပြီး မဟာမိတ် EROs တပ်ဖွဲ့တွေ၊ Local PDF တွေနဲ့အတူ စစ်ဆင်ရေးတွေကို အရှိန်အဟုန်မြှင့် ဖော်ဆောင်သွားမယ်လို့ အသိပေးထားတာပါ။
စစ်ရေးအခြေအနေတွေကိုလေ့လာနေတဲ့ CDM ဗိုလ်ကြီး ဇင်ယော်က မြေပြင်နဲ့ သဟဇာတဖြစ်မယ့် စီမံချက်မျိုး ဖော်ဆောင်လာတဲ့အတွက် ပြည်သူတွေရဲ့ မျှော်လင့်ချက်တွေနဲ့ နီးကပ်စွာ ထပ်တူကျလောက်မယ်လို့ သုံးသပ်ပါတယ်။
“အခုကတော့ အားလုံးမျှော်လင့်နေတဲ့ မြေပြင်နဲ့ သဟဇာတဖြစ်မယ့် စီမံချက်မျိုး ဖော်ဆောင်လာတယ်လို့ပဲ ကျွန်တော်တို့ကတော့ မျှော်လင့်ပါတယ်။ ဘာလို့လဲဆိုတော့ တော်လှန်ပြည်သူတွေ မျှော်လင့်ထားပြီးသားဖြစ်တဲ့ ရန်ကုန်မှာ ပြန်ဆုံမယ်တို့ လမ်းများအားလုံး နေပြည်တော်သို့တို့ ပြီးရင် နောက်ဆုံးလှိုင်းဆိုတဲ့ မျှော်လင့်ချက်တွေပေါ့။ ဒီမျှော်လင့်ချက်တွေကို ပြည်သူတွေရဲ့ ဆန္ဒနဲ့ နီးနီးကပ်ကပ်ရမယ့် မြေပြင်ဆောင်ရွက်မှုတစ်ခုနဲ့ ထပ်တူကျလောက်မယ့် စီမံချက်လို့ပဲ ကျွန်တော်တို့က မျှော်လင့်ပါတယ်”လို့ ဆိုပါတယ်။
အထူးတိုင်းစစ်ဌာနကိုတော့ မွန်ပြည်နယ်နဲ့ ကရင်ပြည်နယ်အတွင်းရှိ NUG ရဲ့ ကာကွယ်ရေးဝန်ကြီးဌာန ကွပ်ကဲမှုအောက်မှာရှိတဲ့ PDF တပ်ရင်းတွေ ဗျူဟာတွေနဲ့ စုဖွဲ့ထားတာလို့ ပြန်ကြားရေးတာဝန်ရှိသူက BBC မြန်မာပိုင်းကို ပြောကြားထားတာပါ။
ဒါ့အပြင် တိုင်းရင်းသားတော်လှန်ရေးအင်အားစုနယ်မြေတွေ လွတ်မြောက်ရေးကနေ ပဲခူးနဲ့ရန်ကုန်စစ်ဆင်ရေးအတွက် အဓိက စုဖွဲ့တည်ဆောက်ထားတာဖြစ်တယ်လို့ အထူးတိုင်းစစ်ဌာန ပြန်ကြားရေးတာဝန်ရှိသူက ဆိုပါတယ်။
NUG ရဲ့ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော်၊ တောင်ပိုင်းစစ်ဒေသမှာ စစ်ဆင်ရေးနယ်မြေနှစ်ခုရှိတဲ့ထဲမှာ အထူးတိုင်းစစ်ဌာနဟာ အမှတ် (၁) စစ်ဆင်ရေးနယ်မြေအတွင်း တည်ရှိနေတာ ဖြစ်ပါတယ်။
ပြည်သူ့ကာကွယ်ရေးတပ်မတော်၊သထုံခရိုင် တာဝန်ခံ ကိုအေးမင်းထွန်းက မြေပြင်မှာ ပြန့်ကျဲနေတဲ့ တော်လှန်ရေးအဖွဲ့တွေအားလုံး စုစည်းလိုက်တာဖြစ်လို့ စစ်ရေးအားသာချက်တွေ ဖြစ်လာမယ်လို့ သံလွင်တိုင်းမ်ကို ပြောပါတယ်။
“စစ်တိုင်းဖွဲ့လိုက်တာက စစ်ဆင်ရေးအရှိန်ဟုန်မြင့်ဖို့အတွက် အရမ်းကောင်းပါတယ်ခင်ဗျ။ မြေပြင်မှာ ပြန့်ကျဲနေတဲ့ တော်လှန်ရေးအဖွဲ့တွေအားလုံး စုစည်းလိုက်တာဖြစ်တယ်။ နောက် EROs တွေနဲ့ လက်တွဲပြီး ကျွန်တော်တို့ ဟန်ချက်ညီညီ စစ်ရေးဆောင်ရွက်မှာဖြစ်တဲ့အတွက် ပြည်သူတွေအားလုံးကလည်း အားရကျေနပ်လောက်မယ့် အားသာချက်တွေ ဖြစ်လာမှာပါဗျ”လို့ ဆိုပါတယ်။
တစ်ဘက်မှာ စစ်တပ်ကို အပြီးသတ် အနိုင်ယူရေးအတွက် အမျိုးသားညီညွတ်ရေးအစိုးရ NUG ကာကွယ်ရေးဝန်ကြီးဌာန ပြည်သူ့ကာကွယ်ရေးတပ်မတော်ရဲ့ တပ်မှူးကြီးများအစည်းအဝေးကို ဩဂုတ် ၂၃ ရက်ကနေ ၂၅ ရက်နေ့အထိ အောင်မြင်စွာ ကျင်းပနိုင်ခဲ့တယ်လို့ သတင်းထုတ်ပြန်ပါတယ်။
အဲဒီအစည်းအဝေးမှာ စစ်ဦးစီးချုပ် အမှူးပြုလို့ ဒုစစ်ဦးစီးချုပ်နဲ့ စစ်ရုံးချုပ်တာဝန်ရှိသူတွေ၊ အမှတ်(၁)စစ်ဒေသ စစ်ဒေသမှူး၊ ပြည်သူ့ကာကွယ်ရေးတပ်မတော် တပ်မှူးကြီးတွေဖြစ်ကြတဲ့ တိုင်းစစ်ဌာန (၁၀) ခုက တိုင်းကွပ်ကဲရေးမှူးနဲ့ ဒုတိုင်းကွပ်ကဲရေးမှူးတွေ ကာကွယ်ရေးဝန်ကြီးဌာနက အကြီးတန်းအရာရှိတွေ တက်ရောက်ခဲ့ကြတာပါ။
ပြည်သူ့ခုခံတော်လှန်စစ်ရဲ့ စစ်ရေးအောင်ပွဲတွေ ဆက်လက် ရရှိနေစေရေး၊ ပြည်သူ့ကာကွယ်ရေးတပ်မတော်နဲ့ ပြည်သူ့ကာကွယ်ရေးအဖွဲ့တွေကို အမိန့်ပေးကွပ်ကဲမှု ကောင်းမွန်ပြီး ကျင့်ဝတ် လိုက်နာတဲ့ တပ်မတော်တရပ်အဖြစ် စနစ်တကျ ဆက်လက်တည်ဆောက်ရေးနဲ့ စစ်တပ်ကို အပြီးသတ် အနိုင်ယူနိုင်ရေးတို့ ပါဝင်ပါတယ်။
လက်ရှိ ပြည်သူ့ကာကွယ်ရေးတပ်မတော် စစ်ရုံးချုပ်ရဲ့ ကွပ်ကဲမှုအောက်မှာ အထူးတိုင်းစစ်ဌာနအပါအဝင် စစ်ကိုင်း၊ မကွေး၊ မန္တလေး၊ ရှမ်းတောင်-ကယား(ကရင်နီ)၊ နေပြည်တော်၊ ပဲခူး၊ ရန်ကုန်၊ ဧရာဝတီနဲ့ တနင်္သာရီ စတဲ့ တိုင်းစစ်ဌာန ၁၀ ခုကို ဖွဲ့စည်းပြီး တပ်ရင်း၊တပ်ဖွဲ့တွေကို ကွပ်ကဲတိုက်ပွဲဝင်နေတယ်လို့ NUG ကာကွယ်ရေးဝန်ကြီးဌာနက အသိပေးထားတာပါ။
CDM ဗိုလ်ကြီး ဇင်ယော်ကတော့ အောင်ပွဲရဖို့ တစုတစည်းတည်း တိုက်တော့မယ့် တော်လှန်ရေးအခင်းအကျင်းမှာ အားတက်ဖွယ်ရာ မြင်ရမှာဖြစ်ပေမယ့် ထုတ်ပြန်ချက်ထက် ရလဒ်ကောင်းဖို့ မျှော်လင့်ကြတယ်လို့ ထောက်ပြပါတယ်။
“မြေပြင်မှာ စုစုစည်းစည်းနဲ့ တိုက်တဲ့ဟာတော့ အောင်ပွဲရဖို့ အမြန်ဆုံးပါပဲ။အဓိကတော့ စစ်တပ်ကလည်း အဲဒီလိုမျိုး တစုတစည်းတည်းနဲ့ ပြန်ပြီးတိုက်မှာကို သူတို့အကြောက်ဆုံးဖြစ်ပါတယ်။ ဒီလိုမျိုး မြေပြင်မှာ တစုတစည်းတည်း တိုက်တော့မယ်ဆိုတာမျိုး မြင်ရတော့မှာဖြစ်တဲ့အတွက် တော်လှန်ပြည်သူတွေကလည်း အားတက်စရာ တော်လှန်ရေးအခင်းအကျင်းပေါ့။ သူတို့ရဲ့ (စစ်တပ်) ရွေးကောက်ပွဲကြီးတွေ ဘယ်လို လုပ်နေနေ တော်လှန်ရေးအခင်းအကျင်းမှာ အားတက်ဖွယ်ရာ မြင်ရမှာလို့ပဲ တွေးရပါတယ်။ ဒါပေမယ့် ရှည်လျားလာတဲ့ တော်လှန်ရေးအတွေ့အကြုံတွေအရ တော်လှန်ပြည်သူတွေကလည်း Statement (ထုတ်ပြန်ချက်) တွေထက် Result တွေ (ရလဒ်) ကောင်းဖို့ပဲ မျှော်လင့်ကြမှာကို တွေ့ရပါတယ်” လို့ ဆိုပါတယ်။
တစ်ကျော့ပြန်လာတဲ့ စစ်တပ်ရဲ့ တန်ပြန်ထိုးစစ်တွေနဲ့အတူ ရွေးကောက်ပွဲမတိုင်ခင် တော်လှန်ရေးအင်အားစုတွေဘက်က အပြီးသတ်စစ်ဆင်ရေးနဲ့ပတ်သက်ပြီး ကိုအေးမင်းထွန်းက အသေးစိတ် ပြောလို့မရပေမယ့် ရွေးကောက်ပွဲကိုတော့ မဖြစ်ဖြစ်အောင် တားဆီးမယ်လို့ ပြောပါတယ်။
စစ်ကော်မရှင်က ဦးဆောင်ကျင်းပမယ့် အထွေထွေရွေးကောက်ပွဲ အပိုင်း ၁ ကို ဒီဇင်ဘာ ၂၈ ရက်နေ့မှာ နိုင်ငံတဝန်းရှိ ၁၀၂ မြို့နယ်မှာ စတင်ပြုလုပ်သွားမယ်လို့ ပြည်ထောင်စုရွေးကောက်ပွဲကော်မရှင်က အသိပေးထားတာပါ။
အဲဒီမြို့နယ်တွေအများစုဟာ စစ်ကော်မရှင် အပြည့်အဝထိန်းချုပ်ထားတဲ့ နယ်မြေတွေကို ဦးစားပေးထားပြီး တော်လှန်ရေးအင်အားစုတွေနဲ့ စစ်ရေးတင်းမာနေတဲ့ မြို့နယ်တချို့လည်း ပါဝင်နေပါတယ်။ ဒါ့အပြင် တစ်နိုင်ငံလုံးရှိ မြို့နယ်ပေါင်း ၃၃၀ ကို မဲဆန္ဒနယ်မြေတွေအဖြစ် သတ်မှတ်ထားတာပါ။
စစ်အာဏာရှင်စနစ်ကို ဆန့်ကျင်တိုက်ပွဲဝင်နေကြတဲ့ တော်လှန်ရေးအင်အားစုတွေကတော့ သူတို့ထိန်းချုပ်ထားတဲ့ နယ်မြေတွေအတွင်း စစ်ကော်မရှင်ရဲ့ ရွေးကောက်ပွဲကို ကျင်းပခွင့်ပြုမှာ မဟုတ်သလို ဆန့်ကျင်တိုက်ဖျက်သွားမယ်လို့ သဘောထားကိုယ်စီ ထုတ်ပြန် ပြောဆိုထားကြပါတယ်။
သတင်း – သံလွင်တိုင်းမ်
ဓာတ်ပုံ-NUG