မေတ္တာ၊ သြဂုတ် ၇
တနင်္သာရီတိုင်း မေတ္တာမြို့ ဆင်ဖြူတိုင်ကျေးရွာအနီးမှာ ကော်သူးလေအာမီ KTLA တပ်ဖွဲ့ဝင်တွေရဲ့ ခြုံခိုတိုက်ခိုက်မှုကြောင့် KNLA တပ်ဖွဲ့ဝင် လေးဦး ဒဏ်ရာရရှိခဲ့တယ်လို့ ကရင်အမျိုးသားအစည်းအရုံး KNU ဗဟိုက ထုတ်ပြန်ပါတယ်။
မနေ့ သြဂုတ် ၆ ရက်နေ့ မနက် ၁၀ နာရီအချိန်ခန့်မှာ ဗိုလ်အယ်ခွီး (ခ) ကော်လာဖိုး ဦးဆောင်တဲ့ KTLA တပ်ဖွဲ့ဝင်တွေက ကရင်အမျိုးသားလွတ်မြောက်ရေးတပ်မတော် KNLA တပ်မဟာ(၄) တပ်ဖွဲ့ဝင်တွေကို ခြုံခိုတိုက်ခိုက်ခဲ့တာပါ။
ဒီတိုက်ခိုက်မှုဟာ KNLA တပ်ဖွဲ့ဝင်တွေ မေတ္တာမြို့အနီးတစ်ဝိုက် လုံခြုံရေး ယူဖို့သွားနေစဉ် လမ်းမှာ ဗိုလ်အယ်ခွီး (ခ) ကော်လာဖိုး ဦးဆောင်တေဲ့ ကော်သူးလေအာမီ KTLA တပ်ဖွဲ့ဝင်တွေက ခြုံခိုတိုက်ခိုက်ခဲ့တာလို့ KNU ဆိုပါတယ်။
KNLA တပ်မဟာ(၄) တပ်ဖွဲ့ဝင်တွေကို တိုက်ခိုက်ခံရတဲ့ အခြေအနေနဲ့ ပတ်သက်ပြီး ကော်သူးလေအာမီ KTLA ဘက်က လက်ရှိအချိန်ထိ တစ်စုံတစ်ရာ သတင်းထုတ်ပြန်တာ မတွေ့ရသေးပါဘူး။
ပြီးခဲ့တဲ့ ဇူလိုင်လအတွင်း မေတ္တာ-ထီးခီးလမ်းပိုင်းမှာ ကရင်အမျိုးသားလွတ်မြောက်ရေးတပ်မတော် KNLA နဲ့ ကော်သူးလေအာမီ KTLA တပ်တို့အကြား သုံးကြိမ်ထက်မနည်း အပြန်အလှန် ပစ်ခတ်မှု ဖြစ်ပွားထားတာ ဖြစ်ပါတယ်။
သတင်း – သံလွင်တိုင်းမ်
ဓာတ်ပုံ – KNU