ဝါရှင်တန်၊ သြဂုတ် ၇
ယူကရိန်းစစ်ပွဲ အဆုံးသတ်ရေး လူကိုယ်တိုင် ဆွေးနွေးဖို့ ရုရှား၊ ယူကရိန်း ခေါင်းဆောင်တို့နဲ့ မကြာခင် တွေ့ဆုံနိုင်ဖို့ အလားအလာကောင်းနေပြီလို့ အမေရိကန်သမ္မတ ဒေါ်နယ် ထရန့်က ပြောပါတယ်။
ရုရှားသမ္မတ ဗလာဒီမာ ပူတင်နဲ့ သူ့ရဲ့ ကိုယ်စားလှယ်ကြား မော်စကိုမှာ ဆွေးနွေးမှုတွေဟာ အများကြီး အပြုသဘောဆောင်တယ်လို့ ထရန့်က သြဂုတ် ၆ ရက် ညက အိမ်ဖြူတော်မှာ ပြောခဲ့တာပါ။
ယူကရိန်းသမ္မတ ဇီလန်စကီးနဲ့ ပူတင်တို့က အဲဒီလို ထိပ်တိုက် ဆွေးနွေးဖို့ သဘောတူထားပါသလားလို့ မေးမြန်ရာမှာ ထရန့်က အလားအလာ အရမ်းကောင်းတယ်လို့ ပြောကြားပေမယ့် အသေးစိတ်ကိုတော့ ပြောဆိုသွားတာ မရှိပါဘူး။
အခုတစ်ကြိမ် တွေ့ဆုံမှုအတွက် ရုရှားခေါင်းဆောင်က အပြန်အလှန် အနေနဲ့ တစ်ခုခု ကမ်းလှမ်းခဲ့တာ ရှိသလားဆိုတဲ့ မေးခွန်းကိုလည်း ထရန့်က တိတိကျကျ မဖြေဘဲ ဆွေးနွေးမှုတွေ အရမ်းအပြုသဘော ဆောင်တယ်လို့ပဲ ပြောပါတယ်။
ပူတင်နဲ့အမေရိကန် ကိုယ်စားလှယ်ကြား တွေ့ဆုံမှုနဲ့ ပတ်သက်လို့ ကရင်မလင်နန်းတော်ရဲ့ ကြေညာချက်ဟာလည်း တိတိကျကျ ဖော်ပြထားတာ မတွေ့ရဘဲ အပြုသဘောဆောင်တဲ့ ဆွေးနွေးမှုတွေအဖြစ် နှစ်ဖက် အပြန်အလှန် ဆွေးနွေးခဲ့တယ်လို့ပဲ ဖော်ပြပါတယ်။
ယူကရိန်းမှာ အပစ်အခတ် ရပ်စဲဖို့ ၁၀ ရက်ကနေ ၁၂ ရက်အတွင်း ရုရှားက သဘောမတူရင် ပြင်းထန်တဲ့ အရေးယူမှုတွေ ပြုလုပ်သွားမယ်လို့ ထရန့်က ရာဇသံပေးထားတဲ့ ရက်မပြည့်ခင် ရက်အနည်းငယ်အလိုမှာ အခုလို တွေ့ဆုံမှု ထွက်ပေါ်လာတာ ဖြစ်ပါတယ်။
ရုရှားက အမေရိကန်သမ္မတနဲ့ တွေ့ဆုံဖို့ ဆန္ဒရှိပြီး သူကလည်း ရုရှား ယူကရိန်း ခေါင်းဆောင်တွေနဲ့ တွေ့ဆုံဖို့ လမ်းဖွင့်ထားတယ်လို့ အိမ်ဖြူတော်က ပြောပါတယ်။
အမေရိကန် ကိုယ်စားလှယ်ရဲ့ ရုရှားခရီးစဉ်နဲ့ ပတ်သက်လို့ ထရန့်ရော ဥရောပ ခေါင်းဆောင်တွေနဲ့ပါ ဆက်သွယ် ဆွေးနွေးခဲ့တယ်လို့ ဇီလန်စကီးက ပြောပါတယ်။
ရုရှားမှာ သုံးစရာ ငွေကုန်လာတဲ့ အချိန်ရောက်မှပဲ ငြိမ်းချမ်းရေးဆီသို့ လျှောက်လှမ်းဖို့ အမှန်တကယ် လုပ်ဆောင်လာလိမ့်မယ်လို့ သမ္မတ ဇီလန်စကီးက သတိပေးထားပါတယ်။
စစ်ပွဲ အဆုံးသတ်ရေး မဆောင်ရွက်ဘူးဆိုရင် ရုရှားကိုရော ရုရှားနဲ့ ကုန်သွယ်တဲ့ နိုင်ငံတွေကိုပါ အရေးယူသွားမှာ ဖြစ်တယ်လို့ ထရန့်က သတိပေးထားတာ ဖြစ်ပါတယ်။
Ref:BBC