ကိုင်ရို၊ သြဂုတ် ၄
အရိုးပေါ် အရေတင်နေတဲ့ ဓားစာခံ တစ်ဦးရဲ့ ဗီဒီယိုဖိုင် ထွက်ပေါ်လာပြီး အနောက်အင်အားကြီးနိုင်ငံတွေက ပြင်းပြင်းထန်ထန် ဝေဖန်ခဲ့ကြပြီးနောက် အစ္စရေးအနေနဲ့ သတ်မှတ်ချက်အချို့ ပြည့်မီအောင် လုပ်ပေးမယ်ဆိုရင် မိမိတို့ ဖမ်းဆီးထားတဲ့ ဓားစာခံတွေဆီ အကူအညီတွေ ပေးပို့ခွင့်ပြုရေး ကြက်ခြေနီအဖွဲ့နဲ့ ပူးပေါင်းဆောင်ရွက်သွားမှာ ဖြစ်ကြောင်း ဟားမာ့စ်အဖွဲ့က သြဂုတ် ၃ ရက်မှာ ပြောကြားလိုက်ပါတယ်။
အကူအညီတွေ ပေးနေချိန် အစ္စရေးအနေနဲ့ လေကြောင်းတိုက်ခိုက်မှုတွေ ရပ်တန့်ပြီး လူသားချင်း စာနာရေး အကူအညီပေးမှု အတွက် ထာဝရ လမ်းကြောင်း ဖွင့်ပေးမယ်ဆိုရင် ကြက်ခြေနီအဖွဲ့နဲ့ ပူးပေါင်းဆောင်ရွက်သွားမှာ ဖြစ်ကြောင်း ဟားမာ့စ်အဖွဲ့က ပြောပါတယ်။
ဂါဇာမှာ ဟားမာ့စ် ဖမ်းထားတဲ့ ဓားစာခံ ၅၀ ရှိပြီး အခုအချိန် ၂၀ လောက်ပဲ အသက်ရှင်လျက်ရှိနေသေးတယ်လို့ ယုံကြည်ရကြောင်း အစ္စရေးအရာရှိတွေက ပြောပါတယ်။
အခုအချိန်အထိ ဟားမာ့စ်အဖွဲ့က သူတို့ ဖမ်းထားတဲ့ ဓားစာခံတွေဆီ အကူအညီပေးရေး အဖွဲ့တွေ ဝင်ခွင့် ဒါမှမဟုတ် မိသားစုဝင်တွေနဲ့ တွေ့ခွင့် မပေးသလို သူတို့ကို ဘယ်နေရာမှာ ဖမ်းဆီးထားတယ်ဆိုတာတောင် မပြောသေးပါဘူး။
ဒေးဗစ်လို့ အမည်ရတဲ့ ဓားစာခံ တစ်ယောက်ရဲ့ ဗီဒီယိုဖိုင်ကို ဟားမာ့စ် အဖွဲ့က သြဂုတ် ၂ ရက် ဖော်ပြချိန်မှာ အာဟာရပြတ်လပ်နေပုံ မြင်တွေ့ရတာကြောင့် အနောက် အင်အားကြီးနိုင်ငံတွေက ဟားမာ့စ်ကို ပြစ်တင် ဝေဖန်ခဲ့ကြပါတယ်။
ပြင်သစ်၊ ဂျာမနီ၊ ဗြိတိန်နဲ့ အမေရိကန်တို့က ဦးဆောင်ပြီး ဟားမာ့စ် အဖွဲ့ကို ဝေဖန်ခဲ့ကြတာ ဖြစ်ပါတယ်။
အဲဒီ အခြေအနေနဲ့ ပတ်သက်လို့ အစ္စရေး နိုင်ငံခြားရေးဝန်ကြီးက ကုလသမဂ္ဂ လုံခြုံရေးကောင်စီ အထူး အစည်းအဝေး တစ်ရပ် ကျင်းပဖို့ တောင်းဆိုထားပါတယ်။
ဂါဇာ ကမ်းမြောင်ဒေသသို့ အကူအညီ ပေးပို့မှုတွေကို အစ္စရေးက ပိတ်ပင်ထားတာကြောင့် ငတ်မွတ် သေဆုံးမှုတွေ ရှိနေပြီး အကူအညီ ပစ္စည်း ပေးဝေနေချိန် အစ္စရေး စစ်တပ်ရဲ့ ပစ်ခတ်မှုကြောင့် လူသေဆုံးမှုတွေလည်း ရှိနေတယ်လို့ ဟားမာ့စ်ဖွင့်ထားတဲ့ ဂါဇာ ကျန်းမာရေးဝန်ကြီးဌာနက ပြောကြားထားပါတယ်။
Ref:Reuters